Ade 22
22
Abozozielɛ nwo mɛla
1“Saa awie wua ɛnlankɛ nyinli anzɛɛ boane na ɔku ye anzɛɛ ɔtɔne ye a, ɔbava nlankɛ nyinli nnu yeazie ɛnlankɛ ko ne abo zo, anzɛɛ mboane nna yeazie boane ko ne abo zo. 2-4Ɔwɔ kɛ ɔfa bie ɔsie mɔɔ yewua la abo zo; saa ɔnlɛ ɛhwee a, ɔwɔ kɛ bɛtɔne ye kɛ kanra la bɛtua mɔɔ ɔwuale la. Saa bɛnwu nane ne mɔɔ ɔwuale la anyewɔzo, ɛnlankɛ nyinli, asoaso, anzɛɛ boane ne wɔ ye ɛkɛ ne a, ɔwɔ kɛ ɔtua ye mɔnwo.
“Saa bɛkye awule kɛ ɔlɛbu sua nɔɔzo, na bɛbɔ ye debie na ɔwu a, ahenle mɔɔ bɔle ye la ɛnli fɔlɛ kɛ yeyɛ kɔdiawu.
5“Saa awie maa ye nyɛmoa kɔdidi awie vanye egyinli nu, anzɛɛ gyakyi ye nyɛmoa maa bɛkɔdi ɔ gɔnwo ɛya nu bɛyɔba a, ɔwɔ kɛ ɔfa ɔdaye ye ɛya nu bɛyɔba kpalɛ kpalɛ ne mɔ bie ɔsie bɛ bo zo.
6“Saa awie to senle na ɔmaa ɔsɔ ɔkɔyela awie abɛlɛ mɔɔ yebu yehua anzɛɛ gyigyi anzɛɛ ɔyela ɛya avule a, ahenle mɔɔ dole senle ne la ɔwɔ kɛ sie ye kɔsɔɔti abo zo.
7“Saa awie fa ezukoa anzɛɛ ninyɛne maa ɔ gɔnwo kɛ ɔva ɔzie na awie wua na bɛkye ye a, ɔwɔ kɛ ɔtua ye mɔnwo. 8Saa bɛannwu awule ne a, ɔwɔ kɛ awuke menle ne kɔ Nyamenle anyunlu, ɛleka mɔɔ bɛsonle la, na ɔkɔdi amonle kɛ amgba tɛ ɔdaye a ɔwuale ɔ gɔnwo ne ninyɛne ne a.
9“Mɔɔ fane ninyɛne nwo kpolerazulɛ nwo, saa ɛnlankɛ nyinli o, asoaso o, boane o, ndanlɛ o, anzɛɛ debie biala mɔɔ kɛminli la anwo, na nuhua ko ɛlɛka kɛ, ‘Me ɛdeɛ ɔ’ la, menli nwiɔ ne mɔɔ ɛlɛsu kpolera ne la ɔwɔ kɛ kɔ Nyamenle anyunlu. Nuhua ne mɔɔ Nyamenle kɛbua ye fɔlɛ la ɔwɔ kɛ tua ye mɔnwo maa ɔ gɔnwo ne.
10“Saa awie kponle zolɛ kɛ ɔkɛzie ɔ gɔnwo asoaso anzɛɛ ɛnlankɛ nyinli anzɛɛ boane anzɛɛ ayɛmoa biala ɔkɛmaa ye, na saa ɔwu, ɔboda anzɛɛ bɛwua, mɔɔ awie biala ɛnli nwolɛ daselɛ la a, 11ɔwɔ kɛ ahenle kɔdi amonle wɔ Ɛdɛnkɛma anyunlu kɛ amgba tɛ ɔdaye a ɔwuale ɔ gɔnwo ne agyadeɛ ne a. Saa nane ne, tɛ ɛwualɛ yɛɛ bɛwuale a, ahenle mɔɔ lɛ agyadeɛ ne la ɔwɔ kɛ kponle zolɛ; yemɔti ɔnlie bie ɔnzie ɔ bo zo. 12Na saa bɛwuale nane ne ɛdeɛ a, yemɔ neavolɛ ne ɔwɔ kɛ fa bie sie ɔ bo zo maa ɔ menle. 13Saa nanemgbole bie ku ye a, ɔwɔ kɛ ɔfa ye funli ne ɔbadi daselɛ, amaa yeanzie ɔ bo zo.
