Asomafoɛ 4

Petro ne Yohane gyi badwa nyunu

1 # Luk 22.4; 22.52 Na mmerɛ bɔ begu so bedwudwo bekyire mmenia nemɔ nen, asɔfo nemɔ ne asɔneyɛɛ sua ne aso safohene ne Sadusiifoɛ nemɔ bɛwale bɛ so. 2#Aso 23.8 Bɛfɛle ɛyaa paa, ofikyɛ né asomafoɛ nyɔ ne yɛ ngyerɛkyerɛ bekyire mmenia nemɔ kyɛ Yesu awu atingye, bɔ odi adanzeɛ koso kyɛ awufoɛ kotingye ɔ. 3Ɛhe ati bɛhyele bɛ beeguale kuku nu kyɛ aleɛ kye a yeɛ bɛ ne bɛ koli ɔ, ɔnate kyɛ né aleɛ adwo. 4#Aso 2.47 Nakoso bɛ bɔ bɛtele edwirɛ ne, bɛ nu pee bele belili, na mmenia ne somaa ɔɔyɛle kɔyɛ apee nnu.

5Aleɛ hyene ne, Yuda atitirefoɛ ne maen mbanyi ne ahyerɛlɛfoɛ bɛwale beeyiale wɔ Yerusalem. 6Bɛ ne ɔsɔfo panyi paa Anase, yeɛ Kaifa ne Yohane ne Aleksandro ne bɛ bɔ befi ɔsɔfo panyi paa n’abusua nu amu yeɛ beyiale ɔ. 7#Mat 21.23 Bɛfale bɛ beegyinane bɛ nyunu berɛ, na bebisale bɛ kyɛ, “Tumi beni yeɛ ɛmɔgyi so, anaa dumaa beni yeɛ ɛmɔfale so bɛyɔle sɔ nikyee ne ɔ?” 8Na Petro bɔ Sunzum Krongron ayi ye tɛkyɛ ne, obuale bɛ kyɛ, “Maen atitirefoɛ ne mbanyi mɔ, 9sɛ ɛnɛ ɛmɔbisa yɛ dwirɛ bɛfa bubuaniɛ he anwonyerɛsalɛ nwo, kyɛ atee bɔ ɔfale so tele apɔ nwo a, 10ye de ɛmɔ amukoraa ne Yisrael maen amukoraa, ɔsɛ kyɛ Nasarɛteniɛ Yesu Kristo bɔ ɛmɔbɔle ye mmeamudua nu, ná Nyameɛ tingyele ye fili awufoɛ nu ne, ye dumaa nu yeɛ wama biaa he bɔ ogyi ɛmɔ nyunu wa ye ye nwo asa ɔ. 11#Edw 118.22 Na ɛhe ole

‘Nyɔboɛ bɔ ɛmɔ suasilɛfoɛ apo ye,

nakoso waayɛ ndweasoɛ nyɔboɛ titire ɔ.’

12 # Mat 1.21 Na ngoalelɛ nne ebiala nu; ofikyɛ dumaa biala nne nyameɛso bo bɔ bafa bama wɔ adasa mmaa nu bɔ ɔsɛ kyɛ bede yɛ ngoa wɔ nu ɔ.”

13Na benwuni kyɛ Petro ne Yohane b’ahone yɛ se, ná besa benwuni kyɛ bɛte kwahweabaa mɔ bɔ bɛnze nwomaa nen, ɔyɛle bɛ nwanwa; na afei benwuni kyɛ bɛne Yesu yeɛ bɛnatele ɔ. 14#Aso 3.8-9 Na benwuni biaa bɔ wate apɔ bɔ ogyi bɛ nwo berɛ nen, bannya edwirɛ biala banga bandia bɛ. 15Yiti bɛmaa bɛhwene bɛ nwo befili badwa nu berɛ bɛhɔle ahameɛ, na bɛhɔle agyina 16#Yoh 11.47 bebisale bɛ nwo kyɛ, “Mmenia hemɔ koraa, nzikyɛ yeɛ yɛ́fa yɛ́yɛ bɛ ɔ? Ofikyɛ wala ali wɔ ebiala bɔ ɔwɔ Yerusalem ɔ nyunu kyɛ ɔnate bɛ so yeɛ sɛngyerɛnneɛ sonongo he wasi ɔ, na yɛngɔhora yɛngɔkata so. 17#Aso 5.28 Na kyɛ ɔkɔyɛ ná edwirɛ ne ngotene maen ne anu ne, ɛ́mɔma yɛbɔ bɛ kɔkɔ kyɛ nnɛmaa bɛbɔ Yesu dumaa bɛka edwirɛ bekyire ebiala ko.”

