Asomafoɛ 5

Anania ne Safira di ndurum

1Na biaa bie bɔ bɛfrɛ ye Anania ne ɔye Safira bɛtɔnene b’agyapadeɛ. 2#Aso 4.37 Ɔne ɔye bɛyɛle adwene ko, na biaa ne fale sikaa bɔ benyane ne bie feale; yeɛ ɔfale ye ngaa ne brɛle asomafoɛ nemɔ ɔ. 3#Yoh 13.2 Na Petro bisale ye kyɛ, “Anania, nzu ati yeɛ ama abɔnzam#5.3: ABƆNZAM: Anaa Satan. ate maa walakalaka wɔ maa ali Sunzum Krongron ne ndurum, na afa aseɛ bɔ ɛtɔnene ne sikaa ne bie afea ɔ? 4Mmerɛ bɔ né ennya ɛttɔnene ye nen, aso né ɔtte wɔ deɛ? Na ɛtɔnene ye yiele ne koso, esikaa ne aso ɔtte wɔ deɛ? Na ɔwale ye sɛ bɔ afa sɔ adwene he ɔ? Nna kuro sona, na Nyameɛ mmom yeɛ ali ye ndurum ɔ.” 5Anania tele sɔ dwirɛ ne pɛ, ɔpɛ fini, na owuli berɛ ne ala; na bɛ bɔ bɛtele ne amu besurole. 6Na mmerandeɛ ne dwɔsole bɛfale nikyee bɛkyekyele ye nwo, na bɛfale ye befitele beesiele ye.

7Kɔyɛ dɔnhwere nza asi ne, ɔye ne koso wale; né ɔttele bɔ wato ohu ne nwo hwee. 8Na Petro sele ye kyɛ, “Ka nahorɛ kyire me, ɛmɔtɔnene ɛmɔ aseɛ nen, esikaa bɔ ɛmɔnyane hɔ ɛhe?” Na braa ne buale ye kyɛ, “Yoo, sɔ ala yeɛ yɛnyane ɔ.”

9Yeɛ Petro sele ye kyɛ, “Nzu ati yeɛ ɛmɔahã ɛmɔ ti bapura kyɛ ɛmɔso Awurade Sunzum ne bɛnea ɔ? Nea, mmenia bɔ besiele ehu ne bɛwɔ anoanu berɛ, na bɛkɔsoa wɔ koso bekofi wa bɛkɔhɔ.” 10Na berɛ ne ala, ɔpɛ fini ye nyunu berɛ wuli. Na mmerandeɛ nemɔ besa bɛwale ne, benwuni kyɛ ye koso wawu; yiti bɛmane ye so bɛhɔle, na besiele ye ohu ne nwo berɛ. 11Na esuronyi pirikua hane asɔre mma ne amu ɔne bɛ bɔ bɛtele edwirɛ ne amukoraa.

Nzɛngyerɛnneɛ ne anwanwadeɛ

12 # Aso 3.11 Na nzɛngyerɛnneɛ ne anwanwadeɛ pee fale asomafoɛ nemɔ so lale ali wɔ maen ne anu. Né bɛ mukoraa bayɛ adwene ko bayia nu wɔ Solomon Abrannaa so. 13Na bɛ bɔ né bɛnne agyidifoɛ fekue ne anu ne, ebiala anzi ye adwene pi kyɛ ɔkɔboka bɛ so ɔ, ɔwɔ nu kyɛ né mmenia ka bɛ nwo dwirɛ paa de. 14#Aso 2.47; 6.7 Nakoso mmienzua ne mmrasua pee bɔ belele Awurade belili ne hɔle so bokale agyidifoɛ fekue ne aso. 15#Aso 19.11-12 Na ɔnate bɔ né asomafoɛ nemɔ bɛyɔ ne ati, mmenia soale ayarefoɛ bɛwale dwaaso, na bɛfale bɛ beguale mba ne bɛen so, kyɛbɔ ɔkɔyɛ ná Petro pɛ nu a, ye wawoɛ kɔtɔ bɛ nu bie so ɔ. 16Na nguro bɔ bapɛ Yerusalem nwo bayia ne, bɛ nu mmenia pee fale b’ayarefoɛ ne bɛ bɔ bele sunzummɔne ɔ bɛwale, na bɛ mukoraa bɛtele apɔ.

