Ade 34
34
Awolɛ ndɛbandɛba ne mɔɔ tɔ zolɛ nwiɔ
(Mɛla 10.1-5)
1Ɛdɛnkɛma zele Mosisi kɛ, “Se awolɛ ndɛbandɛba nwiɔ mɔɔ le kɛ alumua ɛdeɛ ne mɔ la. Mebahɛlɛ edwɛkɛ ne mɔɔ mengɛlɛle wɔ alumua ɛdeɛ ne mɔ mɔɔ ɛbubule bɛ la azo la wɔ zolɛ. 2Boɔboa ɛ nwo na ɛhyema nwonlomɔ maa menwu ɛ nyunlu wɔ Saenae Boka ye azo. 3Ɛ nee awie biala mmaba. Ɔnle kɛ bɛnwu awie biala wɔ boka ye anwo ɛleka biala, yɛɛ mboane nee nlankɛ mmakɔ adidi wɔ boka ne abo.” 4Yemɔti Mosisi zele awolɛ ndɛbandɛba nwiɔ kɛ alumua ɛdeɛ ne mɔ ala la. Na kɛmɔ Ɛdɛnkɛma zele ye la, ɔdwazole nwonlomɔ ne na ɔvale awolɛ ne mɔ ɔhɔle Saenae Boka ne azo.
5Na Ɛdɛnkɛma dwule aze amungu ne anu, ɔragyinlanle ɔ nwo ɛkɛ na ɔbɔle ye duma Ɛdɛnkɛma ne. 6#Ade 20.5-6; Ɛdi 14.18 Ɛdɛnkɛma akee zenle ɔ nyunlu ɛkɛ na ɔhanle kɛ, “Medame a mele Ɛdɛnkɛma a, Ɛdɛnkɛma mɔɔ mele anwunvɔnezelɛ nee atiakunlukɛnlɛma Nyamenle, menva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi me tɛkɛɛ. 7Me ɛhulolɛ kpole ne keda apenle apenle nwo zo. Mefa amumuyɛ, mɛladonlɛ, yɛɛ ɛtane mekyɛ; noko ɛhye ɛngile kɛ menrɛdea bɛ. Mebava bɛ ze mɔ ɛtane ne mɔ meadea bɛ mra nee bɛ nlɔnra toonwo yeahɔdwu awolɛndoazo nsa nee nna ne azo.”
8Na Mosisi bɔle ɔ ti aze ndɛndɛ na ɔzonlenle. 9Na ɔhanle kɛ, “O Awulae, mebodo wɔ, Awulae, menli ne le dapele bɔbɔ ɛdeɛ, noko mesɛlɛ wɔ, saa me nyunlu ɛra anyia wɔ ɛ nyunlu a, ɛnee ɛ nee yɛ ɛhɔ, fa yɛ munzule nee yɛ ɛtane ne mɔ kyɛ yɛ, na fa yɛ yɛ wɔ menli.”
Bɛkyekye Ngyekyeleɛ ne bieko
(Ade 23.14-19; Mɛla 7.1-5; 16.1-17)
10Ɛdɛnkɛma zele Mosisi kɛ, “Nea, me nee Yizilayɛma kyekye ngyekyeleɛ. Mebayɛ nwanwane ninyɛne mɔɔ bɛtɛyɛle bie wɔ aleɛabo anzɛɛ maanle biala anu ɛlɛ la, wɔ wɔ menli ne kɔsɔɔti anyunlu. Na menli ne mɔɔ ɛwɔ bɛ avinli la amuala banwu nwanwane ninyɛne mgbole mɔɔ Ɛdɛnkɛma yɛ la, ɔluakɛ debie mɔɔ mebamaa wɔayɛ la yɛ ɛzulolɛ.
