Ade 36
36
1“Bɛzalii, Oholeabe, nee awie biala mɔɔ Ɛdɛnkɛma ɛmaa ye adwinlililɛ nwo nrɛlɛbɛ nee ndelebɛbo, na ɔze kɛ bɛsi bɛsi Ndanlɛ Sua Nwuanzanwuanza la ɔwɔ kɛ yɛ debie biala, kɛmɔ Ɛdɛnkɛma ɛhile la.”
Menli ne fa ahyɛlɛ ninyɛne dɔɔnwo ara
2Mosisi vɛlɛle Bɛzalii, Oholeabe, nee dwinvolɛ biala mɔɔ Ɛdɛnkɛma ɛmaa ye adwinlililɛ nwo nrɛlɛbɛ na ɔlɛ ɛhulolɛ kpalɛ la kɛ bɛbɔ gyima ne abo. 3Mosisi vale azubɔdeɛ ne mɔ mɔɔ Yizilayɛma ɛva ɛra kɛ bɛva bɛzi Ndanlɛ Sua nwuanzanwuanza ne la kɔsɔɔti manle bɛ. Menli ne hɔle zolɛ vale azubɔdeɛ ninyɛne rɛlɛle Mosisi nwonlomɔ biala. 4Yemɔti dwinvolɛma mɔɔ ɛnee ɛlɛyɛ gyima ne la hɔle ekpunli ngoko 5hɔbɔle Mosisi amaneɛ kɛ, “Ninyɛne mɔɔ menli ne ɛlɛfa ara la akee bo gyima mumua ne mɔɔ Ɛdɛnkɛma ɛhile kɛ yɛyɛ la azo.”
6Yemɔti Mosisi manle bɛbɔle nolo wɔ azokoɛleɛ ne kɛ, “Nrenya anzɛɛ raalɛ biala mmafa Ndanlɛ Sua nwuanzanwuanza ne ɛzilɛ nwo azubɔdeɛ bieko ba.” Yemɔti menli ne anva bieko amba. 7Ninyɛne mɔɔ ɛnee bɛ nee bɛ ɛra la bo gyima ne azo.
Ɛdɛnkɛma Nyianu Ndanlɛ Sua ne ɛzilɛ
(Ade 26.1-37)
8Dwinvolɛma ne mɔɔ ze gyima kpalɛ kpalɛ la amuala vale mgbɛnu ndanlɛ bulu hyehyɛle Ndanlɛ Sua ne; bɛvale ndanlɛ mɔɔ bɛva lenen nyɛma kɛnlɛma, mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo na bɛnwo abɔdeɛ mɔɔ lɛ ndɛbalɛ la bɛgua nu la a bɛzile sua ne a. 9Ndanlɛ ne mɔ amuala sɛ mgbole, ko biala tendenle le mita bulu nee nwiɔ yɛɛ ye tɛtɛlɛ le mita nwiɔ. 10Bɛvale nnu bɛbɔle nwolɛ bɛkpomgbale ye mumua ko, yɛɛ eza bɛvale nnu ne noko bɛbɔle nwolɛ bɛkpomgbale. 11Bɛvale ɛdanlɛ buluwu bɛkpomgbale bɛbɔle ahotosalɛ bɛsosɔle mɔɔ tɔ zolɛ nwiɔ ne la a. 12Bɛbɔle ahotosalɛ abulanlu bɛsosɔle alumua ɛdeɛ ne mɔɔ bɛbɔle bɛ nwolɛ la anloa na eza bɛabɔ abulanlu bɛasosɔ amozi ɛdeɛ ne noko mɔɔ bɛbɔle bɛ nwolɛ la anloa. Mgbɛnu ndanlɛ fane nwiɔ ne anloa ahotosalɛ ne mɔ, ko biala nee ɔ gɔnwo anye bɔ zo. 13Bɛyɛle ezukoa nvutuke nzosɔnu abulanlu bɛvale bɛsosɔle mgbɛnu ndanlɛ fane nwiɔ ne ahotosalɛ ne mɔ bɛmanle ɛdanlɛ ne yɛle mumua ko.
14Bɛvale mgbɛnu ndanlɛ mɔɔ bɛva mbɔnkye enrinli bɛnwo la azinli bulu nee ko bɛbɔle bɛ nwolɛ bɛvale bɛhedale Ndanlɛ Sua ne azo. 15Bɛ muala bɛ mgbole sɛ, ko biala tendenle le mita bulu nee nsa, yɛɛ ye tɛtɛlɛ le mita nwiɔ. 16Bɛvale azinli nnu bɛbɔle nwolɛ bɛkpomgbale, yɛɛ bɛvale nsia ne noko bɛbɔle nwolɛ bɛkpomgbale. 17Bɛbɔle ndanlɛ azinli ahotosalɛ abulanlu bɛsosɔle alumua ɛdeɛ ne anloa, yɛɛ bɛvale abulanlu noko bɛsosɔle amozi ɛdeɛ ne noko anloa. 18Bɛvale kɔbele bɛyɛle nzosɔnu abulanlu bɛsosɔle ndanlɛ nwiɔ ne bɛyɛle ye debie mumua ko. 19Akee bɛvale mboane nee mbɔnkye nwoma mɔɔ bɛwula ye ayile la bɛhedale sua ne azo.
