Ade 30
30
Azukponle ne mɔɔ bɛyela ɛyɛlɛ zo la
(Ade 37.25-28)
1“Fa akasea ndaboa bobɔ azukponle na woayela ɛyɛlɛ zo. 2Maa ye tɛbanu ne mɔ amuala ɛzɛ, ye tendenle ɛyɛ asɛɛ mita foa ko, ye tɛtɛlɛ ɛyɛ asɛɛ mita foa ko, na ye anwumahɔlɛ ɛyɛ asɛɛ mita ko. Yɛ debie kpokpɔkoo kɛ mɛne la wɔ ɔ bati nna ne azo maa bɛ nee ye ɛyɛ debie munli ko. 3Kolo ezukoa nvutuke tagyee gua zolɛ, ye tɛbanu nee ye mɛne ne mɔ anwo na fa ezukoa nvutuke ne bie to ɔ nloa kɛba bɛnra yia. 4Yɛ ezukoa nvutuke ngɛba nwiɔ sosɔ ezukoa nvutuke kɛba ne mɔɔ la ɔ nloa la abo wɔ ye tɛbanu nwiɔ ne. Nuhua yɛɛ saa bɛsoa azukponle ne a bɛbava mbaka ne mɔ bɛawulowula a. 5Ɛbava akasea ndaboa a wɔaze mbaka ne mɔ a na wɔaholo ezukoa nvutuke wɔagua nwolɛ. 6Sie azukponle ɛhye wɔ mgbɛnu ɛdanlɛ ne mɔɔ wa anwunvɔnezelɛ ebia ne mɔɔ dua Ngyekyeleɛ Ɛlɛka ne azo la akunlu. Ɛkɛ ne yɛɛ mebayia wɔ a. 7Saa nwonlomɔ biala Aalɔn ba kɛ ɔbayɛ ahɛnlaneɛ ne mɔ boɛ a, ɔwɔ kɛ ɔkpu ɛyɛlɛ evuanlɛ wɔ zolɛ. 8Zɔhane ala yɛɛ saa nɔsolɛ ɔsosɔ ahɛnlaneɛ ne mɔ a, ɔwɔ kɛ ɔyɛ a. Ɔwɔ kɛ awolɛndoazo kɔsɔɔti kpu ɛyɛlɛ maa Ɛdɛnkɛma. 9Mmayela ɛyɛlɛ biala mɔɔ ɛnle nwuanzanwuanza la wɔ azukponle ɛhye azo, mmafa nane azubɔdeɛ anzɛɛ ma azubɔdeɛ ɛbɔ azu na ɛye ɛdɛne wɔ azukponle ɛhye azo. 10Ɛvolɛ biala ɔwɔ kɛ Aalɔn fa nane ne mɔɔ bɛkɛva bɛkɛbɔ ɛtane nwo azu ne la mogya ne bie gua azukponle ne mɛne ne azo ɔyɛ mgbɔdalɛ nzɛlɛlɛ. Ɔwɔ kɛ awolɛndoazo kɔsɔɔti yɛ ɛhye, ɔluakɛ ɔle nwuanzanwuanza kpalɛ ɔmaa medame, Ɛdɛnkɛma.”
Ɛdɛnkɛma Ndanlɛ Sua ne anwo adwule
11Ɛdɛnkɛma zele Mosisi kɛ, 12“Saa ɛtia Yizilayɛma a, ɔwɔ kɛ awie biala tua ɔ nwo ɛkpɔnenlɛ adwule maa me, amaa munzule biala ando ye. 13#Ade 38.25-26 Awie biala mɔɔ bɛkɛdia ye la, ɔwɔ kɛ ɔtua ezukoa bolɛ mɔɔ bɛkɛpɛ la, kɛmɔ bɛ ezukoa awolɛ ne mɔ si to kɔ la. Ezukoa ɛhye le azubɔdeɛ maa medame Ɛdɛnkɛma. 14Awie biala mɔɔ ɛli ɛvolɛ abulanwiɔ mɔɔ kɔ, mɔɔ bɛkɛdia ye la badua ɛhye yeava yeayɛ azubɔdeɛ yeamaa medame Ɛdɛnkɛma. 15Saa bɛtua ezukoa ɛhye bɛamaa bɛayɛ bɛ ti mgbɔdalɛ nzɛlɛlɛ a, sukoavolɛ ɛndua ɛmmaa ɔmbo zolɛ yɛɛ ehyianli ɛndua ekyi. 16Die mgbɔdalɛ ezukoa ɛhye wɔ Yizilayɛma lɔ na fa bu Ɛdɛnkɛma Ndanlɛ Sua ne anwo amaamuo, amaa Ɛdɛnkɛma ahakye bɛ dahuu wɔ bɛ mgbɔdalɛ nzɛlɛlɛ ne ati.”
