Ade 26
26
Ɛdɛnkɛma Ɛzonlenlɛ Ndanlɛ Sua ne
(Ade 36.8-38)
1“Fa mgbɛnu ndanlɛ azinli bulu mɔɔ bɛva lenen nyɛma kɛnlɛma, nee mboane enrinli buluwu nee kɔkɔlɛ afonla, nee mboane enrinli kɔkɔlɛ nyɛma bɛnwo, na bɛnwo abɔdeɛ mɔɔ lɛ ndɛbalɛ la bɛgua nu la si Ɛzonlenlɛ Ndanlɛ Sua ne. 2Maa bɛ kɔsɔɔti bɛ mgbole ɛzɛ, ko tendenle ɛyɛ mita bulu nee nwiɔ na ye tɛtɛlɛ ɛyɛ mita nwiɔ. 3Fa nuhua nnu bɔ nwolɛ, na bɔ nnu ne noko nwolɛ. 4Akee fa ndanlɛ buluwu bobɔ bɛ ahotosalɛ kendɛhenda alumua ɛdeɛ nnu ne anloa, na eza yɛ nnu ko ne noko zɔhane ala. 5Fa ahotosalɛ abulanlu kendɛhenda alumua ɛdeɛ ne anloa, na eza fa abulanlu kendɛhenda mɔɔ tɔ zolɛ nwiɔ ne noko la anloa; kendɛhenda bɛ maa alumua ɛdanlɛ ɛdeɛ ne ahotosalɛ abulanlu ne nee mɔɔ tɔ zolɛ nwiɔ ne la ɛdeɛ ne mɔ ɛbɔ zo fɔɔnwo. 6Fa ezukoa nvutuke yɛ nzosɔnu abulanlu fa sosɔ ahotosalɛ ne mɔ maa ndanlɛ nwiɔ ne ɛyia zolɛ.
7“Fa mgbɛnu ndanlɛ mɔɔ bɛva mbɔnkye enrinli bɛnwo la azinli bulu nee ko na bobɔ bɛ nwo na wɔava wɔaheda ndanlɛ sua ne azo. 8Maa bɛ kɔsɔɔti bɛ mgbole ɛzɛ, ko tendenle ɛyɛ mita bulu nee nsa na ye tɛtɛlɛ ɛyɛ mita nwiɔ. 9Fa nnu bɔ nwolɛ, na fa nsia ne noko bɔ nwolɛ, maa bɛyɛ mumua nwiɔ. Bu mɔɔ tɔ zolɛ nsia ne la anu na maa ɔgua Ndanlɛ Sua ne anyunlu. 10Bɔ ndanlɛ azinli ahotosalɛ abulanlu kendɛhenda ko anloa, na eza bɔ abulanlu kendɛhenda mɔɔ tɔ zolɛ nwiɔ ne la anloa. 11Fa kɔbele yɛ nzosɔnu abulanlu wulowula ahotosalɛ ne mɔ anu bɔ ndanlɛ ne mɔ nwo maa bɛyɛ tɛtɛlɛ ko mɔɔ keda Ndanlɛ Sua ne azo la. 12Maa foa ko ne mɔɔ ɛha la ɛhenda Ndanlɛ Sua ne anzi. 13Maa kɛyɛ mita foa ko ɛhendɛhenda Ndanlɛ Sua ne tɛbanu nee ye tɛbanu.
14“Akee kpomgba mboane nyinli nwoma maa bɛwula ye ayile kɔkɔlɛ, na fa mbɔnkye nwoma kɛnlɛma noko kpomgba ko na fa keda Ndanlɛ Sua ne findezo ne azo.