18Yiti bɛfrɛle bɛ maa besa bɛwale dwaa ne anu, na bɛberale bɛ kitii kyɛ atee biala nne berɛ kyɛ bekodwudwo anaakyɛ bɛkɔyɛ ngyerɛkyerɛ wɔ Yesu dumaa nu ɔ. 19#Aso 5.29 Na Petro ne Yohane buale bɛ kyɛ, “Sɛ ɔte paa wɔ Nyameɛ nyunu kyɛ yɛtie ɛmɔ yɛtra Nyameɛ a, nzaade ɛmɔ bɔbɔ ɛ́mbua; 20ɔnate kyɛ, bɔ yɛ yanwu ye ná yate ne de, yɛngɔhora yɛngɔyakyi ye hanɛ.” 21Yiti badwafoɛ ne nwunanwunane bɛ bieku, na bɛyakyili bɛ kyɛ bɛhɔ. Benwuni kyɛ bɛngɔhora ngogyina edwirɛ biala so ngɔhwe bɛ so, ofikyɛ né bɔ wasi ne ati ebiala ye Nyameɛ ayɛ. 22Biaa bɔ ɔnate anwanwadeɛ he aso nyane ayaresa nen, né ɔbo afoɛ aburanna.

Agyidifoɛ bɔ mbaeɛ srɛ anwoserɛ

23Bɛyakyili Petro ne Yohane nene, besa bɛwale bɛ mmango nemɔ berɛ, na bɛhane bɔ asɔfo mbanyi ne maen mbanyi nemɔ bɛhane ne amukoraati behyirele bɛ. 24Na bɛtele sɔ dwirɛ nen, bɛyɛle ko bɛmane bɛ komvi so bɛbɔle mbaeɛ behyirele Nyameɛ kyɛ, “Awurade Nyameɛ bɔ ɛbɔle anwuro ne aseɛ ne ɛpo ne bɔ ɔwɔ bɛ nu amukoraa ɔ, 25#Edw 2.1-2 wɔ bɔ ɛnate Sunzum Krongron so edwudwo fale yɛ nana Dawide bɔ ɔte wɔ somvoɛ ne so kyɛ,

‘Nzu ati yeɛ Amaenmaensofoɛ bɛfɛ yaa hahii,

ná maen maen mɔ bɛyɛ nzusuleɛ mbaen ɔ?

26Aseɛ so ahemvo mɔ besiesie bɛ nwo bɛma koɛ,

na atitirefoɛ beyia neka horɛ bedwɔso

betia Awurade ne ye Kristo ne.’

27 # Mat 27.1-2; Mak 15.1; Luk 23.1, 7-11; Yoh 18.28-29 Ɔte nahorɛ, Herode ne Pontio Pilato ne Amaenmaensofoɛ ne Yisrael maen beyiale sɔ kuro he anu bɛbɔle wɔ Ɛwa Krongron Yesu bɔ apopa ye ngoo ne ti so porɛ. 28Beyiale nu bɛfale adwene bɛyɔle nikyee biala kyɛbɔ wɔ tumi ne wɔ nhyehyɛleɛ aha ato berɛ kyɛ okosi ne. 29#Ɛfe 6.19 Awurade, kekesaala ye de, nea b’anwunanwuna ye ná ma wɔ ngoaa ahoneserɛ bɔ yɛkɔfa yɛkɔhã wɔ dwirɛ ne ɔ. 30Kyire wɔ tumi wɔ anwonyerɛsalɛ nu na boka maa yɛgyina wɔ Somvoɛ Krongron Yesu dumaa nu yɛyɔ anwanwadeɛ ne nzɛngyerɛnneɛ.”

31Beyiele mbaeɛ ne bɔ nen, nekaa bɔ beyiale ne wosole. Sunzum Krongron yili bɛ tɛkyɛ, na bɛfale ahoneserɛ bɛbɔle Nyameɛ dwirɛ ne dawure.

Agyidifoɛ kyɛ bɛ nningyein ma bɛ nwo

32 # Aso 2.44-45 Agyidifoɛ fekue ne mane b’adwene yɛle ko. Ebiala le tole nu kyɛ ye nikyee biala bɔ ole ye ne ɔtte ye ngome ye deɛ, na mmom ɔte ebiala bɔ ɔwɔ fekue ne anu deɛ. 33Asomafoɛ ne fale tumi so lili Awurade Yesu wutingyelɛ ne nwo adanzeɛ, na Nyameɛ hwiele adom pee guale bɛ mukoraa so. 34#Aso 2.45 Bɛ nu biala nne berɛ bɔ nikyee hiane ye ɔ, ofikyɛ bɛ bɔ bele aseɛ mɔ ne sua mɔ ne, bɛtɔnetɔnene bɛ, na bɛfale sikaa bɔ benya befili nu ne 35bɛbrɛle asomafoɛ ne; na bɛ koso bɛhyɛ bɛmane ebiala nyane bie, kyɛbɔ ohia ɔ. 36Sɔ ala koso yeɛ Yosef bɔ bɛwole ye Kipro na ofi Lewi abusua nu yɔle ɔ. Asomafoɛ ne tole ye dumaa Banaba (bɔ ye bo kyire “sona bɔ ɔhyɛ nguraen.”) 37Ɔtɔnene ye aseɛ, na ɔfale sikaa ne brɛle asomafoɛ nemɔ.

Currently Selected:

Asomafoɛ 4: EBP

Highlight

Copy

Compare