Mateo 5
5
Yesu yɛ ngyerɛkyerɛ wɔ bokaa so
1Yesu nwuni ɛlɔen ne nen, ɔhɔle bokaa bie aso, na ɔtenane ase nen, ye asuafoɛ nemɔ wale ye nwo berɛ, 2na ɔtele ye noa ohyirehyirele bɛ kyɛ,
Sunzum nu saleɛ
(Luka 6.20-23)
3 #
Mak 10.14; Luk 22.29 “Sunzum nu ehiafoɛ banya saleɛ, ofikyɛ bɛ yeɛ nyameɛso ahennie ne te bɛ deɛ ɔ.
4 #
Yes 61.2; Yoh 16.20; Nye 7.17 “Bɛ bɔ bɛ wora abɔ ne banya saleɛ, ofikyɛ bɛ yeɛ bɛkɔkyekye bɛ wora ɔ.
5 #
Edw 37.11
“Anwobrɛaseɛfoɛ banya saleɛ, ofikyɛ bɛ yeɛ bekonya aseɛ ne maa ɔkɔyɛ b’agyapadeɛ ɔ.
6 #
Yes 55.1-2; Yoh 4.14; 6.48-51 “Bɛ bɔ tenenee nwo hɔen ne nzuhɔen ku bɛ ne banya saleɛ, ofikyɛ bɛ yeɛ Nyameɛ kɔma bɛ ko koyi ɔ.
7“Bɛ bɔ benwu bɛ mmango anwumvoin ne banya saleɛ, ofikyɛ bɛ yeɛ bekonwu bɛ anwumvoin ɔ.
8 #
Edw 24.4; Heb 12.14; 1 Yoh 3.2; Nye 22.4 “Bɛ bɔ bɛ ti anu te fufue ne banya saleɛ, ofikyɛ bɛ yeɛ bekonwu Nyameɛ ɔ.
9“Bɛ bɔ bɛte patafoɛ ne banya saleɛ, ofikyɛ bɛ yeɛ bɛkɔfrɛ bɛ Nyameɛ mma ɔ.
10 #
1 Pet 3.14; 4.14 “Bɛ bɔ tenenee ti bɛtane bɛ nye ne, banya saleɛ, ofikyɛ bɛ yeɛ nyameɛso ahennie ne te bɛ deɛ ɔ.
11 #
1 Pet 4.14
“Ɛmɔanya saleɛ, wɔ mmerɛ bɔ ɔnate me ti mmenia pepɛ ɛmɔ nzoaa, bɛtane ɛmɔ nye, ná bɛpɛ ngondombo bɛkeka edwirɛ tɛɛ ahoroɔ bɛto ɛmɔ so ɔ. 12#2 Abe 36.16; Mat 23.37; Aso 7.52; 1 Tɛs 2.15; Yak 5.10 Ɛ́mɔma ɛmɔ nye gye ná ɛ́mɔli ahurusi, ofikyɛ ɛmɔ akatuaa sone wɔ nyameɛso. Ofikyɛ sɔ ala yeɛ bɛtanene ngɔmhyɛlɛfoɛ bɔ belili ɛmɔ nyunu moa nemɔ nye ɔ.
Ewiase ngyee ne kanea
(Marko 9.50; Luka 14.34-35)
13“Ɛmɔte aseɛ ye aso ngyee. Nakoso sɛ ngyee nu fɛɛ tu a, nzikyɛ yeɛ bɛkɔfa bekowura ye maa okosa kɔkakyi ngyee ɔ? Bɛfa bɛyɔ hwee a ɔnyɛ yee ko, sana begyi begua maa mmenia tiatia so.
14 #
Ɛfe 5.8; Flp 2.15; Yoh 8.12 “Ɛmɔte wiase kanea. Kuro bɔ ɔla bokaa so ne, ɔngora mvea. 15Sɔ ala yeɛ bɛnzɔ kanea ná bafa bawura ɛkorɛ bo ɔ; na mmom bɛfa besie kanea bakaa so, amaa wata wama ebiala bɔ ɔwɔ awuro berɛ anwu ase. 16Yiti ɛ́mɔma ɛmɔ kanea ɔta ma mmenia nwu ye, amaa ɔnate so banwu ɛmɔ yɔleɛ paa ne, ná bakamvo ɛmɔ Baba bɔ ɔwɔ nyameɛso ne.
