Ade 35
35
Ɛnwomenlelielɛ Kenle ne anwo ngyehyɛlɛ
1Mosisi yiale Yizilayɛma kɔsɔɔti na ɔhanle ɔhilele bɛ kɛ, “Debie mɔɔ Ɛdɛnkɛma se bɛyɛ la ɛne: 2#Ade 23.12; 31.15; 34.21; Mɛla 5.12-14 Bɛva kenle nsia bɛyɛ bɛ gyima, na kenle nsuu ne le Ɛnwomenlelielɛ Kenle. Ɔle kenle nwuanzanwuanza mɔɔ bɛdu bɛzie ɛkɛ bɛmaa Ɛdɛnkɛma a. Awie biala mɔɔ kɛyɛ gyima kenle ko ne la, ɔwɔ kɛ bɛku ye. 3Senle bɔbɔ, bɛmmawuda bie bɛ azua nu wɔ Ɛnwomenlelielɛ Kenle ne.”
Ndanlɛ Sua Nwuanzanwuanza ne azubɔdeɛ ninyɛne
(Ade 25.1-9)
4Mosisi hanle hilele Yizilayɛma kɔsɔɔti kɛ, “Debie mɔɔ Ɛdɛnkɛma se bɛyɛ la ɛne: 5Awie biala ɛbɔ azu ɛmaa Ɛdɛnkɛma. Awie biala mɔɔ ɔdaye ɔkulo la ɛva azubɔdeɛ ɛrɛlɛ Ɛdɛnkɛma: azubɔdeɛ mɔɔ le kɛ ezukoa nvutuke, dwɛtɛ fufule, yɛɛ kɔbele; 6mboane enrinli buluwu, buluwu nee kɔkɔlɛ afonla, nee kɔkɔlɛ; lenen ɛdanlɛ nyɛma, ɛdanlɛ mɔɔ bɛva mbɔnkye enrinli bɛnwo; 7mboane nyinli nwoma mɔɔ bɛwula bɛ ayile kɔkɔlɛ, nee mbɔnkye nwoma; akasea mbaka; 8kɛnlaneɛ nwole; ninyɛne mɔɔ bɛfa bɛyɛ ɛkpokpalɛ nwole nee ɛyɛlɛ evuanlɛ; 9kanɛlea nee ezukoa awolɛ ngakyile mɔɔ bɛfa bɛbobɔ Sɛlɛvolɛ Kpanyinli ne ɛzonlenlɛ tɛladeɛ ne mɔɔ bɛfɛlɛ ye yifɔdo nee akɛnrazo aguzo ne mɔ anu la.
Ɛdɛnkɛma Ndanlɛ Sua ne anwo ninyɛne
(Ade 39.32-43)
10“Menli mɔɔ ze adwinli di wɔ bɛ nu la ɛrayɛ debie biala mɔɔ Ɛdɛnkɛma ɛha la. 11Ndanlɛ Sua ne, debie mɔɔ bɛfa bɛwowa ɔ kunlu nee ɔ nzi, ye nzosɔnu ne mɔ, ye ɛgyinlanlɛ felɛmo ne mɔ, ye ndaboa mɔɔ bɛfa bɛbeɛbea nu, ye mbaka sika nee bɛ adiabo ne mɔ; 12Ngyekyeleɛ Ɛlɛka ne nee ye mbaka ne mɔ, ye nduazo ne nee mgbɛnu ndanlɛ ne; 13ɛkponle ne, ye mbaka ne mɔ, nee nwolɛ ahyɛnze ne mɔ; kpanwo mɔɔ bɛfa bɛbɔ azu bɛmaa Nyamenle; 14ahɛnlaneɛ ne mɔ, kɛnlaneɛ baka ne, ahɛnlaneɛ ninyɛne ne mɔ, nee nwolɛ nwole; 15ɛyɛlɛ ɛyelalɛ azukponle ne nee ye mbaka ne mɔ, ɛkpokpalɛ nwole ne; ɛyɛlɛ evuanlɛ ne; Ndanlɛ Sua ne anlenkɛ ne anloa ɛdanlɛ ne; 16azukponle ne mɔɔ bɛyela azubɔdeɛ ne mɔ zolɛ, nee ye kɔbele kɛlakɛlɛ ne, ye mbaka ne mɔ nee nwolɛ ninyɛne; kyɛnze kuloonwu ne mɔɔ bɛwowo bɛ sa nee bɛ gyakɛ anwo nu la nee ɔ bo ne; 17alie ne anwo ɛwowalɛ ndanlɛ ne mɔ, ye mbaka sika ne mɔ nee bɛ adiabo ne mɔ; alie ne anwo anuhɔlɛ ɛdanlɛ ne, 18Ndanlɛ Sua ne nee alie ne anwo bane ne adakola ne mɔ nee mɛkaleɛ ne mɔ, 19yɛɛ sɛlɛvolɛma adɛladeɛ nwuanzanwuanza ne mɔ mɔɔ Aalɔn nee ɔ mra mrenya ne mɔ bawula azonle wɔ Ɛleka Nwuanzanwuanza ne la.”
