Ade 8
8
Ahɛlɛne
1Akee Ɛdɛnkɛma zele Mosisi kɛ, “Kɔ kɔze Yigyibiti belemgbunli ne kɛ, ‘Kɛ Ɛdɛnkɛma se la ɛne: Maa me menli ne ɛhɔ, amaa bɛazonle me. 2Saa wɔammaa bɛangɔ a, nea, mebava ahɛlɛne meazɛkye wɔ maanle ne. 3Azule Naele ne bawula ahɛlɛne ngome, bɛbayi wɔ suakunlu ɛkɛ, wɔ sua ne mɔɔ ɛda nu la akunlu, wɔ ɛsokpa ne azo, wɔ mgbanyima nee wɔ menli ne mɔ kɔsɔɔti azua nu yɛɛ bɛ fonlomo ne mɔ nee bɛ ahyɛnze mɔɔ bɛfa bɛto kpanwo bɔbɔ la, ahɛlɛne bayiyi bɛ tetɛkɛɛ. 4Ahɛlɛne bavo wɔ, wɔ menli ne, yɛɛ wɔ mgbanyima ne mɔ anwo.’ ”
5Ɛdɛnkɛma zele Mosisi kɛ, “Ka kile Aalɔn kɛ, ‘Fa wɔ kpɔma ne tende azule ne mɔ, azudenle mɔɔ bɛdudu, nee nzubula ne mɔ azo ye ahɛlɛne maa bɛva Yigyibiti azɛlɛ ne.’ ” 6Yemɔti Aalɔn dendenle ɔ sa wɔ Yigyibiti azule ne mɔ azo, na ahɛlɛne vi bɛ nuhua ravale Yigyibiti azɛlɛ ne amuala bɔkɔɔ. 7Na ngonyiama ne noko yele ngonyia yele ahɛlɛne guale Yigyibiti azɛlɛ zo.
8Akee belemgbunli ne vɛlɛle Mosisi nee Aalɔn na ɔzele bɛ kɛ, “Bɛzɛlɛ Ɛdɛnkɛma bɛmaa ɔye ahɛlɛne ne mɔ ɔvi me nee me menli ne anwo ɛke, na mebamaa menli ne ahɔbɔ azu amaa Ɛdɛnkɛma.”
9Mosisi hanle hilele belemgbunli ne kɛ, “Si ahonle, kile mekɛ mɔɔ menzɛlɛ memaa wɔ nee wɔ mgbanyima nee wɔ menli ne, amaa bɛaye ahɛlɛne ne mɔ bɛavi bɛ nee bɛ azua nu na yeaha Azule Naele ne anu ɛdeɛ ne mɔ ala la.”
10Na belemgbunli ne hanle kɛ, “Ɛhyema.”
Mosisi hanle kɛ, “Ɔyɛ zɔhane, kɛmɔ ɛdawɔ ɛse la, amaa wɔanwu kɛ nyamenle biala ɛnle ɛkɛ ne kɛ Ɛdɛnkɛma, yɛ Nyamenle ne ala. 11Ahɛlɛne ne mɔ bavi wɔ, wɔ mgbanyima, nee wɔ menli ne mɔ azua nu ahɔ, na yeaha mɔɔ wɔ Naele ne anu la ala.” 12Yemɔti Mosisi nee Aalɔn vi belemgbunli ɛkɛ ne hɔle. Mosisi zɛlɛle Ɛdɛnkɛma, kɛmɔ ɔ nee belemgbunli ne hyehyɛle mɔɔ fane ahɛlɛne ne mɔ ɛyelɛ nwo la. 13Na Ɛdɛnkɛma yɛle mɔɔ Mosisi zɛlɛle ye la, ahɛlɛne ne mɔ wule wɔ azua nu, awuke ne mɔ, nee ɛya avule ne mɔ anu. 14Bɛhuohuanle bɛ nloa edukue edukue, akee maanle ne anu bɔnle nvoanvoa. 15Na mɔɔ belemgbunli ne nwunle kɛ ahɛlɛne ne mɔ ɛwu la, ɔyɛle dapele bieko, yeandie mɔɔ Ɛdɛnkɛma hanle la.
Ngɔkɔwule
16Akee Ɛdɛnkɛma zele Mosisi kɛ, “Ka kile Aalɔn kɛ, ‘Tende wɔ kpɔma ne na fa fi azɛlɛ nwo maa ɔye ngɔkɔwule ɔmaa bɛva Yigyibiti maanle ne kɔsɔɔti.’ ” 17Na bɛyɛle ye zɔhane; Aalɔn dendenle ye kpɔma ne finle aze, na ngɔkɔwule vale menli nee nyɛmoa; Yigyibiti azɛlɛ mumua ne azo yɛle ngɔkɔwule ngome. 18Ngonyiama ne bɔle mɔdenle kɛ bɛdabɛ bɛye ngɔkɔwule ne mɔ bie, noko bɛangola. Yemɔti ngɔkɔwule vale menli nee nyɛmoa. 19#Luk 11.20 Ngonyiama ne hanle hilele belemgbunli ne kɛ, “Nyamenle asa ɛrɛlɛsɛka ko bɔbɔ ɛhye o! Nyamenle a ɛyɛ ɛhye a.” Na belemgbunli ne zile ye ɛbolɛ na ɔyɛle dapele. Yeammaa menli ne angɔ, kɛmɔ Ɛdɛnkɛma hanle la.