Mmeraa ne nwo ngyerɛkyerɛ
17“Nnɛma ɛmɔsusu kyɛ mmale kyɛ mebaatu Mose mmeraa ne ne ngɔmhyɛlɛfoɛ ngyerɛkyerɛ ne megua. Mamma kyɛ mebaatu megua, na mmom mmale kyɛ mebaasi bɛ pi. 18#Luk 16.17; Mak 13.31 Nahorɛ nu, mekã mekyire ɛmɔ kyɛ, kɔpem kyɛ anwuro ne aseɛ kɔpɛ nu ɔ, mmeraa ne anu kaaba ko anaa kaaba pɔtrepɔɔ ko po ngofi nu, sana ye mukoraa awa nu koraka. 19#Yak 2.10 Yiti ebiala bɔ ɔkɔto mmeraa ne anu kaaba ko bɔ ɔwɔ nu po, ná okohyirehyire mmenia kyɛ bɛyɔ sɔ bie nen, bɛkɔfrɛ ye kwahweabaa wɔ nyameɛso ahennie ne anu. Nakoso sona bɔ okoli so, ná okohyirehyire mmenia maa bekoli so bie nen, ɔkɔyɛ titire wɔ nyameɛso ahennie ne anu. 20Yiti mekã mekyire ɛmɔ kyɛ, sɛ ɛmɔ tenenee andra ahyerɛlɛfoɛ ne Farasiifoɛ deɛ a, ye de ɛmɔ gya baa ngotia nyameɛso ahennie ne anu.
Ɛyaafɛlɛ nwo ngyerɛkyerɛ
(Luka 12.57-59)
21 #
Ɛks 20.13; Deut 5.17; 16.18 “Ɛmɔate kyɛ bɛhã behyirele mbanyi mɔ kyɛ, ‘Nnɛdi awue, na ebiala bɔ okoli awue ne okoli fɔ wɔ ndɛenbualɛ nu.’ 22Na mekã mekyire ɛmɔ kyɛ, ebiala bɔ ɔkɔfɛ oliɛma so yaa nen, okoli fɔ wɔ ndɛenbualɛ nu; ebiala bɔ okose oliɛma kyɛ ɔte sona mbaen nen, okoli fɔ badwa nyunu. Ebiala bɔ okose kyɛ, ‘Wɔ kwaseambane’ nen, okoli fɔ, na ɔkɔhɔ abɔnzam see nu. 23Yiti sɛ ɛfa w’ayɛyɛdeɛ ba afɔleɛ bokyea nwo, ná berɛ ɛkaye kyɛ eliɛma ne wɔ le dwirɛ a, 24yakyi w’ayɛyɛdeɛ ne to afɔleɛ bokyea ne nyunu berɛ, ná kɔ ɛne eliɛma ne bɛɛbɔ nu koraka né afa w’ayɛyɛdeɛ ne aabɔ afɔleɛ ne.
25 #
Luk 12.57-59
“Sona bɔ wasama wɔ ne, ɛne ye bésiesie ɛmɔ afia ndɛndɛ, wɔ mmerɛ bɔ ɛne ye bɛ gya gyi atee so bɛkɔ mbanyi nyunu ɔ. Anyɔ a, sona bɔ wasama wɔ ne kɔfa wɔ kowura ndɛenbualɛniɛ sa, ná ndɛenbualɛniɛ ne koso wafa wɔ wawura wɛmvoɛ ne sa, ná bafa wɔ bato kuku nu. 26Nahorɛ nu, mekã mekyire wɔ kyɛ, sɛ andua kerɛ ne amu pɛsɛɛ a, bɛngɔye wɔ ma engofite ngɔhɔ le.
Agyaasɛkyelɛ nwo ngyerɛkyerɛ
27 #
Ɛks 20.14; Deut 5.18 “Ɛmɔate kyɛ bɛhane kyɛ, ‘Nnɛsɛkye agyaa.’ 28Nakoso me de, mekã mekyire ɛmɔ kyɛ, ebiala bɔ ɔkɔnea brasua ná ye nwo kɔyɛ ye akɔnnɔ ne, né wafa ye dada ye wɔ ahone nu. 29#Mat 18.9; Mak 9.47 Yiti sɛ wɔ nye famaa diedie wɔ kɔ bɔne nu a, tu ná gyi to! Ɔte paa kyɛ ɛkɔtɔ bue tra kyɛ bekogyi wɔ mumua ne amu bɛkɔto abɔnzam see nu ɔ. 30#Mat 18.8; Mak 9.43 Sɛ wɔ sa famaa diedie wɔ kɔ bɔne nu a, pɛ na gyi to! Ɔte paa kyɛ ɛkɔyɛ abasini tra kyɛ bekogyi wɔ mumua ne bɛkɔto abɔnzam see nu ɔ.
Agyaayiralɛ nwo ngyerɛkyerɛ
(Mateo 19.9; Marko 10.11-12; Luka 16.18)
31 #
Deut 24.1-4; Mat 19.7; Mak 10.4 “Bahã ye bieku kyɛ, ‘Ebiala bɔ okoyira ɔye ne, odi kyɛ ɔkyerɛ agyaayiralɛ krataa ma ye.’ 32#Mat 19.9; Mak 10.11, 12; Luk 16.18; 1 Kor 7.10-11 Na me de, mekã mekyire ɛmɔ kyɛ, sɛ wanyɛ adwamanbɔlɛ ti, ná ebie yira ɔye a, ye de né wama braa ne asɛkye agyaa. Na ebiala bɔ okogya braa bɔ bayira ye nen, né sɔ biaa ne koso wasɛkye agyaa.