20Bɛvale akasea mbaka felɛmo bɛgyinlanle Ndanlɛ Sua ne. 21Felɛmo ko anwumahɔlɛ le mita nna yɛɛ ye tɛtɛlɛ le mita foa ko nee ekyi. 22Bɛmanle ko biala ɛsalɛ nwiɔ, amaa bɛfa bɛ bɛabobɔ nwo a yeayɛ boɛ. 23Bɛgyinlanle felɛmo abulanwiɔ wɔ nyiakɛ afoa nu, 24yɛɛ bɛvale dwɛtɛ fufule bɛyɛle adiabo abulanla bɛzieziele bɛ zolɛ. Felɛmo ko biala lɛ adiabo nwiɔ mɔɔ sosɔ ɔ sa ne mɔ anu a. 25Bɛgyinlanle felɛmo ne abulanwiɔ wɔ sɔlɔ afoa nu, 26yɛɛ bɛziele bɛ adiabo abulanla zo. Felɛmo ko biala lɛ adiabo nwiɔ. 27Adɔleɛ afoa nu, bɛyɛle nlenkɛ felɛmo nsia, 28yɛɛ bɛyɛle nwiɔ wɔ ye mgbɛnezo nwiɔ ne mɔɔ wɔ ɔ nzi la. 29Mgbɛnezo felɛmo nwiɔ ne, bɛbɔle bɛ nwo anwuma toonwo ɔdwule aze. Bɛyɛle felɛmo nwiɔ zɛhae wɔ sua ne mgbɛnezo nwiɔ ne azo. 30Yemɔti felɛmo ne mɔ le mɔtwɛ yɛɛ dwɛtɛ fufule adiabo bulu nee nsia, felɛmo ko biala gyi adiabo nwiɔ azo.
31Bɛzele akasea mbaka mɔɔ bɛfa bɛbeɛbea nu la bulu nee nnu, Ndanlɛ Sua ne tɛbanu ko ɛdeɛ nnu, 32ye tɛbanu ko noko ɛdeɛ nnu, yɛɛ ɔ nzi adɔleɛ afoa nu ɛdeɛ nnu. 33Baka ne mɔɔ bea Ndanlɛ Sua ne bane ne mɔ avinli la vi bane nwo kɔkpula bane nwo, yɛɛ ɔbea felɛmo ne mɔ avinli. 34Bɛvale ezukoa nvutuke bɛfɔlele felɛmo ne mɔ anwo, na bɛava ezukoa nvutuke ngɛba bɛasosɔ bɛ, amaa bɛava mbaka ne mɔ mɔɔ beɛbea avinli mɔɔ ezukoa nvutuke fɔle nwolɛ la bɛawulowula nu.
35Bɛvale mboane enrinli buluwu, buluwu nee kɔkɔlɛ afonla, nee kɔkɔlɛ yɛɛ lenen nyɛma kɛnlɛma bɛnwonle ngbɛnu ɛdanlɛ ne na bɛnwonle abɔdeɛ mɔɔ lɛ ndɛbalɛ la bɛguale nu. 36Bɛzele akasea mbaka nna, bɛvale ezukoa nvutuke bɛfɔlele nwolɛ, bɛvale bie nzosɔnu bɛsosɔle bɛ na bɛvale mgbɛnu ɛdanlɛ ne bɛhendanle bɛ. Akee bɛyɛle dwɛtɛ fufule adiabo nna na bɛvale mbaka ne mɔ bɛzieziele zolɛ. 37Bɛvale ɛdanlɛ kɛnlɛma mɔɔ bɛva mboane enrinli buluwu, buluwu nee kɔkɔlɛ afonla, nee kɔkɔlɛ yɛɛ lenen nyɛma kpalɛ bɛnwo na bɛnwo nuhua la bɛkpomgbale ɛdanlɛ bɛhendanle Ndanlɛ Sua ne anlenkɛ ne anloa. 38Ɛdanlɛ ɛhye, bɛzele mbaka nnu bɛvale nzosɔnu bɛsosɔle bɛ, bɛvale ezukoa nvutuke bɛfɔlele bɛ ti nee mbaka mumua ne mɔ anwo na bɛyɛle kɔbele adiabo nnu bɛvale ye mbaka ne mɔ bɛzieziele zolɛ.
Currently Selected:
Ade 36: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