14“Saa awie fɛne ɔ gɔnwo ayɛmoa na bɛboda ye anzɛɛ ɔwu wɔ mekɛ mɔɔ ɔ menle ne ɛnle ɛkɛ ne la a, ɔwɔ kɛ ɔsie ɔ bo zo. 15Na saa ɔ menle wɔ ɛkɛ na ɛhye si a, ɔnle kɛ ahenle sie ɔ bo zo. Saa bɛbɔle ye ɛkpa a, ɔwɔ ye ɛkpabɔlɛ ezukoa ne anu.
Subane nee nyamenlezonlenlɛ nwo mɛla
16 #
Mɛla 22.28-29
“Saa nrenya bɔ belamunli raalɛ mɔɔ bɛtɛyiale ye la anzɔne na ɔ nee ye da a, ɔwɔ kɛ ɔsu ɔ ti asoa na ɔgya ye.
17“Saa raalɛ ne ɔ ze kpo kɛ ɔnrɛmaa ɔnrɛgya ye a, ɔwɔ kɛ nrenya ne tua ezukoa mɔɔ nee raalɛ belamunli ati asoa sɛ la maa ɔ ze.
18 #
Mɛla 18.10,11 “Bɛhu raalɛ biala mɔɔ ye ngonyia la.
19 #
Sɛlɛ 18.23; 20.15-16; Mɛla 27.21 “Bɛhu nrenya biala mɔɔ nee nane kɛla la.
20“Bɛhu awie biala mɔɔ kɛbɔ azu kɛmaa bozonle biala la; Ɛdɛnkɛma angomekye yɛɛ bɛbɔ azu bɛmaa ye a.
21 #
Ade 23.9; Sɛlɛ 19.33-34; Mɛla 27.19 “Bɛmmayɛ ɛyɛvolɛ biala ɛtane anzɛɛ bɛmmasisi ye, ɔluakɛ ɛnee bɛdabɛ bɛle nyɛvolɛ wɔ Yigyibiti azɛlɛ zo. 22Bɛmmakile kunlanvolɛ raalɛ anzɛɛ arisa biala nyane. 23Saa bɛkile bɛ nyane na bɛsu bɛfɛlɛ me a, nɔhalɛ, mebadie bɛ ɛzunlɛ ne; 24mebava bɛ nwo ɛya na meamaa bɛahu bɛ wɔ konle nu, na bɛ ye mɔ ayɛ ahunlanvolɛ na bɛ mra ayɛ nrisa.
25“Saa bɛbɔ me menli ehyianvolɛma ne mɔ bie bosea a, bɛmmayɛ kɛ menli mɔɔ bɔ bosea die nzinwo la, yɛɛ bɛmmadie ye nzinwo. 26Saa ɛdie ɛ gɔnwo tɛladeɛ awoba a, fa ye debie maa ye kolaa na sɛnzɛne adɔ, 27ɔluakɛ ɛhye ala a ɔwula a, ye tɛladeɛ mɔɔ ɔfa ɔkeda ye sonlabaka ne anwo la ɛne. Duzu yɛɛ ɔva ɔla a? Saa ɔsu ɔfɛlɛ me a, mebadie ye, ɔluakɛ mese anwunvɔne.
28 #
Gyi 23.5
“Bɛmmatendɛ bɛtia Nyamenle#22.28 Nyamenle: anzɛɛ ndɛnebuavolɛma. anzɛɛ bɛmmawa sonla mɔɔ sie bɛ menli ne la amonle.
29“Bɛmmatwenlehwenle bɛ bo aze wɔ bɛ bɛyɔba azubɔlɛ ne mɔ anwo.
“Bɛva bɛ mra mrenya mɔɔ lumua la bɛmaa me. 30Zɔhane ala yɛɛ bɛyɛ bɛ nlankɛ nee bɛ mboane amra mɔɔ bɛkɛlumua bɛkɛwo bɛ la a. Bɛmaa bɛ nyɛmoa ne mɔ amra mɔɔ lumua la biala ɛli kenle nsuu wɔ ɔ nli anwo ɛkɛ, ye kenle mɔtwɛ ne azo, bɛva ye bɛmaa me.
31 #
Sɛlɛ 17.15
“Bɛbayɛ menli mɔɔ bɛdu bɛ bɛmaa me, yemɔti bɛmmadi nane mɔɔ ɛbɔ nu nane ɛhu ye la; bɛva bɛmaa ahwea ɛli.
Currently Selected:
Ade 22: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
