NĀ ʻŌLELO AKAMAI A SOLOMONA 4
4
MOKUNA IV.
1¶ E hoʻolohe mai, e nā keiki, i ke aʻo ʻana a ka makua,
E hāliu mai hoʻi e ʻike i ka naʻauao.
2No ka mea, he ʻike pono kaʻu e hāʻawi aku nei iā ʻoukou,
Mai haʻalele ʻoukou i koʻu kānāwai.
3No ka mea, he keiki nō wau a koʻu makua,
He mālama ʻia, a he hānau kahi i mua o koʻu makuahine.
4Aʻo maila ʻo ia, ʻī maila iaʻu,
“E hoʻopaʻa kou naʻau i kaʻu ʻōlelo;
E mālama hoʻi i kaʻu mau kauoha i ola ʻoe.
5“E ʻimi i ka naʻauao, e ʻimi hoʻi i ka ʻike a loaʻa!
Mai hoʻopoina, mai waiho wale i nā ʻōlelo a koʻu waha.
6“Mai haʻalele ʻoe ia mea, a nāna ʻoe e mālama mai;
E aloha ʻoe iā ia, a nāna ʻoe e kiaʻi mai.
7“ʻO ka naʻauao ka mea nui, e ʻimi i ka naʻauao a loaʻa;
Me nā mea a pau āu e ʻimi ai,
E ʻimi pū i ka ʻike a loaʻa.
8“E hoʻonani ʻoe iā ia, nāna ʻoe e hoʻokiʻekiʻe aʻe;
E hoʻohanohano iā ʻoe i kou wā e hoʻopaʻa aku ai iā ia.
9“E hāʻawi mai ia i lei aloha no kou poʻo;
He lei hanohano hoʻi kāna e hāʻawi mai ai iā ʻoe.”
10¶ E hoʻolohe mai, e kuʻu keiki, e hoʻopaʻa i kaʻu ʻōlelo;
A e nui aʻe hoʻi iā ʻoe nā makahiki o kou ola ʻana.
11E aʻo aku au iā ʻoe ma ka ʻaoʻao naʻauao,
E kuhikuhi hoʻi au iā ʻoe ma ke ala pololei.
12I kou hele ʻana, ʻaʻole e hihia kou kapuaʻi;
A inā e holo ʻoe ʻaʻole e hina.
13E hoʻopaʻa ʻoe i ke aʻo ʻia mai, mai hoʻokuʻu ʻoe;
E mālama ʻoe iā ia; no ka mea, he ola ia nou.
14Ma ke alanui o ka poʻe hewa, mai hele ʻoe,
Mai hele hoʻi ma ka ʻaoʻao o ka poʻe hewa.
15E haʻalele ia wahi, mai māʻalo i laila,
E huli aʻe mai ia wahi mai, a e hele aku.
16No ka mea, ʻaʻole o lākou hiamoe, ke hana hewa ʻole aku;
Ua lele hoʻi ka hiamoe, ke hoʻohina ʻole ʻia kekahi e lākou.
17No ka mea, ʻai lākou i ka berena no ka hewa,
Inu hoʻi lākou i ka waina no ke kāʻili wale.
18Akā, ʻo ke ala o ka poʻe pono, ua like ia me ka mālamalama e ʻaʻā ana,
E māhuahua mau ana i ke awakea loa.
19ʻO ka ʻaoʻao o ka poʻe hewa, ua like ia me ka pouli;
ʻAʻole i ʻike i ko lākou mea e hina ai.
20¶ E kuʻu keiki ē, e hāliu mai i kaʻu ʻōlelo,
I kaʻu ʻōlelo hoʻi e huli mai ai i ka pepeiao.
21Mai noho a nalowale ia mai kou mau maka aku;
E mālama ʻoe ia i loko o kou naʻau.
22No ka mea, he ola ia no nā mea i loaʻa ai ia,
He lāʻau hoʻōla hoʻi no ke kino a pau.
23E kiaʻi ʻoe i kou naʻau me ka mālama loa;
No ka mea, no loko o laila ka wai puna o ke ola.
24E waiho aku ʻoe i ka waha wahaheʻe wale,
E haʻalele loa hoʻi i nā lehelehe hoʻopunipuni.
25I nānā pono aʻe kou mau maka,
I pololei hoʻi kou mau lihilihi ma mua ou.
26E hoʻopololei aʻe i ke ala no kou mau kapuaʻi,
A e pololei hoʻi kou hele ʻana a pau.
27Mai huli aʻe ʻoe i ka lima ʻākau ʻaʻole hoʻi i ka lima hema;
E huli naʻe kou wāwae mai ka hewa aku.
Currently Selected:
NĀ ʻŌLELO AKAMAI A SOLOMONA 4: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.