Nrɛzenra
20Akee Ɛdɛnkɛma zele Mosisi kɛ, “Dwazo nwonlomɔ mangyee ne na kendɛ belemgbunli ne. Saa ɔse yeahɔ azule ne anu a ka kile ye kɛ, ‘Kɛ Ɛdɛnkɛma se la ɛne: Maa me menli ne ɛhɔ, amaa bɛazonle me. 21Saa wɔammaa me menli ne angɔ a, nea, mebamaa nrɛzenra adɔka ara ɛdawɔ, wɔ mgbanyima, nee wɔ menli ne mɔ anwo zo; bɛbayiyi bɛ azua ne mɔ, Yigyibitima kɔsɔɔti azua ne mɔ anu bayɛ nrɛzenra adɔka, akee azɛlɛ mumua ne mɔɔ bɛgyi zolɛ la, nrɛzenra bava ye bɔkɔɔ. 22Kenle zɔhane mebaye Gohyɛn, azɛlɛ ne mɔɔ me menli ne de zolɛ la meazie ahane, amaa nrɛzenra adɔka ne bie angɔ ɛkɛ, na bɛanwu kɛ medame a mele Ɛdɛnkɛma wɔ azɛlɛ ye azo a. 23Mebava ɛweɛne meado me menli ne nee wɔ menli ne avinli. Ɛhyema yɛɛ sɛkɛlɛneɛ ɛhye bazi a!’ ” 24Na Ɛdɛnkɛma yɛle ye zɔhane; nrɛzenra adɔka ravale belemgbunli ne nee ye mgbanyima ne mɔ azua ne. Nrɛzenra ne mɔ zɛkyele Yigyibiti azɛlɛ ne.
25Akee belemgbunli ne vɛlɛle Mosisi nee Aalɔn na ɔzele bɛ kɛ, “Bɛhɔ bɛhɔbɔ azu bɛmaa bɛ Nyamenle ne wɔ maanle ye anu.”
26Na Mosisi hanle kɛ, “Ɔnle kpalɛ kɛ yɛkɛyɛ ye zɔhane, ɔluakɛ saa yɛyɛ a yɛkɛva Yigyibiti bɛkyi azubɔdeɛ ne mɔ bie yɛkɛbɔ azu yɛkɛmaa Ɛdɛnkɛma yɛ Nyamenle ne. Saa yɛfa azubɔdeɛ mɔɔ Yigyibitima kyi la yɛbɔ azu wɔ bɛ nye zo ɛke a, bɛkɛkpa yɛ awolɛ. 27Ɔwɔ kɛ yɛtia kenle nsa adenle yɛkɔ fienemgbole ne anu yɛkɔbɔ azu yɛmaa Ɛdɛnkɛma yɛ Nyamenle ne, kɛmɔ ɔdaye ɔkɛhile yɛ la.”
28Yemɔti belemgbunli ne hanle kɛ, “Memaa bɛahɔ bɛahɔbɔ azu bɛamaa Ɛdɛnkɛma bɛ Nyamenle ne wɔ fienemgbole ne anu, na moa yɛɛ ɔnle kɛ bɛkɔ a. Bɛzɛlɛ bɛmaa me.”
29Akee Mosisi hanle kɛ, “Nea, mevi ɛ nwo ɛke melɛkɔ, na mebazɛlɛ Ɛdɛnkɛma kɛ nrɛzenra adɔka ne ɛvi belemgbunli, ye mgbanyima, nee ye menli ne anwo zo ɛhyema; na Nana, mmabɛlɛbɛla yɛ bieko kɛ ɛnrɛmaa me menli ne ɛnrɛhɔbɔ azu ɛnrɛmaa Ɛdɛnkɛma.”
30Yemɔti Mosisi vi belemgbunli ne anwo ɛkɛ ne hɔzɛlɛle Ɛdɛnkɛma.
31Na Ɛdɛnkɛma yɛle mɔɔ Mosisi bizale ye la, na ɔmanle nrɛzenra adɔka ne vile belemgbunli, ye mgbanyima, nee ye menli ne anwo zo; ko bɔbɔ anga ɛkɛ.
32Na belemgbunli ne zile ye ɛbolɛ, na ye dapele ne akee yɛle kpole kpalɛ.
Currently Selected:
Ade 8: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