Kɔbele kyɛnze ne
17Ɛdɛnkɛma zele Mosisi kɛ, 18#Ade 38.8 “Fa kɔbele yɛ kyɛnze na fa kɔbele yɛ ɔ bo ne mɔɔ bɛsie ye zolɛ la. Ɛbazie ye wɔ Ɛdɛnkɛma Ndanlɛ Sua ne nee azukponle ne avinli, na wɔagua nzule nu. 19Aalɔn nee ɔ mra mrenya ne mɔ bava awowo bɛ sa nee bɛ gyakɛ anwo 20kolaa na bɛahɔ Ndanlɛ Sua ne anu anzɛɛ bɛahɔ azukponle ne anwo kɛ bɛkayela aleɛ azubɔdeɛ bɛamaa Ɛdɛnkɛma, anrɛɛ bɛkɛwu. 21Ɔwɔ kɛ bɛwowo bɛ sa nee bɛ gyakɛ anwo, anrɛɛ bɛkɛwu. Ɛhye bayɛ mɛla ala ɛkɛ amaa bɛ dahuu, ɔdaye nee ɔ bo zo amra nee bɛ awolɛndoazo kɔsɔɔti.”
Ɛkpokpalɛ Nwole ne
22 #
Ade 37.29
Ɛdɛnkɛma zele Mosisi kɛ, 23“Fa ninyɛne evuanlɛ, alufuanlɛ nzule kilo nsia, senamɔn mɔɔ bɔ evuanlɛ la kilo nsa, anatele baka evuanlɛ kilo nsa, 24nee kasea kilo nsia (suzu bɛ, kɛmɔ bɛ nzuzulɛ ne si de la). Fa ɔlivi nwole litili nna boka nwo, 25kpoto maa ɔbɔ evuanlɛ fa yɛ ɛkpokpalɛ nwole nwuanzanwuanza. 26Fa kpokpa Nyianu Ndanlɛ Sua ne, Ngyekyeleɛ Ɛlɛka ne, 27ɛkponle ne nee nwolɛ ahyɛnze ne mɔ, kɛnlaneɛ baka ne nee nwolɛ ninyɛne ne mɔ, ɛyɛlɛ ɛyelalɛ azukponle ne nee nwolɛ ninyɛne ne amuala, 28azukponle ne mɔɔ bɛfa bɛyela azubɔdeɛ ne mɔ nee nwolɛ ninyɛne ne amuala, yɛɛ kyɛnze ne mɔɔ bɛfa nuhua nzule bɛwowo bɛ sa nee bɛ gyakɛ anwo la nee ɔ bo ne. 29Ɔwɔ kɛ ɛtu bɛ ɛsie ahane ɛmaa me, amaa bɛayɛ nwuanzanwuanza. Debie biala mɔɔ anwo kɛha bɛ la bayɛ nwuanzanwuanza. 30Kpokpa Aalɔn nee ɔ mra mrenya ne mɔ nwole na tu bɛ sie ɛkɛ maa me maa bɛzonle me kɛ bɛle me sɛlɛvolɛma. 31Akee ɛbaha wɔahile Yizilayɛma kɛ, ‘Ɛhye bayɛ me ɛkpokpalɛ nwole nwuanzanwuanza wɔ awolɛndoazo kɔsɔɔti mɔɔ bara la. 32Bɛmmafa bɛkpokpa awie gyɛne biala, yɛɛ ninyɛne mɔɔ bɛvale bɛyɛle nwole ɛhye la, bɛmmafa bɛyɛ nwole gyɛne biala. Ɔle nwuanzanwuanza, yɛɛ ɔwɔ kɛ bɛmaa ɔsonle bolɛ kɛ ɔle nwuanzanwuanza. 33Awie biala mɔɔ kɛyɛ ye ko ne ala bie, anzɛɛ awie biala mɔɔ kɛva bie kɛkpokpa awie gyɛne biala la, bɛye ye bɛvi ye menli ne avinli.’ ”
Ɛyɛlɛ ne
34Ɛdɛnkɛma zele Mosisi kɛ, “Fa ninyɛne evuanlɛ ɛhye mɔ: setakiti, ɔneka, galebanɛm, yɛɛ ɛyɛlɛ evuanlɛ mɔɔ alufuanlɛ wɔ nu la. Suzu bɛ pɛpɛ, 35na fa bɛ bɔ nu, kɛmɔ bɛyɛ nwole evuanlɛ la yɛ ɛyɛlɛ. Fa ngyenle gua nu maa ɔ nye ɛde na ɔyɛ nwuanzanwuanza. 36Ti bie motomoto na fa bie sie Ngyekyeleɛ Ɛlɛka ne mɔɔ gyi Ndanlɛ Sua ne anu la anyunlu, ɛleka mɔɔ mebayia wɔ la. Nwu ye kɛ ɛyɛlɛ ɛhye le nwuanzanwuanza. 37Ninyɛne mɔɔ ɛbava wɔayɛ ɛyɛlɛ ɛhye la, bɛmmafa bie bɛyɛ ɛyɛlɛ ne bie bɛdabɛ bɛfa. Ɔwɔ kɛ bɛnwu kɛ ɔle debie nwuanzanwuanza mɔɔ bɛdu bɛzie ahane bɛmaa medame Ɛdɛnkɛma a. 38Awie biala mɔɔ kɛyɛ ye ko ne ala bie kɛyɛ ɔ nwo la, bɛye ye bɛvi ye menli ne avinli.”
Currently Selected:
Ade 30: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
