Ade 37
37
Ngyekyeleɛ Ɛlɛka ne ɛbobɔlɛ
(Ade 25.10-22)
1Bɛzalii vale akasea ndaboa bobɔle Ngyekyeleɛ Ɛlɛka ne. Ye tendenle le mita ko, ye tɛtɛlɛ le mita foa ko nee ekyi, yɛɛ ye anwumahɔlɛ le mita foa ko nee ekyi. 2Ɔvale ezukoa nvutuke tagyee ɔfɔlele ɔ kunlu nee nwolɛ na ɔvale ezukoa nvutuke ɔdole ɔ nloa kɛba ɔyiale. 3Ɔvale ezukoa nvutuke ɔyɛle ngɛba nna mɔɔ bɛbava mbaka bɛawulowula nu bɛazoa la ɔsosɔle ye mgbɛnezo nna ne, nwiɔ wɔ ye tɛbanu yɛɛ nwiɔ wɔ ye tɛbanu. 4Ɔvale akasea mbaka ɔzele mbaka mɔɔ bɛfa bɛsoa la na ɔvale ezukoa nvutuke ɔfɔlele nwolɛ 5na ɔvale ɔwulowulale ngɛba ne mɔ mɔɔ wɔ Ngyekyeleɛ Ɛlɛka ne tɛbanu nee ye tɛbanu la anu. 6Ɔvale ezukoa nvutuke tagyee ɔyɛle ɛlɛka ne ati. Ye tendenle le mita ko yɛɛ ye tɛtɛlɛ le mita foa ko nee ekyi. 7Ɔbolole ezukoa nvutuke tagyee ɔyɛle abɔdeɛ nwiɔ mɔɔ ko lɛ ndɛbalɛ nwiɔ la. 8Ɔvale bɛ ɔzieziele tile ne ati nee ɔ ti. Ɔvale bɛ ɔfoamonle zolɛ ɔmanle bɛ nee tile ne yɛle debie ko. 9Abɔdeɛ nwiɔ ne mɔɔ lɛ ndɛbalɛ la anye bɔ zo, na bɛ ndɛba ne mɔ mɔɔ bɛdɛlɛdɛlɛ nu la keda tile ne azo.
Ɛkponle ne mɔɔ bɛfa kpanwo azubɔdeɛ bɛgua zo bɛmaa Nyamenle la Ɛbobɔlɛ
(Ade 25.23-30)
10Bɛzalii eza vale akasea ndaboa bobɔle ɛkponle. Ye tendenle le asɛɛ mita nwiɔ, ye tɛtɛlɛ le asɛɛ mita foa ko, yɛɛ ye anwumahɔlɛ le mita foa ko nee ekyi. 11Ɔvale ezukoa nvutuke ɔfɔlele nwolɛ na ɔvale bie ɔdole ɔ nloa ɔyiale. 12Ɔdole ɔ nloa kɛba mɔɔ ye tɛtɛlɛ kɛyɛ ɛsalɛ ɛrɛlɛsɛka nsa na ɔvale ezukoa nvutuke ɔfɔlele nwo. 13Ɔyɛle ngɛba mɔɔ bɛfa mbaka bɛwulowula nu na bɛazoa la nna ɔsosɔle ɔ bati nna ne, ɛleka mɔɔ ɔ gyakɛ ne mɔ wɔ la. 14Ɔvale ngɛba ne mɔ mɔɔ bɛbava mbaka ne bɛawulowula nu bɛazoa la ɔsosɔle ɔ nloa kɛba ne. 15Ɔvale akasea ndaboa ɔzele mbaka ne mɔ mɔɔ bɛbava bɛazoa ɛkponle ne la na yeava ezukoa nvutuke yeafɔle nwolɛ. 16Ɔvale ezukoa nvutuke tagyee ɔyɛle ɛkponle ne ahyɛnze ne mɔ, agbɛlɛte, ahanrɛlɛ, dwora ne mɔ, nee ahyɛnze kuloonwu mɔɔ bɛfa nwanye azubɔdeɛ bɛgua nu bɛye ɛdɛne, nee mɔɔ bɛfa ɛyɛlɛ evuanlɛ bɛgua nu la.
