Mateo 6
6
Adɔeɛyɛlɛ nwo ngyerɛkyerɛ
1 #
Mat 23.5 “Ɛ́mɔnea yé ná ɛmɔanyɔ ɛmɔ tenenee yɔleɛ wɔ mmenia nyunu, kyɛbɔ ɔkɔyɛ bɔ bekonwu ɛmɔ ɔ. Ɔba ye sɔ a, ɛmɔngonya akatuaa biala ngofi ɛmɔ Baba bɔ ɔwɔ nyameɛso ne berɛ. 2Yiti sɛ ɛyɔ adɔeɛ a, nnɛbɔ ye nwo dawure, kyɛbɔ nyaatwomfoɛ bɛyɔ ye nyianu sua mɔ nu ne dwaaso, kyɛbɔ mmenia kɔkamvo bɛ ne. Nahorɛ nu, mekã mekyire ɛmɔ kyɛ, bɛ sa ahã b’akatuaa dada. 3Na wɔ de, sɛ ɛyɔ adɔeɛ a, nnɛma wɔ sa bɛen nwu bɔ wɔ sa famaa yɔ ɔ, 4#Kol 3.23-24 ama w’adɔeɛyɛlɛ ne ayɛ mvealeɛ nu dwirɛ; na wɔ Baba bɔ onwu mvealeɛ nu dwirɛ ne, ɔkɔma wɔ so akatuaa.
Mbaeɛbɔlɛ nwo ngyerɛkyerɛ
(Luka 11.2-4)
5“Sɛ ɛmɔbɔ mbaeɛ a, nnɛma ɛmɔyɛ kyɛ nyaatwomfoɛ nemɔ; ofikyɛ bɛ de, bekuro kyɛ begyinagyina ndende wɔ nyianu sua nemɔ nu ne mmorɔnoɛ so bɛbɔ mbaeɛ, kyɛbɔ ɔkɔyɛ bɔ mmenia konwu bɛ ɔ. Nahorɛ nu, mekã mekyire ɛmɔ kyɛ, banya b’akatuaa dada. 6Na wɔ de, sɛ ɛ́bɔ mbaeɛ a, kɔ wɔ sua nu, to w’anoa ne anu, ná bɔ mbaeɛ kyire wɔ Baba bɔ ɔwɔ mvealeɛ nu ne, na wɔ Baba bɔ onwu mvealeɛ nu dwirɛ ne, ɔkɔma wɔ so akatuaa.
7 #
1 Ahe 18.25-29 “Sɛ ɛmɔbɔ mbaeɛ a, nnɛma ɛmɔyɛ ndoatoa kyɛ bosoensolɛfoɛ bɛyɔ ne; ofikyɛ bɛdwene kyɛ bɛ dwudwolɛ tendetende ne yeɛ ɔkɔmaa bekotie bɛ ɔ. 8#Mat 6.32; Luk 12.30 Nnɛma ɛmɔyɛ kyɛ bɛ; ofikyɛ ɛmɔ Baba ɔse bɔ ɛmɔhia ɔ koraka ná ɛmɔabisa ye. 9#Luk 11.2-4 Yiti sɔaa yeɛ ɛ́mɔbɔ mbaeɛ:
‘Yɛ Baba bɔ ɛwɔ nyameɛso ɔ,
Wɔ dumaa nwo te.
10W’ahennie ɔbra,
Maa yɛyɔ w’apɛdeɛ wɔ aseɛ so,
kyɛbɔ bɛyɔ ye wɔ nyameɛso ne.
11Ma yɛ yɛ daa dada aleɛ ɛnɛ;
12Na fa yɛ mvomsoɛ kyɛ yɛ,
kyɛbɔ yɛfa yɛkyɛ bɛ bɔ bɛfõ yɛ ne.
13 #
2 Tɛs 3.3; Yoh 17.15; Yak 1.13 Nnɛfa yɛ kɔ nzɔhwɛ nu,
Na mmom ye yɛ fi bɔne nu.’
[Ofikyɛ wɔ yeɛ ahennie ne tumi ne animnyam
ɔte wɔ deɛ daa daa ɔ. Amen.]
14 #
Mat 18.35; Mak 11.25; Ɛfe 4.32; Kol 3.13 “Sɛ ɛmɔfa mmenia mvomsoɛ bɛkyɛ bɛ a, ɛmɔ Baba bɔ ɔwɔ nyameɛso ne koso kɔfa ɛmɔ deɛ kɔhyɛ ɛmɔ. 15Nakoso sɛ ɛmɔamva mmenia mvomsoɛ bangyɛ bɛ a, ye de ɛmɔ Baba ne koso ɔngɔfa ɛmɔ mvomsoɛ ngɔhyɛ ɛmɔ.
Akɔngyere nwo ngyerɛkyerɛ
16 #
Yes 58.5 “Sɛ ɛmɔyɛ akɔngyere a, nnɛma ɛmɔyɛ ɛmɔ nyunu bosaa kyɛ nyaatwomfoɛ nemɔ, ofikyɛ benyinya bɛ nyunu kyɛbɔ mmenia konwu kyɛ bɛyɛ akɔngyere ɔ. Nahorɛ nu, mekã mekyire ɛmɔ kyɛ, banya b’akatuaa dada. 17Na wɔ de, sɛ ɛyɛ akɔngyere a, toli wɔ ti anu, ná nwunzi wɔ nyunu, 18#Mat 6.4, 6 ná mmenia bannwu kyɛ ɛyɛ akɔngyere ɔ; sana wɔ Baba bɔ ɔwɔ mvealeɛ nu ne; na wɔ Baba bɔ onwu mvealeɛ nu dwirɛ ne, ɔkɔma wɔ so akatuaa.
