Ade 27
27
Azukponle ne
(Ade 38.1-7)
1“Fa akasea ndaboa bobɔ azukponle. Ɔwɔ kɛ ye tɛbanu nna ne mɔ amuala sɛ. Ɔwɔ kɛ ye tendenle yɛ mita nwiɔ nee ekyi, ye tɛtɛlɛ yɛ mita nwiɔ nee ekyi, na ye anwumahɔlɛ yɛ mita ko nee ekyi. 2Yɛ debie kpokpɔkoo kɛ mɛne la wɔ ɔ bati nna ne mɔ azo; maa bɛ nee azukponle ne ɛyɛ debie ko. Akee kolo kɔbele gua nwolɛ. 3Yɛ nwolɛ mbuakɛ na bɛava nzonle bɛagua nu. Eza yɛ azofi nee ahyɛnze nee faka nee senlevalɛ ahyɛnze; fa kɔbele a yɛ ninyɛne ɛhye mɔ kɔsɔɔti a. 4Fa kɔbele yɛ kɛlakɛlɛ na fa kɔbele ngɛba nna sosɔ ye mgbɛnezo nna ne. 5Fa kɛlakɛlɛ ne to azukponle ne anloa kɛba ne abo maa ɔfolo nuhua ɔhɔdwu ɛkponle ne avinli. 6Se akasea mbaka mɔɔ bɛfa bɛsoa azukponle ne la, fa kɔbele fɔle nwolɛ, 7na fa wulowula azukponle ne tɛbanu nwiɔ ne ngɛba ne mɔ anu na mekɛ biala bɛava bɛazoa. 8Fa ndaboa bobɔ azukponle ne na gyakyi ɔ kunlu ne tokule, kɛmɔ meva mehile wɔ wɔ boka ne azo la.
9“Kɛ ɛbazi wɔalie Ndanlɛ Sua ne anwo bane ne la ɛne: fa ndanlɛ mɔɔ bɛva lenen nyɛma kɛnlɛma bɛnwo na ko tendenle le mita abulanla nee nna la wowa ye nyiakɛ. 10Ɔwɔ kɛ bɛ mbaka ne mɔ yɛ abulanwiɔ, bɛ adiabo ne mɔ mɔɔ bɛva kɔbele bɛyɛ la yɛ abulanwiɔ, na fa dwɛtɛ fufule yɛ nzosɔnu nee mɛkaleɛ ne mɔ. 11Kɛ bɛbazi bɛalie nyiakɛ afoa nu bane ne la, zɔhane ala yɛɛ ɔwɔ kɛ bɛdie sɔlɔ afoa nu ɛdeɛ ne a. 12Wɔ ye adɔleɛ afoa nu, ɔwɔ kɛ bɛkendɛhenda ndanlɛ mɔɔ ko tendenle le mita abulanwiɔ nee nwiɔ la, bɛ mbaka bulu yɛɛ bɛ adiabo bulu. 13Wɔ ye aduduleɛ afoa nu, ɛleka mɔɔ anlenkɛ ne la la, ɔwɔ kɛ alie ne anwo tɛtɛlɛ yɛ mita abulanwiɔ nee nwiɔ. 14-15Wɔ anlenkɛ ne foa ko nee ye foa ko, ɔwɔ kɛ bɛkendɛhenda ndanlɛ mɔɔ ko tɛtɛlɛ le mita nsia nee foa ko la wɔ mbaka nsa mɔɔ gyigyi adiabo nsa azo la azo. 16Anlenkɛ mumua ne anloa, ɔwɔ kɛ bɛfa ndanlɛ mɔɔ ye tendenle le mita ngɔnla, na bɛva lenen nyɛma kɛnlɛma, mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo, na bɛva agbuyia bɛnwo nuhua la bɛyɛ mgbɛnu bɛhenda nuhua wɔ mbaka nna mɔɔ gyigyi adiabo nna zo la azo. 17Mbaka ne mɔ mɔɔ solo alie ne anwo la ɔwɔ kɛ yɛ dwɛtɛ fufule, bɛ nzosɔnu ne mɔ yɛ dwɛtɛ fufule, na bɛ adiabo ne mɔ yɛ kɔbele. 18Alie ne anwo bane ne tendenle ɔwɔ kɛ yɛ mita abulanla nee nna, ye tɛtɛlɛ yɛ mita abulanwiɔ nee nwiɔ, na ye anwumahɔlɛ yɛ mita nwiɔ nee ekyi. Mgbɛnu ndanlɛ ne mɔ ɔwɔ kɛ yɛ lenen nyɛma kɛnlɛma ndanlɛ na adiabo ne mɔ yɛ kɔbele. 19Ndanlɛ Sua ne anu ahyɛnze, nwolɛ adakola nee alie ne anwo takola biala ɔwɔ kɛ bɛfa kɔbele a bɛyɛ a.
Kɛnlaneɛ ne boɛ ɛnleanlɛ
(Sɛlɛ 24.1-4)
20“Maa Yizilayɛma ɛva ɔlivi nwole kpalɛ ɛrɛla ɛmaa bɛva bɛgua kɛnlaneɛ ne anu, amaa mekɛ biala bɛazɔ. 21Aalɔn nee ɔ mra mrenya ne mɔ a ɔwɔ kɛ nea sɔ kɛnlaneɛ ne mɔɔ wɔ Ndanlɛ Sua ne anu mgbɛnu ɛdanlɛ ne mɔɔ wɔ Ngyekyeleɛ Ɛlɛka ne anyunlu la a, yɛɛ ɔwɔ kɛ ɔsɔ ɔgyinla me nyunlu ɛkɛ ɔvi nɔsolɛ toonwo alehyenlɛ. Yizilayɛma nee bɛ bo zo amra ɔwɔ kɛ sie mɛla ɛhye dahuu.
Currently Selected:
Ade 27: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
