Ade 32
32
Ezukoa nvutuke ɛnlankɛ nyinli ne
(Mɛla 9.6-29)
1 #
Gyi 7.40
Mɔɔ menli ne nwunle kɛ Mosisi akee ɛhyɛ somaa wɔ boka ne azo na ɔmba la, bɛ muala bɛhɔle Aalɔn anwo ɛkɛ bɛhɔzele ye kɛ, “Maa ɔyɛ ndɛndɛ maa yɛ nyamenle maa ɔli yɛ nyunlu, ɔluakɛ Mosisi ɛhye, mɔɔ yemɔ a le sonla mɔɔ yele yɛ vile Yigyibiti azɛlɛ zo la, yɛnze mɔɔ kɛkala ɛzi ɔ nwo zo a.”
2Na Aalɔn zele bɛ kɛ, “Bɛyeye ezukoa nvutuke asomadeɛ mɔɔ wɔ bɛ ye mɔ, bɛ mra mrenya, nee bɛ mra mraalɛ ne mɔ anzo nu la bɛrɛlɛ me.” 3Yemɔti menli ne amuala yeyele ezukoa nvutuke asomadeɛ mɔɔ wɔ bɛ nzo nu la manle Aalɔn. 4Ɔliele nvutuke asomadeɛ ne mɔ wɔ bɛdabɛ mumua ne bɛ sa nu na ɔholole ɔguale ɛnlankɛ nyinli ananze ɔmanle bɛ.
Menli ne hanle kɛ, “O Yizilayɛ, yɛ nyamenle ne mɔɔ yele yɛ vile Yigyibiti la, yemɔ ɛne!”
5Mɔɔ Aalɔn nwunle ɛhye la, ɔzile azukponle wɔ ɛnlankɛ nyinli ne anyunlu ɛkɛ, na ɔbɔle ye nolo ɔhanle kɛ, “Ɛhyema yɛbali ɛvoyia kpole yeawula Ɛdɛnkɛma anyunlunyia.” 6Aleɛ hyenle nwonlomɔ mangyee ne la bɛbɔle ɛyelalɛ azu na bɛvale anzonudwolɛ azubɔdeɛ bɛrale. Akee menli ne dɛnlanle aze lile nlonle na bɛzile agole.
7Na Ɛdɛnkɛma zele Mosisi kɛ, “Maa ɔyɛ ndɛndɛ tolo kɔ, ɔluakɛ wɔ menli ne mɔɔ ɛyele bɛ ɛvile Yigyibiti azɛlɛ zo la ɛyɛ ɛtane na bɛkpo me. 8Adenle ne mɔɔ mengilele bɛ kɛ bɛlua nu la, bɛanlua nuhua; bɛgua ɛnlankɛ nyinli ananze na bɛzonle ye, bɛbɔ azu bɛmaa ye na bɛha kɛ, ‘O Yizilayɛ, yɛ nyamenle ne mɔɔ yele yɛ vile Yigyibiti azɛlɛ zo la, yemɔ ɛne!’ 9Menwu kɛ menli ne le dapele, 10yemɔti gyakyi me maa menkpokpo me ɛya ne mengua bɛ nwo zo, membɔ bɛ bo zo bɔkɔɔ. Na wɔmɔ, mebayɛ wɔ maanle kpole.”
11Na Mosisi bodole Ɛdɛnkɛma, ye Nyamenle ne kɛ, “O Ɛdɛnkɛma, duzu ati a wɔva wɔ menli mɔɔ ɛdawɔ wɔva tumi nee anwosesebɛ wɔye bɛ wɔvi Yigyibiti azɛlɛ zo la anwo ɛya kpole zɛhae a? Duzu ati a ɔwɔ kɛ Yigyibitima ka ye kɛ, ɛvale adwenle ɛtane a ɛyele bɛ ɛvile Yigyibiti a, kɛ ɛ nee bɛ ba wɔarahu bɛ wɔ awoka ye azo na wɔabɔ bɛ bo zo wɔ azɛlɛ ye azo a? 12Gua wɔ edwɛne azule nu; mmakakyi wɔ adwenle ɛmaa munzule to bɛ. 13Kakye wɔ sonvolɛma, Ebileham, Ayezeke, yɛɛ Gyekɔbo mɔɔ ɛdawɔ mumua ne ɛhanle ndane ɛbɔle bɛ ɛwɔkɛ kɛ, ‘Mebamaa bɛ bo zo amra azo kɛ anwomanyunlu nwɔlɔra, azɛlɛ ɛhye amuala mɔɔ meva mebɔ ɛwɔkɛ la, mebava meamaa bɛ bo zo amra, na ɔbayɛ bɛ agyadeɛ wɔ melɛ mɔɔ ɛnlɛ awieleɛ’ la.” 14Yemɔti Ɛdɛnkɛma hakyile ye adwenle. Yeammaa munzule ne mɔɔ ɔdwenlenle nwolɛ la amba menli ne anwo zo.
15Akee Mosisi vale awolɛ ndɛbandɛba nwiɔ ne mɔɔ bɛhɛlɛ mɛla ne mɔ wɔ bɛ nyunlu nee bɛ nzi la vi boka ne azo tolole rale. 16Nyamenle mumua ne a zele awolɛ ndɛbandɛba ne mɔ a, yɛɛ ɔdaye mumua ne a ɔhɛlɛle mɛla ne mɔ wɔ zolɛ a.
17Mɔɔ Dwɔhyua dele menli ne mɔ ane kɛ bɛlɛteɛdea nuhua la, ɔhanle ɔhilele Mosisi kɛ, “Mete konle nganeɛ wɔ azokoɛleɛ lɔ.”