Ndaen nwo ngyerɛkyerɛ
33 #
Lew 19.12; Num 30.2; Deut 23.21 “Ɛmɔate ye bieku kyɛ bɛhã behyirele tetefoɛ nemɔ kyɛ, ‘Nnɛta ndaen mbaen, na mmom fa bɔ aboa Awurade ne ma ye!’ 34#Yak 5.12; Yes 66.1; Mat 23.22 Na me de, mekã mekyire ɛmɔ kyɛ, Nnɛma ɛmɔta ndaen koraa. Nnɛma ɛmɔfa anwuro bɛta ndaen, ɔnate kyɛ ɔte Nyameɛ ahennie bia, 35#Yes 66.1; Aso 7.49; Edw 48.2 anaa aseɛ, ɔnate kyɛ ɔte ye gya ndiasoɛ; anaa Yerusalem, ɔnate kyɛ ɔte Ɛhene berembɔn ne kuro. 36Nnɛma ɛmɔfa ɛmɔ ti bɛta ndaen, ɔnate kyɛ ɛmɔngɔhora tire nwiaa komapɛ po bire anaa fufue yɔ. 37Ɛ́mɔma ɛmɔ ‘Yoo’ yɛ ‘Yoo’ ná ɛmɔ ‘Daabi’ yɛ ‘Daabi.’ Ɛhe pa ye nwo a, bɔ ɛmɔkɔhã biala fi bɔne nu.
Nnɛfa bɔne tua bɔne so
(Luka 6.29-30)
38 #
Ɛks 21.24; Lew 24.20; Deut 19.21 “Ɛmɔate kyɛ bɛnwa: ‘Anyeɛ si anyeɛ gya nu, na agyee si agyee gya nu.’ 39Nakoso me de, mekã mekyire ɛmɔ kyɛ, nnɛma ɛmɔfa bɔne betua ebie bɔ wayɔ ɛmɔ bɔne ɔ so kerɛ. Sɛ ebie pakye wɔ nye famaa so a, kakyi bɛen ne koso ma ye. 40Sɛ ebie sama wɔ kyɛ ode w’ataadeɛ bɔ ɔwɔ ye bo ne a, maa ɔfa w’ataadeɛ aguasoɛ ne ɔboka so. 41Sɛ ebie hyɛ wɔ so kyɛ ɛnate pɛ kwanzii ko a, ɛne ye bɛhɔ kwanzii nyɔ. 42Sɛ ebie srɛ wɔ dɔ nikyee a, fa ma ye; yeɛ sɛ ebie pena kyɛ ɔfɛmo wɔ dɔ nikyee a, nnɛfa bɔ ye atianuserɛ.
Kuro wɔ pɔfoɛ dwirɛ
(Luka 6.27-28, 32-36)
43 #
Lew 19.18
“Ɛmɔate kyɛ bahã ye kyɛ, ‘Kuro ebiɛngo dwirɛ, ná pɔ wɔ pɔfoɛ.’ 44Nakoso me de, mekã mekyire ɛmɔ kyɛ, ɛ́mɔhuro ɛmɔ pɔfoɛ mɔ dwirɛ, ná ɛ́mɔbɔ mbaeɛ bɛ́ma bɛ bɔ bɛtane ɛmɔ nye ɔ; 45amaa ɔnate so ɛmɔayɛ ɛmɔ Baba bɔ ɔwɔ nyameɛso ne mma. Ɔnate kyɛ ɔma ye yia bɔ bɔnefoɛ mmenia ne mmeni paa so, na ɔtɔ esue gua teneneefoɛ ne bɛ bɔ bɛndengyɛ ɔ so. 46Na sɛ bɛ bɔ bekuro ɛmɔ dwirɛ yeɛ ɛmɔkuro bɛ dwirɛ de a, ye de nzu akatuaa yeɛ ɛmɔkonya ɔ? Ɛtoɔdidelɛfoɛ po, aso nna sɔ ala yeɛ bɛyɔ ɔ? 47Na sɛ ɛmɔ aliɛma mɔ ngome yeɛ ɛmɔbisa bɛ ahye a, nzu yeɛ ɛmɔayɔ maa wabo so ɔ? Ewiasefoɛ po, aso nna sɔ ala yeɛ bɛyɔ ɔ? 48Yiti ɛ́mɔma ɛmɔ nwo te, kyɛbɔ ɛmɔ Baba bɔ ɔwɔ nyameɛso ne ye nwo te ne.
Esahie Bible © Bible Society of Ghana, 2018.