Ade 31
31
Ɛdɛnkɛma Ndanlɛ Sua ne dwinvolɛma
(Ade 35.30—36.1)
1Ɛdɛnkɛma zele Mosisi kɛ, 2“Nea, meye Yulae ara nrenya Bɛzalii, mɔɔ ɔ nlenya a le Huuli mɔɔ vi Dwuda abusua ekpunli ne anu la, 3na meva Nyamenle Sunsum ne meyi ye tɛkɛɛ. Memaa ye nrɛlɛbɛ nee ndelebɛbo, adwenle nee adwinli ngakyile muala anwo adwenle, 4mɔɔ ɔkola ɔfa ezukoa nvutuke, dwɛtɛ fufule, yɛɛ kɔbele ɔdi adwinli, 5ɔsiezie awolɛ nwo, ɔse mbaka, na ɔdi adwinli ngakyile biala a. 6Eza meye Ahesamake ara nrenya Oholeabe noko mɔɔ vi Dan abusua ekpunli ne anu la kɛ ɔ nee ye ɛyɛ gyima. Eza memaa dwinvolɛma gyɛne gyɛne adwenle kpole, amaa bɛahola debie biala mɔɔ meze wɔ kɛ ɛyɛ la yɛ. 7Ɛdɛnkɛma Ndanlɛ Sua ne, Ngyekyeleɛ Ɛlɛka ne nee anwunvɔnezelɛ ebia ne mɔɔ dua zolɛ la, yɛɛ Ndanlɛ Sua ne anu ɛziezielɛ ninyɛne kɔsɔɔti, 8ɛkponle ne nee nwolɛ ninyɛne kɔsɔɔti, ɛyɛlɛ ɛyelalɛ azukponle ne, 9ɛyelalɛ azubɔlɛ azukponle ne nee nwolɛ ninyɛne, kyɛnze ne mɔɔ bɛwowo bɛ sa nee bɛ gyakɛ anwo nuhua nee ɔ bo ne, 10Aalɔn nee ɔ mra mrenya ne mɔ sɛlɛvolɛ adɛladeɛ ngɛnlɛma ne mɔ mɔɔ bɛbawula bɛazonle la, 11ɛkpokpalɛ nwole ne, yɛɛ Ɛleka Nwuanzanwuanza ne ɛyɛlɛ evuanlɛ ne; ninyɛne ɛhye mɔ kɔsɔɔti, ɔwɔ kɛ bɛyɛ bɛ kɛ mɔɔ meze wɔ la.”
Ɛnwomenlelielɛ Kenle ne
12Ɛdɛnkɛma zele Mosisi kɛ, 13“Ka kile Yizilayɛma kɛ: Bɛzie me Ɛnwomenlelielɛ Kenle ne, ɔboalekɛ ɔle sɛkɛlɛneɛ ɔmaa bɛ nee medame wɔ mekɛ mɔɔ bara la amuala kɛ medame, Ɛdɛnkɛma a mede bɛ nwo meyɛ bɛ me menli a. 14Bɛzie Ɛnwomenlelielɛ Kenle ne, ɔboalekɛ ɔle nwuanzanwuanza. Awie biala mɔɔ anzie Kenle ne la, ɔwɔ kɛ bɛku ye. Awie biala mɔɔ kɛyɛ gyima wɔ nu la, ɔwɔ kɛ bɛye ye bɛfi ye menli avinli. 15Kenle nsia yɛɛ ɔwɔ kɛ bɛfa bɛyɛ gyima a, na kenle ne mɔɔ tɔ zolɛ nsuu ne la le Ɛnwomenlelielɛ Kenle, bɛdu bɛzie ɛkɛ bɛmaa me. Awie biala mɔɔ kɛyɛ gyima kenle ko ne la, ɔwɔ kɛ bɛku ye. 16Ɔwɔ kɛ Yizilayɛma sie kenle ɛhye mekɛ biala, bɛkile kɛ ɔle ngyekyeleɛ mɔɔ bɛntulu ye ɛlɛ la anwo sɛkɛlɛneɛ. 17Ɔle sɛkɛlɛneɛ mɔɔ ɛnlɛ awieleɛ mɔɔ wɔ Yizilayɛma nee medame yɛ avinli a, ɔboalekɛ medame, Ɛdɛnkɛma, menvale kenle nsia membɔle anwuma nee aze, ye kenle nsuu ne azo, mengyakyile gyima menliele me ɛnwomenle.”
18Mɔɔ Nyamenle wiele tendɛ kile Mosisi wɔ Saenae Boka ne azo la, ɔvale awolɛ ndɛbandɛba nwiɔ ne mɔɔ Nyamenle mumua ne ɛva ɔ sa ɛrɛlɛsɛka ɛhɛlɛ mɛla ne mɔ zolɛ la ɔmanle Mosisi.
Currently Selected:
Ade 31: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
