Mat 15
15
Mɔmoane amra ngilehilelɛ ne
(Mak 7.1-13)
1Falasiima bie nee mɛla kilehilevolɛma mɔɔ vi Gyɛlusalɛm la rayiale Gyisɛse na bɛbizale ye kɛ, 2“Duzu ati a wɔ ɛdoavolɛma ne ɛnli ngilehilelɛ ne mɔɔ yɛ nlenya mɔ ɛva ɛgyakyi yɛ la azo ɛ? Bɛnnrinzi bɛ sa anwo wɔ adenle kpalɛ zo na bɛali debie.”
3Gyisɛse buale bɛ kɛ, “Na bɛdabɛ noko kɛmɔti a bɛnli Nyamenle mɛla ne azo na bɛdi bɛdabɛ bɛ ngilehilelɛ ne anzi ɛ? 4#Ade 20.12; 21.17; Mɛla 5.16; Sɛlɛ 20.9 Ɔluakɛ Nyamenle se, ‘Di ɛ ze nee ɛ nli eni’, na ‘awie biala mɔɔ kɛha edwɛkɛ ɛtane kɛhile ɔ ze anzɛɛ ɔ nli la, ɔwɔ kɛ bɛku ye.’ 5Noko bɛmɛ bɛse, ‘Saa awie lɛ debie mɔɔ ɔkola ɔfa ɔboa ɔ ze anzɛɛ ɔ nli a ɔyɛ boɛ, na ɔka kɛ: Mɔɔ ɛkɛnyia ye wɔ me ɛkɛ ne la, meva mebɔ azu memaa Nyamenle a, 6ɛnee ɔngyia kɛ ɔkɛli ɔ ze eni.’ Zɔhane ati bɛva bɛ amaamuo zɛhae bɛdu Nyamenle Edwɛkɛ ne bɛgua. 7Bɛmɛ nabalabama! Ayezaya nwunle ye bɔkɔɔ yɛɛ ɔhanle ye wɔ bɛ nwo a. Ɔse,
8 #
Aye 29.13
‘Nyamenle se:
Menli ɛhye mɔ fa bɛ nloa babonle mgbane kanvo
me, na bɛ ahonle ɛdeɛ, ɔmbikye me.
9Bɛ ɛzonlenlɛ ne le mgbane,
ɔluakɛ bɛkilehile mɔɔ menli ɛhyehyɛ la kɛ asɛɛ me mɛla ɔ!’ ”
Ninyɛne mɔɔ gua sonla nwo evinli la
(Mak 7.14-23)
10Akee Gyisɛse vɛlɛle menli dɔɔnwo ne wɔ ɔ nwo ɛkɛ na ɔzele bɛ kɛ, “Bɛdie ɛhye boɛ! 11Tɛ mɔɔ kɔ sonla nloa nu la a gua ɔ nwo evinli a, na mɔɔ vi ɔ nloa nu finde la a gua ɔ nwo evinli a.”
12Nzinlii, ɛdoavolɛma ne rale Gyisɛse anwo ɛkɛ rahanle hilele ye kɛ, “Asoo ɛze kɛ mɔɔ ɛhanle la manle Falasiima ne ati zile aze?” 13Gyisɛse buale kɛ, “Baka biala mɔɔ tɛ Egya mɔɔ wɔ anwuma la a luale la bɛbadu ye bɛado aze. 14#Luk 6.39 Bɛgyakyi bɛ! Bɛle mgbanyinli anyenzinliravolɛma mɔɔ kile anyenzinliravolɛma adenle a; anyenzinliravolɛ kile anyenzinliravolɛ adenle a, bɛ mu nwiɔ bɛgua kuma nu!”
15Na Pita hanle kɛ, “Kile yɛ ɛrɛlɛ ne abo.”
16Gyisɛse zele bɛ kɛ, “Na ɛnɛ nee ɛnɛ bɛdabɛ noko bɛnlɛ ndelebɛbo kɛ menli ɛhendeɛ ne mɔ la ɔ? 17Bɛnwu ye kɛ debie biala mɔɔ sonla kɛva kɛwula ɔ nloa anu la kɔ ɔ kunlu na ɔfa ye aze ɔse. 18#Mat 12.34 Na mɔɔ vi bɛ nloa nu finde la vi ahonle nu, na bɛmɛ yɛɛ bɛgua sonla nwo evinli a. 19Ɔluakɛ ahonle nu yɛɛ adwenle ɛtane mɔɔ le kɛ sonla ɛhunlɛ, awuvolɛvalɛ, adwɔmanebɔlɛ, awule ɛyɛlɛ, daselɛ adalɛ ɛlilɛ, yɛɛ nwondomgbɔ ɛpɛlɛ vi ba a. 20Ninyɛne ɛhye mɔ a gua sonla nwo evinli a, na bɛ sa anwo evinli mɔɔ bɛfa bɛali debie la ɛngua bɛ nwo evinli.”