Menli ne fa bɛ azubɔdeɛ ne mɔ ara
20Akee Yizilayɛma kɔsɔɔti vile Mosisi anwo ɛkɛ. 21Bɛdabɛ mɔɔ bɛ sunsum manle bɛ anwosesebɛ la, yeyele bɛ ahonle nu vale bɛ azubɔdeɛ ne mɔ rɛlɛle Ɛdɛnkɛma kɛ bɛva bɛzi Nyianu Ndanlɛ Sua ne. Bɛvale debie biala mɔɔ hyia wɔ ye ɛzonlenlɛ nu nee ninyɛne mɔɔ bɛfa bɛnwo sɛlɛvolɛma adɛladeɛ ne mɔ la bɛrale. 22Awie biala, mraalɛ nee mrenya mɔɔ kulo la vale anwoneɛ, bɛ bonyi nu ngɛba, asomadeɛ, mgbɔdelera nee ngɛba, bɛ kɔme nu ndweabane, nee ezukoa nvutuke anwoneɛ ngakyile radole ehono bɔle azu manle Ɛdɛnkɛma. 23Awie biala mɔɔ lɛ mboane enrinli buluwu anzɛɛ buluwu nee kɔkɔlɛ afonla anzɛɛ kɔkɔlɛ, lenen nyɛma kɛnlɛma, mbɔnkye enrinli, yɛɛ mboane anzɛɛ mbɔnkye nwoma mɔɔ bɛwula bɛ ayile la vale rale. 24Awie biala mɔɔ lɛ dwɛtɛ fufule anzɛɛ kɔbele azubɔdeɛ la vale rabɔle azu manle Ɛdɛnkɛma. Awie biala noko mɔɔ lɛ akasea baka mɔɔ bɛfa bɛyɛ gyima ne anwo debie biala a ɔyɛ boɛ la vale rale. 25Mraalɛ mɔɔ ze ninyɛne nwo la yɛle ɛdanlɛnwolɛ nyɛma buluwu, buluwu nee kɔkɔlɛ afonla, nee kɔkɔlɛ, yɛɛ lenen nyɛma rale. 26Mraalɛ noko mɔɔ kola la vale mbɔnkye enrinli nwonle nyɛma. 27Mgbanyima ne mɔ vale kanɛlea awolɛ nee ezukoa awolɛ gyɛne gyɛne rale kɛ bɛva bɛbobɔ ɛzonlenlɛ tɛladeɛ ne nee akɛnrazo aguzo ne mɔ anu, 28eza bɛvale ninyɛne evuanlɛ, nwole mɔɔ bɛfa bɛsɔ kɛnlaneɛ, nee mɔɔ bɛfa bɛyɛ ɛkpokpalɛ nwole la, yɛɛ ɛyɛlɛ evuanlɛ bɛrale. 29Yizilayɛma kɔsɔɔti, mraalɛ nee mrenya mɔɔ lɛ ɛhulolɛ la yeyele bɛ ahonle nu vale bɛ azubɔdeɛ rɛlɛle Ɛdɛnkɛma manle bɛvale bɛyɛle gyima ne mɔɔ ɔzele Mosisi kɛ ɔyɛ la.
Ɛdɛnkɛma Ndanlɛ Sua ne dwinvolɛma
(Ade 31.1-11)
30Mosisi hanle hilele Yizilayɛma kɛ, “Bɛnlea, Ɛdɛnkɛma ɛnlea nu ɛye Yulae ara nrenya Bɛzalii, Huuli anlɔnra ne mɔɔ vi Dwuda abusua ekpunli ne anu la, 31na yeva Nyamenle Sunsum ne yeyi ye tɛkɛɛ, yemaa ye anwosesebɛ nee ndelebɛbo, adwenle nee adwinlililɛ ngakyile kɔsɔɔti, 32mɔɔ bɛfa ezukoa nvutuke, dwɛtɛ fufule nee kɔbele bɛdi la, 33anwoneɛ ɛyɛlɛ, awolɛ nee mbaka ɛzelɛ, nee adwinli ngakyile biala anwo nrɛlɛbɛ. 34Ɛdɛnkɛma ɛmaa ye anwosesebɛ kɛ ɔhile ɔdaye nee Ahesamake ara nrenya Oholeabe mɔɔ vi Dan abusua ekpunli ne anu la. 35Yemaa bɛ nrɛlɛbɛ mɔɔ bɛkola bɛfa bɛdi adwinli biala, anwoneɛ nee awolɛ zo ɛhɛlɛlɛ, ninyɛne nu ɛnwolɛ, nee mboane enrinli buluwu, buluwu nee kɔkɔlɛ afonla, nee kɔkɔlɛ, yɛɛ lenen nyɛma ngɛnlɛma ndanlɛ ɛnwonlɛ. Yemɔti bɛkola bɛyɛ gyima ngakyile biala.
Currently Selected:
Ade 35: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