15“Fa akasea mbaka nvonvɔɔnwo bobɔ Ndanlɛ Sua ne felɛmo ne mɔ. 16Ɔwɔ kɛ felɛmo ko tendenle yɛ mita nna na ye tɛtɛlɛ yɛ mita foa ko nee ekyi. 17Felɛmo ko biala banyia ɔ sa nwiɔ, amaa bɛfa bɛ bɛmetɛmeta nwo bɛbobɔ nu a yeayɛ boɛ. Zɔhane ala yɛɛ bɛyɛ Ndanlɛ Sua ne felɛmo ne mɔ a. 18Gyinlegyinla felɛmo abulanwiɔ nyiakɛ, 19fa dwɛtɛ fufule yɛ adiabo abulanla na fa felɛmo ne mɔ siezie zolɛ, felɛmo ko biala ɛdeɛ nwiɔ, na maa bɛsosɔ felɛmo ne mɔ asa ne mɔ. 20Gyinlegyinla felɛmo abulanwiɔ noko sɔlɔ, 21na fa siezie adiabo abulanla azo, felɛmo ko biala ɛdeɛ nwiɔ. 22Gyinlegyinla felɛmo nsia wɔ Ndanlɛ Sua ne anzi adɔleɛ, 23na maa mgbɛnezo ne mɔ biala felɛmo nwiɔ. 24Mgbɛnezo felɛmo ne mɔ, ɔwɔ kɛ bɛbɔ ye bɛ bo bɛbɔ bɛ nwolɛ, bɛkyekye toonwo ɔkɔdwu bɛ anwuma. Mgbɛnezo felɛmo nwiɔ ne, kɛ ɔwɔ kɛ bɛyɛ bɛ la ɛne. 25Yemɔti felɛmo ne mɔ bayɛ mɔtwɛ yɛɛ bɛ bo dwɛtɛ fufule adiabo bulu nee nsia, ko biala ɛdeɛ nwiɔ.
26“Fa akasea mbaka yɛ meɛbeanu bulu nee nnu, Ndanlɛ Sua ne tɛbanu ko ɛdeɛ nnu, 27tɛbanu bieko ɛdeɛ nnu, yɛɛ ɔ nzi mɔɔ di kɔ adɔleɛ la ɛdeɛ nnu. 28Meanu taboa ne mɔɔ zɔ sua ne felɛmo ne mɔ avinli la ɔwɔ kɛ fi Ndanlɛ Sua ne ati ko kɔkpula ɔ ti ko ne. 29Fa ezukoa nvutuke fɔle felɛmo ne mɔ anwo na fa ezukoa nvutuke ngɛba sosɔ bɛ maa bɛsosɔ meɛbeanu mbaka ne mɔ anu. Fa ezukoa nvutuke fɔle meɛbeanu mbaka ne mɔ anwo. 30Si Ndanlɛ Sua ne kɛ mɔɔ bɛhile wɔ wɔ boka ne azo la.
31“Fa lenen ɛdanlɛ kɛnlɛma mɔɔ bɛva mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo la kpomgba mgbɛnu ɛdanlɛ. Maa bɛnwo abɔdeɛ mɔɔ lɛ ndɛbalɛ la bɛgua nuhua. 32Kenda ye wɔ akasea mbaka nna mɔɔ bɛva ezukoa nvutuke bɛfɔle nwo na bɛva ezukoa nvutuke nzosɔnu bɛsosɔ bɛ, na bɛziezie bɛ dwɛtɛ fufule adiabo nna zo la azo. 33Fa nzosɔnu ne mɔ sosɔ mgbɛnu ɛdanlɛ ne ngɛba ne mɔ mɔɔ dedɛ Ndanlɛ Sua ne ati zo ɛdeɛ ne mɔ anu la, na fa Ngyekyeleɛ Ɛlɛka ne mɔɔ awolɛ ndɛbandɛba nwiɔ ne gua nuhua la sie mgbɛnu ɛdanlɛ ne anzi. Ɛdanlɛ ne bahyɛ sua ne anu nwiɔ, yeapɛ Ɛleka Nwuanzanwuanza ne yeavi Nwuanzanwuanza Nu Nwuanzaanwu Ɛleka ne anwo. 34Fa Ngyekyeleɛ Ɛlɛka ne ati ne tua zolɛ wɔ Nwuanzanwuanza Nu Nwuanzaanwu Ɛleka ne. 35Akee fa ɛkponle ne sie Ndanlɛ Sua ne sɔlɔ na fa kɛnlaneɛ baka ne sie nyiakɛ maa ɔ nee ɛkponle ne bɛ nye ɛbɔ zo wɔ Nwuanzanwuanza Nu Nwuanzaanwu Ɛleka ne anyunlu.
36“Kpomgba lenen mgbɛnu ɛdanlɛ mɔɔ anye te, nee ɛdanlɛ kɛnlɛma mɔɔ bɛva mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo, na bɛnwo nuhua la kenda Ndanlɛ Sua ne anlenkɛ ne anu. 37Se akasea mbaka nnu, fa ezukoa nvutuke fɔle nwo, fa ezukoa nvutuke nzosɔnu sosɔ ɛdanlɛ ne; yɛ kɔbele adiabo na fa mbaka ne mɔ siezie zolɛ.
Currently Selected:
Ade 26: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