11“Di mɔɔ meka meahile wɔ ɛnɛ la azo. Mebavoa Amɔlema, Keenama, Hɛtema, Pɛlɛzema, Haevaema, nee Gyibɛsema wɔ ɛ nyunlu. 12Nea boɛ na maanle ne mɔɔ ɛlɛkɔ nu la, ɛ nee menli ne anyɛ ngyekyeleɛ biala, anrɛɛ ɛkɛzua ɛ nwo ɛhane. 13#Mɛla 16.21 Bubu bɛ azukponle ne mɔ, tudu bɛ ɛzonlenlɛ mpila ne mɔ, na pepɛ bɛ bozonle raalɛ Ahyela sɛkɛlɛneɛ ne mɔ gua.
14“Ɔnle kɛ ɛsonle nyamenle gyɛne biala, ɔluakɛ medame Ɛdɛnkɛma mɔɔ me duma a le Nungule la, mele Nyamenle mɔɔ twe nungule a. 15Ɛ nee menli mɔɔ wɔ maanle ne anu la mmayɛ ngyekyeleɛ biala, amaa saa bɛdi bɛ awozonle ɛzonlenlɛ tuutuu ne na bɛabɔ azu bɛamaa bɛ awozonle ne mɔ a, bɛando ɛsalɛ bɛanvɛlɛ wɔ kɛ ɛraboka bɛ, na sɔnea ara ɛ nwo zo kɛ ɛli bɛ awozonle azubɔlɛ aleɛ ne bie. 16Wɔannea a eza bɛ mra mrenya bagya bɛ mra mraalɛ ne bie mɔ, na bɛ mra mrenya ne mɔ noko ali awozonle ɛzonlenlɛ tuutuu, amaa bɛ mra mrenya ne mɔ noko ali awozonle ɛzonlenlɛ tuutuu azonle bɛ awozonle ne mɔ.
17 #
Ade 20.4; Sɛlɛ 19.4; Mɛla 5.8; 27.15 “Bɛmmagua awozonle ananze biala bɛmaa bɛ nwo na bɛsonle bɛ.
18 #
Ade 12.14-20; Sɛlɛ 23.6-8; Ɛdi 28.16-25 “Bɛzie Angye Ɛvoyia ne na bɛli, kɛmɔ meha mehile bɛ la. Bɛli Ɛvoyia ne kenle nsuu wɔ siane Ebebe ne anu, ɔboalekɛ siane zɔhane anu a bɛvile Yigyibiti a.
19“Belamunli ralɛ nrenya biala, yɛɛ ɛnlankɛ nee boane biala ara nyinli mɔɔ bɛkɛlumua bɛkɛwo ye la le me ɛdeɛ. 20Noko akee ɛkola ɛfa boane ralɛ nyinli ɛsie asoaso ralɛ nyinli abo zo. Saa ɛnrɛzie ɔ bo zo a, ɛnee bu ɔ kɔme. Ɔwɔ kɛ bɛkpɔne bɛ belamunli mralɛ mrenya kɔsɔɔti.
“Biala mmafa ɔ sa mgbane finde me nyunlu. 21#Ade 20.9-10; 23.12; 31.15; 35.2; Mɛla 5.13-14 Bɛyɛ gyima kenle nsia, na kenle nsuu ne azo, saa ɛyazonlɛ anzɛɛ ɛbuhenle o, bɛlie bɛ ɛnwomenle.
22“Saa bɛbɔ ɔ bo kɛ bɛte hwiiti a, bɛli Bɛyɔba Ɛvoyia ne, yɛɛ saa ɛvolɛ awieleɛ ma nloa ɛboɔboalɛ ne wie a, bɛli Kpɔda Bo Ɛdɛnlanlɛ Ɛvoyia ne.
23“Ɛvolɛ biala bɛ mrenya ne mɔ kɔsɔɔti ɛrazonle medame Ɛdɛnkɛma Nyamenle, Yizilayɛ Nyamenle ne fane nsa. 24Ɔluakɛ mebadu menli mɔɔ wɔ maanle maanle mɔɔ wɔ bɛ nyunlu la na meamaa bɛ maanle ne adɛlɛ. Saa ɛvolɛ biala bɛsonle medame Ɛdɛnkɛma bɛ Nyamenle ne fane nsa ne a, bɛ azɛlɛ ne ɛnrɛvi bɛ sa ɛlɛ.