Kɛnlaneɛ baka ne ɛyɛlɛ
(Ade 25.31-40)
17Ɔvale hamenle ɔbolole ezukoa nvutuke tagyee ɔyɛle kɛnlaneɛ baka ne abo ne nee ye baka mumua ne; ɔvale bie ɔyɛle ndotolo nee ye nya ne mɔ, na ɔvale bɛ muala ɔbɔle nu ɔyɛle bɛ debie ko.
18Kɛnlaneɛ baka ne lɛ ngane nsia, nsa wɔ ye foa ko yɛɛ nsa noko wɔ ye foa ko. 19Ngane nsa ne mɔɔ wɔ foa ko nee foa ko la, bɛyɛ ahɔpo mɔɔ lɛ nduazo na bɛyɛ bɛ kɛ alemɔndo ndotolo mɔɔ ɛkpuke na yeye nya la bɛziezie zolɛ. 20Kɛnlaneɛ baka mumua ne, bɛyɛ ahɔpo nna mɔɔ lɛ nduazo na bɛyɛ bɛ kɛ alemɔndo ndotolo mɔɔ ɛkpuke la bɛziezie zolɛ. 21Nya ɛdɛkɛ ko wɔ ngane nwiɔ biala abo. 22Nya ne mɔ, ngane ne mɔ, nee kɛnlaneɛ baka ne, bɛvale ezukoa nvutuke tagyee mɔɔ bɛva hamenle bɛbolo la bɛyɛle bɛ debie ko. 23Ɔyɛle kɛnlaneɛ baka ne anwo ahɛnlaneɛ nsuu, yɛɛ ɔvale ezukoa nvutuke tagyee ɔyɛle nwolɛ dabekɛ nee ahyɛnze ndɛbandɛba. 24Ɔvale ezukoa nvutuke tagyee kilo abulasa nee nnu a ɔyɛle kɛnlaneɛ baka ne nee nwolɛ ninyɛne ne mɔ kɔsɔɔti a.
Ɛyɛlɛ ɛyelalɛ azukponle ne ɛbobɔlɛ
(Ade 30.1-5)
25Ɔvale akasea ndaboa ɔbobɔle azukponle mɔɔ bɛyela ɛyɛlɛ wɔ zo la. Ye tɛbanu ne mɔ amuala sɛ, ye tendenle le asɛɛ mita foa ko, ye tɛtɛlɛ le asɛɛ mita foa ko, yɛɛ ye anwumahɔlɛ le asɛɛ mita ko. Bɛyɛle bɛmanle ɔ nee ɔ bati nna ne azo kpokpɔkoo ne mɔ nee ye yɛle debie ko. 26Ɔvale ezukoa nvutuke tagyee ɔfɔlele zolɛ, ye tɛbanu nna ne mɔ, nee ɔ bati kpokpɔkoo ne mɔ anwo, na ɔvale bie ɔdole ɔ nloa kɛba ɔyiale. 27Ɔvale ezukoa nvutuke ɔyɛle ngɛba mɔɔ bɛbava mbaka mɔɔ bɛfa bɛsoa la bɛawulowula nu la ɔsosɔle ezukoa nvutuke ne mɔɔ ɔvale ɔdole ɔ nloa la abo wɔ ye tɛbanu nee ye tɛbanu. 28Ɔvale akasea ndaboa a ɔzele mbaka ne mɔɔ bɛbava bɛazoa la na yeava nvutuke yeafɔle nwolɛ.
Ɛkpokpalɛ nwole ne nee ɛyɛlɛ ne ɛyɛlɛ
(Ade 30.22-38)
29Ɔyɛle ɛkpokpalɛ nwole nwuanzanwuanza ne nee ɛyɛlɛ evuanlɛ ne kɛnlɛma kpalɛ kɛ mɔɔ menli mɔɔ yɛ ninyɛne evuanlɛ la kɛyɛ ala la.
Currently Selected:
Ade 37: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