Bɛtane asomafoɛ ne nye

17Ɔsɔfo panyi paa ne, ɔne bɛ bɔ bɛboka ye so bɔ befi Sadusiifoɛ fekue ne anu ne, bɛ nye borole asomafoɛ nemɔ, yiti bɛyɛle adwene kyɛ bɛkɔyɔ ye nwo nikye. 18Na ɛhe ati, bɛhyehyele asomafoɛ nemɔ, na bɛfale bɛ beguale kuku nu. 19#Aso 12.7 Nakoso kɔngɔen ne, Awurade abɔfo wale oobukyele kuku nu anoa nemɔ, na ɔyele bɛ fili kuku nu berɛ fitele, na osele kyɛ, 20“Ɛmɔhɔ beegyina asɔneyɛɛ sua ne anu, ná ɛmɔbɔ sɔ ngoa foforɛ he amukoraa nwo dawure behyire mmenia.” 21Na bɛtele sɔ dwirɛ nen, bɛhɔle asɔneyɛɛ sua ne anu alebahyene, bɛɛyɛle ngyerɛkyerɛ. Na ɔsɔfo panyi paa ne, ɔne bɛ bɔ bɛboka ye so ne wale, na bɛtole asaa bɛfrɛle badwafoɛ nemɔ ne Yisrael mbanyi mukoraa maa beyiale, na bɛsomane mmenia kyɛ bɛɛye asomafoɛ ne befi kuku nu dɔ bɛbra. 22Nakoso mmerɛ bɔ asɔneyɛɛ sua nu awɛmvoɛ nemɔ dwuli berɛ nen, bannwu bɛ wɔ kuku nu berɛ; na besa bɛwale badwafoɛ ne berɛ beesele bɛ kyɛ, 23“Yɛnwuni kyɛ batoto kuku nu anoa nemɔ anu yé, bɔ asraafoɛ begyigyi anoa nemɔ asi ɔ; nakoso yɛbukyele nen, yannwu sona biala wɔ nu!” 24Na mmerɛ bɔ asɔneyɛɛ sua nu safohene ne ne asɔfo mbanyi nemɔ tele sɔ dwirɛ nen, bɛyɛle basaa; né bɛngora benwu nikye horɛ bɔ wato asomafoɛ nemɔ ɔ, ɔne edwirɛ bɔ ɔkɔwa ye si ɔ. 25Yeɛ ebie wale badwafoɛ ne berɛ ɔɔbɔle bɛ amaneɛ kyɛ, “Ɛmɔtie! Mmenia nemɔ bɔ ɛmɔhyele bɛ beguale kuku nu nen, begyigyi asɔneyɛɛ sua ne anu dɔ bɛyɛ ngyerɛkyerɛ bekyire mmenia.” 26Yeɛ asɔneyɛɛ sua so safohene ne ne ye asraafoɛ nemɔ hɔle bɛɛfale asomafoɛ nemɔ bɛwale. Banyɔ ye patapaa so, ofikyɛ né besuro kyɛ mmenia kɔboro bɛ nyɔboɛ.

Asomafoɛ nemɔ gyi Yuda badwa nyunu

27Bɛfale asomafoɛ ne bɛwale maa beegyinane dwaa bɔ babɔ ne anu, na ɔsɔfo panyi paa ne sele bɛ kyɛ, 28#Mat 27.25; Aso 4.18 “Aso yammera ɛmɔ kitii kyɛ nnɛma ɛmɔyɛ ngyerɛkyerɛ wɔ sɔ sona he dumaa nu anaa? Nakoso ɛmɔama ɛmɔ ngyerɛkyerɛ ne ato apete Yerusalem amukoraa, na ɛmɔpena kyɛ bɛma sɔ sona he wue ne bɔ yɛ ti so!”