Nyameɛso agyapadeɛ
(Luka 12.33-34)
19 #
Mak 10.21; 1 Tim 6.17-19; Yak 5.1-3 “Nnɛma ɛmɔboaboa agyapadeɛ noa bɛma bɛ nwo wɔ aseɛ ye aso, nekaa bɔ mvrɔlɔ di ná odi naakye, ná awuefoɛ bubu kɔ nu bekowua ne. 20Na mmom ɛ́mɔboaboa ɛmɔ agyapadeɛ noa bésie nyameɛso, nekaa bɔ mvrɔlɔ nni, ná onni naakye, ná awuefoɛ mmubu ngɔ nu ngonwua ɔ. 21Ɔnate kyɛ, nekaa bɔ w’agyapadeɛ wɔ ne, berɛ yeɛ w’ahone koso wɔ ɔ.
Nipadua kanea
(Luka 11.34-36)
22 #
Mat 20.15; Mak 7.22 “Anyeɛ te nipadua kanea. Yiti sɛ wɔ nye nwu nikyee yé a, wɔ nipadua ne amukoraa kɔyɛ hyireinn. 23Nakoso sɛ wɔ nye te wusiwusi a, wɔ nipadua ne amukoraa kɔyɛ awosii. Yiti sɛ kanea bɔ ɔwɔ wɔ nu ne te awosii a, né ye awosii ne te kabii paa!
Nyameɛ ne anwonyadeɛ
(Luka 12.22-31; 16.13)
24“Sona biala ngora nzo meneɛ nyɔ; ofikyɛ ɔba ye sɔ a, ɔkɔpɔ ko, né wahuro ko dwirɛ; anaakyɛ ɔkɔso ko nahorɛ nu, né wabu ko animtia. Ɛmɔngɔhora ngɔso Nyameɛ ne anwonyadeɛ.
25“Yiti mekã mekyire ɛmɔ kyɛ, nnɛmɔma ɛmɔ asetena nu adwenedwene tɔ ɛmɔ so, kyɛ nzu yeɛ ɛmɔkoli ɔ; anaakyɛ nzu yeɛ ɛmɔkɔno ɔ, anaakyɛ ɛmɔ nipadua nwo, kyɛ nzu yeɛ ɛmɔkɔhera ɔ. Aso ngoa nwo nhia ndra aleɛ? Aso nipadua nwo nhia ndra ɛtena anaa? 26#Mat 10.29 Ɛ́mɔnea ewienu nnomaa: bɛnyɔ boo, bɛngɔmva eboo so aleɛ, yeɛ bɛmmoaboa aleɛ bengua pata so; nakoso ɛmɔ Baba bɔ ɔwɔ nyameɛso ne ɔma bɛ aleɛ. Aso ɛmɔ nwo nhia ndra bɛ? 27#Edw 39.5 Ɛmɔ nu beni yeɛ ɔkɔhora kɔfa adwenedwene so kɔfa ɛlɛho po kɔtoa ye ngoa so ɔ?
28“Na nzu ati yeɛ ɛmɔdwenedwene ndena nwo ɔ? Ɛ́mɔnea eburo sukooko, ɔne kyɛbɔ besi benyi ɔ. Bɛnyɔ adwuma, yeɛ bɛndo gyese. 29#1 Ahe 10.4-7 Nakoso mekã mekyire ɛmɔ kyɛ, Solomon animnyam amukoraa nu ne po, ye anwosiesie ne ando ɛhemɔ anu ko po. 30#Mat 8.26; 14.31; 16.8 Na sɛ Nyameɛ siesie eburo ndire bɔ ogyi berɛ ɛnɛ maa ɔyɛ nyemene, ná ɛhema bapɛ bayera ye foonoo nu po a, ɔkɔyɛ sɛɛ bɔ ongosiesie ɛmɔ ma ɔngɔbo so ɔ? Ɛmɔ bɔ ɛmɔ gyidie te kãa ɔ!
31“Yiti nnɛmaa ɛmɔdwenedwene bɛkã kyɛ, ‘Nzikyɛ yeɛ yɛkoli ɔ, anaa nzikyɛ yeɛ yɛkɔno ɔ, anaa nzikyɛ yeɛ yɛkɔhera ɔ. 32Ofikyɛ ewiasefoɛ yeɛ bedi ɛhemɔ amukoraa si ɔ. Na ɛmɔ Baba bɔ ɔwɔ nyameɛso ne, ɔse kyɛ ɛmɔhia ɛhemɔ amukoraa. 33Na ɛ́mɔli moa bɛ́pena Nyameɛ ahennie ne ye tenenee ne mmom, na ɔkɔfa ɛhemɔ amukoraa ɔkɔboka so kɔma ɛmɔ. 34Yiti nnɛma ɛmɔdwene ɛhema deɛ nwo, ofikyɛ ɛhema bɔbɔ deinn ɔkɔdwene ye nwo. Kyẽa biala nu adwenedwene sone ma sɔ kyẽa ne.”
Esahie Bible © Bible Society of Ghana, 2018.