NĀ ʻŌLELO AKAMAI A SOLOMONA 5
5
MOKUNA V.
1¶ E kuʻu keiki, e hoʻolohe mai i koʻu naʻauao,
E hāliu mai hoʻi kou pepeiao i koʻu ʻike;
2I mālama ʻoe i ke aʻo ʻia mai,
E hoʻopaʻa hoʻi kou mau lehelehe i ka ʻike.
3No ka mea, ʻo nā lehelehe o ka wahine hoʻokamakama he meli ia e kulu ana,
A ua ʻoi aku ka paheʻe o kona waha i ko ka ʻaila.
4Akā, ua ʻawahia kona hope, e like me ka lāʻau ʻawaʻawa,
ʻOiʻoi hoʻi e like me ka pahi kaua ʻoi lua.
5Ke iho ihola kona mau wāwae i ka make,
E pili ana hoʻi kona mau kapuaʻi i ka lua.
6I ʻole ʻoe e noʻonoʻo i ke ala o ke ola,
He loli wale kona noho ʻana i ʻole ʻoe e ʻike aku.
7¶ ʻĀnō lā, e nā keiki, hoʻolohe mai iaʻu,
Mai hāliu aʻe mai ka ʻōlelo aku a kuʻu waha.
8E hoʻoneʻeneʻe loa aku i kou hele ʻana mai ona aku,
Mai hoʻokokoke aku ʻoe i ka puka o kona hale;
9O hāʻawi ʻoe i kou nani i nā mea ʻē,
A me kou mau makahiki hoʻi i ka mea aloha ʻole;
10O lako hoʻi nā mea ʻē i kou mau mea maikaʻi;
A me nā hale o ka malihini i kāu waiwai;
11A uē ʻoe i kou hope,
I ka pau ʻana o kou ʻiʻo a me kou kino;
12A e ʻōlelo hoʻi, “Auē koʻu inaina aku i ka ʻike!
A me ka hoʻowahāwahā ʻana o koʻu naʻau i ke aʻo ʻia mai!
13“ʻAʻole au i hoʻolohe i ka leo o kaʻu mau kumu,
ʻAʻole hoʻi i hāliu aku koʻu pepeiao i ka poʻe i aʻo mai iaʻu!
14“Mai noho au ma nā hewa a pau loa,
Ma waena o ke anaina a me ka ʻaha kanaka.”
15¶ E inu ʻoe i ka wai no loko aʻe o kou pūnāwai,
A i nā waikahe hoʻi no loko aʻe o kou kahawai.
16E hū aku i waho kou mau loko wai,
A kahe nā ʻauwai ma nā alanui.
17Nāu wale iho nō lākou,
ʻAʻole na ka poʻe malihini pū me ʻoe.
18E hoʻomaikaʻi ʻia kou pūnāwai;
A e ʻoliʻoli ʻoe me ka wahine o kou wā uʻi.
19He dia aloha ia a me ka ʻibeka ʻoluʻolu;
E māʻona ʻoe i nā lā a pau i kona mau waiū,
E ana mau ʻoe i kona aloha.
20No ke aha lā e ʻona ʻoe, e kuʻu keiki, i ka wahine ʻē,
A e ʻapo ʻoe i ka wahine a haʻi ma kou umauma?
21No ka mea, e kau pono ana nā maka o Iēhova i ka ʻaoʻao o ke kanaka,
E ʻike ana nō hoʻi i kona mau ʻaoʻao a pau.
22E puni ka mea hewa i kona hala iho,
E hei ʻia hoʻi ʻo ia i ka hei o kona hewa iho.
23E make ʻo ia me ke aʻo ʻole ʻia mai;
A e hele hewa ʻo ia i ka nui o kona naʻaupō ʻana.
Ka Baibala Hemolele © Partners Development Foundation, 2018.