Ade 18
18
Gyɛtulo kpɔla Mosisi
1Sɛlɛvolɛ Gyɛtulo, Mosisi aye ne ɔ ze ne, mɔɔ vi Medean la dele mɔɔ Nyamenle ɛyɛ ɛmaa Mosisi nee Yizilayɛma, nee kɛ Ɛdɛnkɛma ɛzi ɛye Yizilayɛma ɛvi Yigyibiti la. 2Yemɔti Gyɛtulo vale Mosisi aye Zepɔla mɔɔ ɔgyakyile ye ɔ nzi, 3#Gyi 7.29 nee ɔ mra mrenya nwiɔ ne mɔɔ ɔdonle ko Gɛhyɔm (ɔluakɛ ɔhanle kɛ, “Meyɛ ɛyɛvolɛ wɔ maanle gyɛne nu”) 4na ɔdonle ko ne noko Ɛleyizɛ,#18.4 Ɛleyizɛ: anzɛɛ “Nyamenle boa me.” (ɔluakɛ ɔhanle kɛ, “Me ze Nyamenle ne yɛle me moalɛ na ɔliele me ɔvile Yigyibiti belemgbunli ne konle dadeɛ ne anloa”) la, hɔle. 5Na Gyɛtulo (Mosisi aye ne ɔ ze) vale Mosisi aye ne nee ɔ mra mrenya nwiɔ ne rɛlɛle ye wɔ fienemgbole ne anu wɔ Nyamenle Boka, ɛleka mɔɔ ɛnee yeyɛ azokoɛleɛ la. 6Awie hɔhanle hilele Mosisi kɛ, “Nea, ɛ ye ɔ ze Gyɛtulo nee ɛ ye nee ɛ mra mrenya nwiɔ ne ɛlɛba.” 7Yemɔti Mosisi vale ɛnriandilɛ hɔyiale ye, ɔbɔle ɔ ti aze ɔmanle ye, ɔyɛle ye akoaba na ɔvole ɔ nvoka anwo. Bɛbizebizale bɛ agbɔkɛ nu nee kɛ ɛbɛlabɔlɛ nu si kɔ ye la. Akee bɛhɔwolole Mosisi ndanlɛ sua ne anu. 8Na Mosisi hanle ninyɛne mɔɔ ɔlua Yizilayɛma ati Ɛdɛnkɛma ɛva ɛyɛ Yigyibitima nee bɛ belemgbunli ne la, amaneɛ mɔɔ bɛnwunle ye wɔ bɛ adendulɛ ne anu nee kɛ Ɛdɛnkɛma ɛzi ɛlie bɛ la amuala hilele ɔ ye ɔ ze Gyɛtulo. 9Na Gyɛtulo lile fɛlɛko wɔ ninyɛne kpalɛ mɔɔ Ɛdɛnkɛma ɛyɛ ɛmaa Yizilayɛma na yelie bɛ yevi Yigyibitima asa anu la anwo. 10Akee Gyɛtulo hanle kɛ, “Nyilalɛ ɛha Ɛdɛnkɛma mɔɔ ɛlie bɛ ɛvi Yigyibitima nee bɛ belemgbunli ne asa anu la. 11Na kɛkala, menwu kɛ Ɛdɛnkɛma le kpole tɛla nyamenle biala, ɔboalekɛ ɔliele menli ne ɔvile Yigyibitima asa anu wɔ mekɛ mɔɔ ɛnee bɛlɛyɛ bɛ mgbane mgbane la.” 12Na Mosisi aye ɔ ze Gyɛtulo bɔle ɛyelalɛ azu manle Ɛdɛnkɛma. Aalɔn nee Yizilayɛ mgbanyima ne mɔ amuala rale na bɛ nee Gyɛtulo ralile debie wɔ Nyamenle anyunlu.