Raalɛ bie diedi
(Mak 7.24-30)
21Gyisɛse vile ɛkɛ ne na ɔhɔle azuamgbole Taya nee Saedɛn afoa nu nehane. 22Raalɛ bie mɔɔ boka maanyɛlɛ fane ne mɔɔ bɛfɛlɛ ye Keena la anwo, na ɔvi maanzinli ne anu la rale Gyisɛse anwo ɛkɛ rahanle hilele ye kɛ, “Yɛmenle, Devidi ara! Nwu me anwunvɔne! Sunsum ɛtane bie ɛlɛgyegye me ra raalɛ, na kɛkala ɔyɛ se kpalɛ kpalɛ.”
23Na Gyisɛse andɛne ye zo. Na ye ɛdoavolɛma ne rale rabodole ye kɛ, “Nea raalɛ ye maa ɔhɔ na ɔdoa yɛ ɔlɛyɛ alɛra!”
24Gyisɛse buale kɛ, “Bɛzoanle me wɔ mboane ne mɔɔ wɔ Yizilayɛ na bɛminli la angome anwo.”
25Raalɛ ne radule dɔle Gyisɛse agyakɛ anu bodole ye kɛ, “Yɛmenle, mesɛlɛ wɔ, boa me!”
26Gyisɛse buale ye kɛ, “Ɔnle kpalɛ kɛ bɛkɛva aleɛ mɔɔ bɛfa bɛamaa ngakula ne mɔ la bɛkɛmaa ahwea.”
27Raalɛ ne zele ye kɛ, “Yɛmenle, ɔle zɔhane, noko akee ahwea ne mɔ bɔbɔ di mgbokpoloka ne mɔɔ vi bɛ menle ɛkponle ne azo gua aze la.”
28Gyisɛse buale ye kɛ, “Ɛle raalɛ mɔɔ wɔ diedi le kpole kpalɛ a. Mɔɔ ɛkpondɛ la ɛyɛ ɛkɛ ɛmaa wɔ.” Na raalɛ ne ara raalɛ ne dele kpɔkɛ ɛkɛ ne ala.
Gyisɛse yɛ menli dɔɔnwo ayile
29Gyisɛse vile ɛkɛ, ɔsianenle Galeli Tandane ne, ɔhɔvole boka bie na ɔdɛnlanle aze. 30Menli dɔɔnwo kpalɛ vale abuburama, anyenzinliravolɛma, mumule, yɛɛ bɛdabɛ mɔɔ ewule ngakyile ɛha bɛ la amuala raguale Gyisɛse agyakɛ anu, na ɔyɛle bɛ muala ayile. 31Mɔɔ menli ne nwunle kɛ mumule ɛlɛtendɛ, abubura ɛlɛtia, mɔɔ ɛdwidwe la anwo ɛza, na anyenzinliravolɛ nwu debie la, ɔzinle bɛ nwo, na bɛyele Yizilayɛ Nyamenle ne ayɛlɛ.
Gyisɛse maa menli apenle nna aleɛ
(Mak 8.1-10)
32Gyisɛse vɛlɛle ye ɛdoavolɛma ne na ɔzele bɛ kɛ, “Menli ye anwo yɛ me alɔbɔlɛ, ɔluakɛ bɛ nee me ɛradɛnla ɛke kenle nsa, yɛɛ bɛtɛdile debie. Mengulo kɛ bɛfa bɛ ko mgbane bɛsia bɛkɔ, anrɛɛ bɛ nye zo kɛbulu bɛ wɔ adenle nu.”
33Ye ɛdoavolɛma ne bizale ye kɛ, “Ɛnee nienwu a yɛkɛnyia aleɛ wɔ fienemgbole ye anu yɛkɛmaa menli ɛwolaa ɛhye kɛli, bɛ ko kɛyi a?”
34Gyisɛse bizale bɛ kɛ, “Kpanwo nyɛ a bɛlɛ a?”
Bɛbuale kɛ, “Kpanwo mumua nsuu yɛɛ fɛlɛ ekyi.”
35Gyisɛse manle menli ne dɛnlanle aze. 36Akee ɔvale kpanwo mumua nsuu ne nee fɛlɛ ne, ɔyɛle Nyamenle mo na ɔbubule nuhua ɔvale ɔmanle ɛdoavolɛma ne, na ɛdoavolɛma ne vale manle menli ne lile. 37Bɛ muala bɛlile bɛ ko yile. Na ɛdoavolɛma ne sesale ɔ bo zo mgbokpoloka ne ahɛndɛne nsuu tetɛkɛɛ. 38Menli mɔɔ lile la, saa ɛye mraalɛ nee ngakula mɔɔ wɔ nu la nu a, bɛle mrenya apenle nna.
39Akee Gyisɛse gyakyile bɛ adenle na ɔvole ɛlɛne nu ɔhɔle Magadan maanzinli nu.
Bible in Nzema © Bible Society of Ghana, 1998.