Ade 7
7
1Na Ɛdɛnkɛma zele Mosisi kɛ, “Nea, meyɛ wɔ kɛ ɛle Nyamenle wɔ belemgbunli ne anye zo, na ɛ diema Aalɔn ayɛ wɔ kpɔmanvolɛ. 2Ɛbaha mɔɔ mebaha meahile wɔ la amuala wɔahile ɛ diema Aalɔn na ɔdaye noko yeaha yeahile belemgbunli ne kɛ ɔmaa Yizilayɛma ɛvi ye azɛlɛ ne azo ɛhɔ. 3Mebamaa belemgbunli ne ayɛ dapele. Kanza mebɔ me sɛkɛlɛneɛ nee me nwanwane ninyɛne ne mɔ anwo mɔnwo mɔnwo wɔ Yigyibiti azɛlɛ zo bɔbɔ a, belemgbunli ne ɛnrɛdie wɔ. 4Na mebadea Yigyibitima kpole bie na meava nyɛleɛ mgbole mɔɔ kile ndeanlɛ la meaye me menli Yizilayɛma meavi Yigyibiti azɛlɛ zo. 5Saa mefa tumi kpole metea Yigyibitima, meye me menli Yizilayɛma mefi Yigyibiti a bɛanwu kɛ medame a mele Ɛdɛnkɛma a.” 6Na Mosisi nee Aalɔn yɛle ye zɔhane, kɛmɔ Ɛdɛnkɛma zele bɛ la. 7Mekɛ mɔɔ bɛtendɛ bɛahile Yigyibiti belemgbunli ne la, ɛnee Mosisi ɛli ɛvolɛ abulatwɛ yɛɛ Aalɔn ɛli ɛvolɛ abulatwɛ nee nsa.
Aalɔn kpɔma ne
8Na Ɛdɛnkɛma zele Mosisi nee Aalɔn kɛ, 9“Saa Yigyibiti belemgbunli ne se bɛ kɛ bɛyɛ nwanwane debie bɛhile kɛ bɛle nɔhalɛ a, wɔmɔ Mosisi, ka kile Aalɔn kɛ, ‘Fuandi wɔ kpɔma ne to belemgbunli ne anyunlu ɛkɛ maa ɔhakyi ɛwɔlɛ.’ ” 10Yemɔti Mosisi nee Aalɔn hɔle belemgbunli ne ɛkɛ hɔyɛle mɔɔ Ɛdɛnkɛma zele bɛ la. Aalɔn vuandinle ye kpɔma ne dole belemgbunli nee ye mgbanyima ne mɔ anyunlu ɛkɛ na ɔhakyile ɛwɔlɛ. 11Akee belemgbunli ne vɛlɛle ye nrɛlɛbɛvolɛma nee ngonyiama mɔɔ wɔ Yigyibiti la, na bɛdabɛ noko bɛyele ngonyia ko ne ala bie. 12Bɛvuandinle bɛ agbɔma ne mɔ bɛguale aze na agbɔma ne mɔ hakyile nwɔlɛ. Na Aalɔn ɛwɔlɛ ɛdeɛ ne memenle bɛ nwɔlɛ ne mɔ. 13Noko belemgbunli ne akee yɛle dapele kpole kpalɛ, na kɛmɔ Ɛdɛnkɛma hanle la, akee bɔbɔ ɔnrɛdie bɛ edwɛkɛ fee.
Anwubɛnyunlu to Yigyibitima
Mogya
14Akee Ɛdɛnkɛma zele Mosisi kɛ, “Belemgbunli ɛyɛ dapele, yedu ɔ gye kɛ ɔnrɛmaa menli ne ɛnrɛhɔ. 15Nwonlomɔ kɔ belemgbunli ne ɛkɛ, wɔ mekɛ mɔɔ ɔlɛkɔ Azule Naele ne anu la. Kendɛ ye wɔ azule ne anloa. Anrɛɛ fa wɔ kpɔma ne mɔɔ hakyile ɛwɔlɛ ne la dɛ ɛ sa nu. 16Na se ye kɛ, ‘Ɛdɛnkɛma, Hibuluma Nyamenle ne zoanle me manle membanzele wɔ kɛ: Maa me menli ne ɛhɔ, amaa bɛazonle me wɔ fienemgbole ne anu, na sumunli kɛ de la, wɔduodua ɛ nzo.’ 17#Yek 16.4 Yemɔti kɛ Ɛdɛnkɛma se la ɛne, ‘Ɛhye bamaa wɔanwu kɛ medame a mele Ɛdɛnkɛma a. Mefa kpɔma ye mɔɔ melɛ la meabɔ azule Naele ye anu, na ɔbahakyi mogya. 18Fɛlɛ mɔɔ wɔ nu la amuala bawu, nzule ne babɔ nvoanvoa bie, na Yigyibitima ɛnrɛnlo ye fee.’ ”
19Na Ɛdɛnkɛma zele Mosisi kɛ, “Ka kile Aalɔn maa ɔva ye kpɔma ne ɔdende ye Yigyibiti nzule ne mɔ kɔsɔɔti azo, bɛ azule ne mɔ, azudenle ne mɔ mɔɔ menli ɛpɛ la, nee bɛ nzubula ne mɔ amuala azo ɔmaa bɛ kɔsɔɔti bɛhakyi mogya. Mogya bava Yigyibiti azɛlɛ ne kɔsɔɔti, mogya bagyinlegyinla mbaka nee awolɛ muala akunlu kuloonwu nu!”
20Mosisi nee Aalɔn yɛle mɔɔ Ɛdɛnkɛma zele bɛ la. Wɔ belemgbunli ne nee ye mgbanyima ne mɔ anyunlu, Aalɔn vale ye kpɔma ne bɔle Azule Naele ne anu, na azule ne hakyile mogya. 21Fɛlɛ mɔɔ wɔ azule ne anu la wule, azule ne bɔnle nvoanvoa mɔɔ Yigyibitima no a ɔnyɛ boɛ a. Yigyibiti ɛleka biala yɛle mogya. 22Yigyibiti ngonyiama yele ngonyia ko ne ala bie, yemɔti belemgbunli ahonle akee solole na ye dapele ne yɛle kpole, na kɛmɔ Ɛdɛnkɛma hanle la, yeandie bɛ fee. 23Belemgbunli ne ziale hɔle sua nu, yeanva ye adwenle yeangɔ ɛhye azo fee. 24Yigyibitima amuala bobɔle bula wɔ azule Naele ne anloa, ɔluakɛ bɛno Naele ne anu nzule ne a ɔnyɛ boɛ fee.
25Ɛdɛnkɛma zɛkyele azule Naele ne la, kenle nsuu pɛle nu na yeayɛ kpalɛ.
Currently Selected:
Ade 7: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