29 # Dan 3.18; Aso 4.19 Yeɛ Petro ne asomafoɛ ngaa ne buale kyɛ, “Ɔsɛ kyɛ yɛtie Nyameɛ yɛtra kuro sona. 30#Aso 3.15 Yɛ nana mɔ Nyameɛ tingyele Yesu bɔ ɛmɔbɔle ye mmeamudua nu behuni ye ne fili ewue nu. 31Ye yeɛ Nyameɛ mane ye so siele ye sa famaa so bɔle ye panyi, na ɔyɛle ye Ngoadefoɛ kyɛ ohyire Yisrael maen atee ma benya adwenesakyera na banya bɔnefakyɛ ɔ. 32#Luk 24.48 Na yɛne Sunzum Krongron ne bɔ ɔte Nyameɛ akyɛdeɛ ma bɛ bɔ bɛyɛ sotie bɛma Nyameɛ ne yɛte edwirɛ he nwo adanzefoɛ.”

Gamaliɛl tu badwafoɛ nemɔ foɛ

33 # Aso 7.54 Na bɛtele sɔ dwirɛ nen, b’ahone huli, na bɛbɔle porɛ kyɛ bekohũ asomafoɛ nemɔ. 34#Aso 22.3 Na badwafoɛ nemɔ anu ko dwɔsole. Ɔte Farasiiniɛ bɔ bɛfrɛ ye Gamaliɛl. Né ɔte mmeraa kyerɛkyerɛniɛ bɔ maen ne anu ama mukoraa bebu ye ɔ; na ɔmaa bɛfale asomafoɛ nemɔ befitele kãa. 35Na osele badwafoɛ nemɔ kyɛ, “Yisraelfoɛ, ɛ́mɔnea yé wɔ nikyee bɔ ɛmɔpena kyɛ ɛmɔfa bɛyɛ sɔ mmenia hemɔ ne anwo. 36Ɛmɔkaye mmerɛ bie bɔ wapɛ nu ɔ kyɛ Teoda mane ye nwo so, na ɔyɛle ye nwo kyɛ sona titire bie, na mmenia kɔyɛ ɛyaa nna fale bɛ nwo bɔle ye lili ye si; nakoso behuni ye, na ye asuafoɛ ne amu bɔle aya, na bɔ ɔyɔle ne angɔanzi pasiliwa biala. 37Ɛhe asi ne, Yudase bɔ ofi Galilea wale wɔ mmerɛ bɔ né bɛka mmenia ɔ, ɔhwene ɛlɔen lili ye si, na ye koso behuni ye, na ye mmenia bɔ beli ye si ne bɔle aya. 38#Mat 15.13 Yiti bɔ mekã mekyire ɛmɔ ɛhe: Nnɛma ɛmɔyɛ nikye fee betia sɔ mmenia hemɔ; ɛ́mɔyakyi bɛ. Ofikyɛ sɛ bɛ nhyehyɛleɛ he anaa b’adwuma he ofi mmenia berɛ a, ongogyina. 39#Aso 9.5 Nakoso sɛ ofi Nyameɛ berɛ a, ɛmɔngɔhora bengogu ye, na sɛ ɛmɔannea yé a, Nyameɛ yeɛ ɛmɔkɔho bekotia ye ɔ.”

40 # Aso 22.19 Yiti bɛfale ye foɛtulɛ ne. Na bɛfale asomafoɛ nemɔ besa bɛwale badwa nu berɛ nen, befini bɛ mbire, na bɛkanzole bɛ kitii kyɛ nnɛma bedwudwo wɔ Yesu dumaa nu, na bɛyakyili bɛ maa bɛhɔle. 41#Mat 5.10-12; 1 Pet 4.13 Na bele anigye befili badwa nu berɛ bɛhɔle, kyɛ babu bɛ kyɛ bɛfata kyɛ Yesu dumaa ti animguaseɛ ɔto bɛ ɔ. 42Na alehyeleɛ biala, bɛhɔle asɔneyɛɛ sua ne anu ne awuro awuro mɔ nu bɛyɛle ngyerɛkyerɛ, na bɛhane Yesu nwo nzɛmba kyɛ ye ole Kristo ne.

Currently Selected:

Asomafoɛ 5: EBP

Highlight

Copy

Compare