NĀ ʻŌLELO AKAMAI A SOLOMONA 6
6
MOKUNA VI.
1¶ E kuʻu keiki, inā e hoʻohiki ʻoe e pānaʻi no kou hoalauna,
Inā i paʻi kou lima me ka malihini,
2A i puni ʻoe i ka ʻōlelo a kou waha,
A i punihei ʻoe i ka ʻōlelo a kou waha.
3ʻĀnō lā, e kuʻu keiki, e hana ʻoe i kēia, i pakele,
I kou lilo ʻana i ka lima o kou hoalauna;
Ō hele, e hoʻohaʻahaʻa iā ʻoe iho, e hoʻolauleʻa i kou hoalauna.
4Mai hāʻawi i ka hiamoe i kou mau maka,
ʻAʻole hoʻi e pipili kou mau lihilihi;
5E hemo aku ʻoe me he dia lā mai loko aʻe o ka lima,
A e like hoʻi me ka manu mai ka lima aʻe o ke kūhea manu.
6¶ E ka mea hiamoe, e hele ʻoe i ka ʻanonanona,
E nānā i kona ʻaoʻao a e hoʻonaʻauao iho
7ʻAʻohe aliʻi iā ia,
ʻAʻole haku, ʻaʻole hoʻi luna kānāwai;
8Hoʻāhu nō ʻo ia i kāna ʻai i ke kau,
I ka wā e ʻohi ai, hōʻiliʻili ʻo ia i kāna mea ʻai.
9E ka mea hiamoe, pehea ka lōʻihi o kou hiamoe ʻana?
Āhea lā ʻoe e ala mai ai mai kou hiamoe ʻana mai?
10“He moe iki aʻe, he hiamoe iki aʻe,
He pelu hou iki aʻe i ka lima a hiamoe”;
11A e hiki mai kou ʻilihune me he kanaka hele lā,
A me kou nele e like me ke kanaka kaua.
12¶ ʻO ke kanaka ʻaiā, ʻo ke kanaka hewa,
Hele nō ʻo ia me ka waha hoʻopunipuni.
13ʻIʻimo ʻo ia me ka maka, aʻo aku ʻo ia me ka wāwae,
Kuhikuhi ʻo ia me kona manamana lima;
14He kolohe nō ma kona naʻau,
Noʻonoʻo ʻino ʻo ia i nā lā a pau,
Hoʻokonokono ʻo ia i ka hakakā.
15No laila, e loʻohia koke mai ʻo ia e ka make;
E haʻihaʻi koke ʻia ʻo ia, ʻaʻole mea nāna e hoʻōla.
16¶ ʻO kēia mau mea ʻeono, he mau mea e inaina mai ai ʻo Iēhova;
ʻEhiku hoʻi e hoʻopailua ai ʻo kona naʻau.
17ʻO nā maka kiʻekiʻe, ʻo ke elelo wahaheʻe,
A me nā lima hoʻokahe koko hala ʻole,
18ʻO ka naʻau e ʻimi ana i nā manaʻo kolohe,
A me nā wāwae e holo kikī ana i ka hewa,
19ʻO ka mea hōʻike hoʻopunipuni e hana ana i ka wahaheʻe,
A me ka mea hoʻokonokono i ka hakakā ma waena o nā hoahānau.
20¶ E kuʻu keiki, e mālama ʻoe i ke kauoha a kou makua kāne,
Mai haʻalele hoʻi i ke kānāwai o kou makuahine.
21E hāwele mau ʻoe i mau mea ma kou naʻau,
E nākiʻi ʻoe ia mau mea ma kou ʻāʻī.
22I kou hele ʻana, ʻeā, e kaʻi aku ia iā ʻoe;
I kou moe ʻana e kiaʻi ʻo ia ma luna ou;
I kou ala ʻana i luna, ʻo ia ke kamaʻilio pū me ʻoe.
23No ka mea, he kukui ke kauoha,
He mālamalama ke kānāwai,
ʻO ka ʻaoʻao o ke ola ʻo ia ke aʻo ʻana e naʻauao ai;
24I mālama ʻia ʻoe i ka wahine ʻino,
I ka malihini i hoʻomalimali me kona elelo.
25Mai kuko aku i kona maikaʻi ma loko o kou naʻau,
ʻAʻole hoʻi e punihei ʻia e kona mau lihilihi.
26No ka mea, no ka wahine hoʻokamakama,
E nele ke kanaka a i ka ʻāpana ʻai;
Hoʻohālua nō ka wahine moekolohe i ka ʻuhane i minamina ʻia.
27E lawe anei ke kanaka i ke ahi ma kona poli,
ʻAʻole hoʻi e wela kona kapa?
28Inā e hele ke kanaka ma nā nānahu e ʻaʻā ana,
ʻAʻole anei e wela kona kapuaʻi?
29Pēlā ka mea e komo aʻe ana i ka wahine a kona hoalauna;
ʻAʻole e ʻāpono ʻia nā mea hoʻopā iā ia.
30ʻAʻole i hoʻowahāwahā ʻia ka ʻaihue i kona ʻaihue ʻana,
Inā he mea ia e māʻona ai kona pōloli.
31Akā, i loaʻa ʻo ia, e uku pāhiku nō,
E hāʻawi ʻo ia i ka waiwai a pau o kona hale.
32ʻO ka mea moekolohe me ka wahine, ʻaʻole ona naʻauao;
ʻO ka make o kona ʻuhane kāna i hana ai.
33E loaʻa iā ia ka ʻeha a me ka hoʻowahāwahā ʻia mai.
ʻAʻole hoʻi e holoi ʻia kona mea e hilahila ai.
34No ka mea, ʻo ka lili, ʻo ia ko ke kanaka mea e ukiuki ai;
ʻAʻole ʻo ia e hoʻopakele i kona lā e hoʻopaʻi aku ai.
35ʻAʻole ʻo ia e manaʻo mai i ka uku;
ʻAʻole hoʻi ʻo ia e ʻoluʻolu, ke hāʻawi mai ʻoe i nā makana he nui.
Currently Selected:
NĀ ʻŌLELO AKAMAI A SOLOMONA 6: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.