Bɛye Ndɛnebuavolɛma
(Mɛla 1.9-18)
13Aleɛ hyenle la menli ne yiale. Bɛgyinlanle nzisi na Mosisi dɛnlanle aze kɛ ɔsiezie edwɛkɛ ngyikyi mɔɔ wɔ menli ne avinli la. Ɔbɔle ɔ bo nwonlomɔ toonwo aleɛ dwole bɔkɔɔ. 14Na mɔɔ Mosisi aye ne ɔ ze nwunle mɔɔ Mosisi ɛlɛyɛ amaa menli ne la ɔhanle kɛ, “Duzu a ɛlɛyɛ wɔamaa menli ne la? Duzu ati a ɛdawɔ ɛ ngomekye ɛkɛdɛnla aze na menli ne amuala kɛgyinla, kɛbɔ wɔ mgbɔlɔka kɛyia toonwo aledwolɛ ɛ?”
15Na Mosisi buale Gyɛtulo kɛ, “Ɔboalekɛ menli ne ba kɛ membiza Ɛdɛnkɛma memaa bɛ. 16Saa bɛnyia edwɛkɛ a bɛba na mesiezie bɛ avinli, na memaa bɛnwu Nyamenle mɛla ne nee ye ngyehyɛlɛ ne mɔ.”
17Na Gyɛtulo zele ye kɛ, “Tɛ adenle kpalɛ ne a ɛlua nu la. 18Ɛ nee menli ne bɛku bɛ nwo ɛvɛlɛ mgbane, ɔluakɛ gyima ne bo ɛ nwo zo. Ɛ ngomekye ɛnrɛhola ɔ muala yɛ. 19Tie mɔɔ meka la; memaa wɔ adwenle, na Nyamenle nee wɔ balua! Ɛbagyinla menli ne agyakɛ anu wɔ Nyamenle anyunlu. 20Ɛbahilehile bɛ mɛla ne nee ngyehyɛlɛ ne mɔ, na wɔamaa bɛanwu adenle mɔɔ ɔwɔ kɛ bɛdua nu nee debie mɔɔ ɔwɔ kɛ bɛyɛ la. 21Akee ye menli mɔɔ di munli wɔ menli ne anu la, menli mɔɔ sulo Nyamenle, menli mɔɔ di nɔhalɛ, yɛɛ menli mɔɔ kyi ndoloboa la, na maa menli zɛhae mɔ ɛnlea menli apenle apenle, menli ɛya ɛya, menli abulanlu abulanlu, yɛɛ menli bulu bulu nwo zo. 22Na maa mekɛ biala bɛziezie menli ne mɔ edwɛkɛ. Saa edwɛkɛ ne le edwɛkɛ kpole bo bɛ nwo zo a, maa bɛva bɛrɛlɛ wɔ; edwɛkɛ ngyebangyeba ne mɔ, maa bɛdabɛ bɛli. Ɛhye bade wɔ ɛvɛlɛ zo na bɛ nee wɔ azoa adesoa ne. 23Saa ɛyɛ ɛhye na Nyamenle kponle zolɛ maa wɔ a, ɛbahyɛ na menli ne mɔ noko ahɔ bɛ azua nu anzonudwolɛ nu.”
24Mosisi diele mɔɔ Gyɛtulo hanle hilele ye la na ɔyɛle mɔɔ ɔhanle la amuala. 25Ɔyele Yizilayɛma bie mɔ mɔɔ bɔ mɔdenle kpalɛ la na ɔyɛle bɛ mgbanyinli wɔ menli ne anwo zo, bie sie menli apenle, bie menli ɛya, bie menli abulanlu, yɛɛ bie menli bulu. 26Na mekɛ biala bɛzieziele menli ne avinli. Edwɛkɛ ne mɔɔ yɛ se la, bɛvale bɛrɛlɛle Mosisi, na bɛzieziele edwɛkɛ ngyebangyeba ne mɔ kɔsɔɔti.
27Akee Mosisi guale ɔ ye ɔ ze ne adenle manle ɔhɔle ye maanle nu.
Currently Selected:
Ade 18: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
