Ade 33
33
Ɛdɛnkɛma se Yizilayɛma ɛvi Saenae Boka
1Ɛdɛnkɛma zele Mosisi kɛ, “Fa menli ne mɔɔ ɛ nee bɛ vi Yigyibiti azɛlɛ zo ɛra la fi ɛke kɔ azɛlɛ ne mɔɔ menganle ndane menvale membɔle Ebileham, Ayezeke, nee Gyekɔbo ɛwɔkɛ kɛ, mebava meamaa bɛ bo zo amra la azo. 2Mebamaa Nyamenle soanvolɛ ali bɛ nyunlu, na meavoa Keenama, Amɔlema, Hɛtema, Pɛlɛzema, Haevaema, yɛɛ Gyibɛsema. 3Bɛhɔ azɛlɛ ne mɔɔ kye aleɛ la azo; na mame, me nee bɛ ɛnrɛhɔ, anrɛɛ menwɔbɔ bɛ bo zo wɔ adenle nu, ɔluakɛ bɛle menli mɔɔ anzo yɛ se a.”
4Mɔɔ menli ne dele amaneɛ ɛtane ɛhye la, bɛlile nyane, bɛanva bɛ anwoneɛ ne mɔ bɛanziezie bɛ nwo bieko. 5Ɔluakɛ ɛnee Ɛdɛnkɛma ɛha ɛhile Mosisi kɛ, “Ka kile Yizilayɛma kɛ, ‘Bɛle menli anzosesebɛma mɔɔ saa me nee bɛ tudu agyakɛ ekyii bɔbɔ a, mebabɔ bɛ bo zo a. Yemɔti bɛyeye bɛ anwoneɛ ne mɔ mɔɔ bɛva bɛziezie bɛ nwo la, amaa meanwu kɛ mesi meayɛ bɛ la.’ ” 6Yemɔti mɔɔ Yizilayɛma ne vile Saenae Boka la bɛyeyele bɛ anwoneɛ ne mɔ kɔsɔɔti.
Ɛdɛnkɛma Ndanlɛ Sua ne
7Saa Yizilayɛma yɛ azokoɛleɛ biala a Mosisi sie Ndanlɛ Sua ne maa ɔ nee azokoɛleɛ ne avinli twe; na ɔvɛlɛle ye Ɛdɛnkɛma Nyianu Ndanlɛ Sua. Awie biala mɔɔ kpondɛ kɛ ɔbiza Ɛdɛnkɛma debie la kɔ Nyianu Ndanlɛ Sua ne mɔɔ wɔ azokoɛleɛ ne kandiba la anu. 8Mekɛ biala mɔɔ Mosisi kɛze kɛ ɔkɔ Ndanlɛ Sua ne anu la, menli ne kɔsɔɔti dwazo gyinlegyinla bɛ ndanlɛ azua ne nlenkɛ ne mɔ anloa nea ye toonwo ɔkɔwolo nu. 9Kɛ Mosisi wolo Ndanlɛ Sua ne anu la, ɛnee amungu mpila ne ɛdwu aze ɛragyinla Ndanlɛ Sua ne anlenkɛ ne anloa, na Ɛdɛnkɛma adendɛ ahile Mosisi wɔ amungu ne anu. 10Saa menli ne mɔ nwu kɛ amungu mpila ne gyi Ndanlɛ Sua ne anlenkɛ ne anloa a, ɛnee bɛ kɔsɔɔti bɛdwazo bɛgyinlegyinla bɛ nlenkɛ ne mɔ anloa bɛlɛsonle. 11Ɛdɛnkɛma luale adenle zɛhae anu dendɛle hilele Mosisi, kɛmɔ sonla si tendɛ kile ɔ gɔnwo ala la. Saa Mosisi sia ba azokoɛleɛ ɛkɛ ne bieko a, ye sonvolɛ kpavolɛ ne, Nɛn ara nrenya Dwɔhyua ɛnvi Ndanlɛ Sua ne anu fee.
Ɛdɛnkɛma bɔ ɛwɔkɛ kɛ ɔ nee ye menli ne balua
12Mosisi hanle hilele Ɛdɛnkɛma kɛ, “Nɔhalɛ, wɔze me kɛ, ‘Di menli ɛhye ati fa bɛ kɔ azɛlɛ zɔhane azo’ noko ahenle mɔɔ baboka me la, ɛtɛkanle. Wɔze me kɛ ɛze me kpalɛ kpalɛ, yɛɛ eza mezɔ ɛ nye. 13Yemɔti mesɛlɛ wɔ, saa mezɔ ɛ nye ɛdeɛ a, ɛnee kile me wɔ ndenle ne mɔ, amaa meazonle wɔ na meazɔ ɛ nye dahuu. Eza kakye kɛ maanle ɛhye le wɔ menli.”
14Ɛdɛnkɛma zele kɛ, “Me nee wɔ bahɔ, yɛɛ mebamaa ɛ nzo nu adwo wɔ.”
15Mosisi buale ye kɛ, “Saa ɛ nee yɛ ɛnrɛhɔ ɛdeɛ a, ɛnee mmamaa yɛfi ɛke. 16Ɔluakɛ, kɛ ɔkɛyɛ na bɛanwu kɛ medame nee wɔ menli ne yɛsɔ ɛ nye ɛ? Wɔ ɛlualɛ mɔɔ ɛ nee yɛ lua la yɛɛ maa menli nwu ngakyile mɔɔ wɔ yɛ nee menli gyɛne gyɛne mɔɔ wɔ aleɛabo la avinli a.”
17Na Ɛdɛnkɛma zele Mosisi kɛ, “Edwɛkɛ kpɔkɛ ko ɛhye mɔɔ wɔha la ati, me nee bɛ bahɔ, ɔluakɛ meze wɔ kpalɛ kpalɛ, yɛɛ wɔzɔ me nye.”
18Mosisi bodole ye kɛ, “Mesɛlɛ wɔ, kile me wɔ anyunlunyia ne.”
19 #
Wulo 9.15
Ɛdɛnkɛma buale ye kɛ, “Mebamaa me wienyi kpole ne ada ɛ nwo zo, na meado me duma ‘Ɛdɛnkɛma’ ne kpaanu meahile wɔ. Mebayɛ menli mɔɔ ɔwɔ kɛ meyɛ bɛ boɛ la boɛ, na meaze menli mɔɔ ɔwɔ kɛ mese bɛ anwunvɔne la anwunvɔne. 20Noko akee ɛnrɛnwu me nyunlu, ɔluakɛ awie biala ɛnrɛnwu me nyunlu na ɔnrɛdɛnla ngoane nu. 21Nea, bodane bie wɔ me foa ko ɛke mɔɔ ɛbagyinla zolɛ a. 22Mekɛ mɔɔ me anyunlunyia ne kɛze kɛ ɔpɛ nu la, mebava wɔ meawula bodane ne kuma bie anu, meava me sa meaheda zolɛ kɔkpula kɛ menwɔpɛ nu menwɔze la. 23Akee mebaye me sa, ɛbanwu me kɔme anzi, na me nyunlu ɛdeɛ, ɛnrɛnwu ye.”
Currently Selected:
Ade 33: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