25“Bɛmmafa nane mɔɔ bɛku ye bɛabɔ azu bɛamaa me la bɛboka kpanwo mɔɔ mgbɔvonle wɔ nu la bɛbɔ azu ne bɛmaa me. Saa bɛdi Akpabɛnwo Ɛvoyia ne azubɔdeɛ ne a, bɛmmamaa bie ka aleɛ kye zolɛ.
26“Ɛvolɛ biala ma mɔɔ bɛkɛlumua bɛkɛde la, bɛva bɛrɛlɛ Ɛdɛnkɛma bɛ Nyamenle ne.
“Bɛmmato boane anzɛɛ abɔnkye ralɛ biala wɔ ɔ nli nyɛfonzule nu bɛdi.”
27Ɛdɛnkɛma zele Mosisi kɛ, “Kɛlɛ edwɛkɛ ɛhye, ɔluakɛ edwɛkɛ ɛhye azo a mebalua me nee wɔ nee Yizilayɛma akyekye ngyekyeleɛ ɛhye a.” 28Mosisi nee Ɛdɛnkɛma dɛnlanle ewiazo nee nɔɔzo toonwo kenle abulanla. Yeanli debie yɛɛ yeanno nzule. Ɔhɛlɛle ngyekyeleɛ edwɛkɛ ne, Mɛla Bulu ne wɔ awolɛ ndɛbandɛba nwiɔ ne azo.
Mosisi vi Saenae Boka ne azo dwu aze
29 #
2 Kɔl 3.7-16
Mɔɔ Mosisi vale awolɛ ndɛbandɛba nwiɔ ne mɔɔ Mɛla Bulu ne wɔ zolɛ la vi Saenae Boka ne azo dwule aze la, ɛnee ɔ nyunlu ɛlɛta nwohyee, ɔboalekɛ ɛnee ɔ nee Nyamenle ɛdendɛ, noko ɛnee Mosisi ɛnze kɛ ɔ nyunlu ɛlɛta. 30Na mɔɔ Aalɔn nee Yizilayɛma kɔsɔɔti nwunle kɛ Mosisi anyunlu ɛlɛta la, bɛzulole kɛ bɛkɛbikye ye. 31Mosisi vɛlɛle bɛ, Aalɔn nee mgbanyima ne mɔ ziale rale ɔ nwo ɛkɛ, na Mosisi nee bɛ dendɛle. 32Nzinlii Yizilayɛma amuala hwenle bikyele ye. Na Mosisi vale mɛla ne mɔɔ Ɛdɛnkɛma vale manle ye wɔ Saenae Boka ne azo la manle bɛ. 33Mɔɔ Mosisi nee bɛ wiele tendɛ la, ɔvale ɛdanlɛ ɔhedale ɔ nyunlu. 34Mekɛ biala mɔɔ Mosisi kɛhɔ Nyianu Ndanlɛ Sua ne anu kɛ ɔ nee Ɛdɛnkɛma kadendɛ la, ɔye ɛdanlɛ ne ɔ nyunlu kɔkpula kɛ ɔkɛvinde la. Saa ɔfinde na ɔlɛka edwɛkɛ mɔɔ Ɛdɛnkɛma zele ye la a, 35Yizilayɛma nwu kɛ Mosisi anyunlu ɛlɛta. Mosisi eza fa ɛdanlɛ ne keda ɔ nyunlu kɔkpula mekɛ mɔɔ ɔkɛhɔ Ɛdɛnkɛma Ndanlɛ Sua ne anu bieko kɛ ɔ nee Ɛdɛnkɛma kadendɛ la.
Currently Selected:
Ade 34: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