18Na Mosisi hanle kɛ, “Ɛdeanlɛ ne ɛnle ɛdeanlɛ mɔɔ kile konimlilɛ yɛɛ ɔngile kɛ bɛli bɛ nwo zo konim. Mete edwɛndolɛ ala.”
19Mɔɔ Mosisi bikyele azokoɛleɛ ne na ɔnwunle ɛnlankɛ nyinli ananze ne nee nwolɛ agolezilɛ ne la, ye ahonle futule kpole kpalɛ. Ye ɛya ne bole ɔ nwo zo manle ɔvuandinle awolɛ ndɛbandɛba ne mɔ mɔɔ Mɛla Bulu ne wɔ zolɛ la ɔguale boka ne abo aze ɔbubule bɛ. 20Ɔvale ɛnlankɛ ananze ne mɔɔ bɛyɛ la, ɔvale senle ɔholole, ɔdinle ɔmanle ɔyɛle motomoto kɛ munlutu, na ɔvale ɔguale nzule ne mɔɔ bɛno la anu ɔmanle Yizilayɛma nlonle. 21Mosisi bizale Aalɔn kɛ, “Na duzu ɛweɛleɛ a menli ne vale yɛle wɔ mɔɔ yemɔti wɔmaa bɛyɛ ɛtane kpole ɛhye a?”
22Na Aalɔn zele ye kɛ, “Me menle, mmafa me nwo ɛya. Ɛdawɔ ɛze kɛ ɛtane ala a wɔ menli ne adwenle nu a. 23Bɛhanle bɛhilele me kɛ, ‘Maa yɛ nyamenle maa ɔli yɛ nyunlu, ɔluakɛ Mosisi ne mɔɔ yele yɛ vile Yigyibiti azɛlɛ zo la, yɛnze mɔɔ ɛzi ɔ nwo zo a.’ 24Na menganle mengilele bɛ kɛ, ‘Awie biala ɛva ye nvutuke anwoneɛ biala mɔɔ ɔlɛ la ɔmaa me.’ Yemɔti bɛvale bɛmanle me; menvuandinle menguale senle nu na ɛnlankɛ ɛhye a vindele nu a.”
25Na Mosisi nwunle kɛ menli ne ɛbɔ atondo, ɔluakɛ Aalɔn ɛmaa bɛbɔ atondo na nyiane akee ɛlɛku bɛ wɔ bɛ kpɔvolɛma anyunlu. 26Yemɔti ɔgyinlanle azokoɛleɛ ne anuhɔlɛ kpole ne anloa na ɔdeanle nu ɔhanle kɛ, “Awie biala mɔɔ wɔ Ɛdɛnkɛma afoa la ɛrɛla.” Na Livaema ne kɔsɔɔti pianle bɛ nwo hɔle ye afoa. 27Na ɔhanle ɔhilele bɛ kɛ, “Kɛ Yizilayɛ Ɛdɛnkɛma Nyamenle ne se la ɛne, ‘Awie biala ɛva ye dadeɛ ne ɛhɔ azokoɛleɛ ye ɛleka biala, ɔvi anuhɔlɛ ɔhɔ anuhɔlɛ na ɔhu awie biala, ɔ diema, ɔ gɔnwo, yɛɛ menli mɔɔ ɔ nee bɛ zua la.’ ” 28Livaema ne yɛle mɔɔ Mosisi hanle la, na bɛhunle menli kɛyɛ apenle nsa kenle ko ne. 29Na Mosisi hanle kɛ, “Ɛnɛ, awie biala ɛva ɔ ra nrenya nee ɔ diema mogya ɛnlua ɔ nwo ɛwula ɔ nwo sɛlɛvolɛ wɔ Ɛdɛnkɛma ɛzonlenlɛ nu, amaa Ɛdɛnkɛma awola ye nyilalɛ agua bɛ nwo zo.”
30Aleɛ hyenle la Mosisi zele menli ne kɛ, “Bɛyɛ ɛtane kpole. Yemɔti mesia meahɔ Ɛdɛnkɛma anwo lɔ wɔ boka ne azo. Wɔannea a mebahola meali bɛ ɛtane ne mɔ anwo mgbɔdalɛ.” 31Yemɔti Mosisi ziale hɔle Ɛdɛnkɛma ɛkɛ na ɔhanle kɛ, “Nɔhalɛ, menli ne ɛyɛ ɛtane kpole kpalɛ. Bɛdabɛ bɛva ezukoa nvutuke bɛyɛ bɛ nyamenle bɛzonle ye. 32#Yek 3.5 Mebodo wɔ, fa bɛ ɛtane ne kyɛ bɛ. Saa ɛfa ɛkyɛ bɛ na ɔnrɛyɛ boɛ a, ɛnee pɛ me duma nu wɔ buluku ne mɔɔ ɛhɛlɛle ye nu la anu.”
33Ɛdɛnkɛma zele Mosisi kɛ, “Ahenle ne mɔɔ ɛyɛ ɛtane ɛtia me la, yemɔ yɛɛ mebaye ye duma meavi buluku ne anu a. 34Na kɛkala, sia kɔva menli ne kɔ ɛleka ne mɔɔ mehile wɔ la. Me soanvolɛ bali ɛ nyunlu. Noko akee kenle mɔɔ mebara la, mebadea menli ne mɔ wɔ bɛ ɛtane ne ati.”
35Na Ɛdɛnkɛma vale ewule nzane deanle menli ne, ɔboalekɛ bɛhyele Aalɔn mialera nu bɛmanle ɔyɛle ɛnlankɛ nyinli ananze ne.
Currently Selected:
Ade 32: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
