NĀ ʻŌLELO AKAMAI A SOLOMONA 3
3
MOKUNA III.
1¶ E kuʻu keiki, mai haʻalele ʻoe i koʻu kānāwai,
E waiho hoʻi i kaʻu mau kauoha ma kou naʻau.
2No ka mea, ʻo ia ka mea e nui ai nā lā a me nā makahiki o kou ola ʻana,
A ʻo ka malu hoʻi e hāʻawi ʻia iā ʻoe.
3I ʻole e haʻalele iā ʻoe ka lokomaikaʻi a me ke aloha;
E hāwele ia mau mea ma kou ʻāʻī;
E kākau hoʻi ma ka papa o ka naʻau.
4Pēlā e loaʻa ai ka lokomaikaʻi a me ka ʻike ʻoiaʻiʻo,
I mua o Iēhova a me nā kānaka.
5E paulele iā Iēhova me kou naʻau a pau;
Mai hilinaʻi hoʻi ma kou naʻauao iho.
6Ma kou ʻaoʻao a pau iā ia nō ʻoe e nānā aku ai,
A nāna nō e hoʻopololei i kou hele ʻana.
7Mai hoʻoakamai ʻoe ma kou manaʻo iho;
E makaʻu iā Iēhova a e haʻalele i ka hewa.
8ʻO ia ke ola no kou mau olonā,
A me ka lolo no kou mau iwi.
9E hoʻonani iā Iēhova ma kou waiwai,
A me nā hua mua o nā mea a pau i loaʻa ai iā ʻoe;
10A laila, e hoʻopiha ʻia kou waihona waiwai a hū,
E hū aʻe kāu mau mea kaomi waina i ka waina hou.
11E kuʻu keiki, mai hōʻole ʻoe i ke aʻo ʻia mai e Iēhova;
Mai pauaho ʻoe i kona hoʻoponopono ʻana mai.
12No ka mea, ʻo ka mea a Iēhova i aloha ai ʻo ia kāna i paʻipaʻi mai,
Me he makua lā i ke keiki āna i makemake ai.
13¶ Pōmaikaʻi ke kanaka ke loaʻa iā ia ka naʻauao,
A ʻo ke kanaka hoʻi i mākaukau i ka ʻike.
14No ka mea, ua ʻoi aku ka waiwai o ia mea ma mua o ke kālā,
A ʻo ke kūʻai ʻana hoʻi ma mua o ke gula.
15Ua maikaʻi ʻo ia ma mua o nā momi;
A ʻo nā mea a pau āu e makemake ai, ʻaʻole e like me ia ka maikaʻi.
16Aia ma kona lima ʻākau ka lōʻihi o nā lā;
A ma kona lima hema ka waiwai a me ka hanohano.
17ʻO kona mau ʻaoʻao he mau ʻaoʻao ʻoluʻolu nō,
Ua pau hoʻi kona mau alanui i ka maluhia.
18ʻO ia ka lāʻau o ke ola no ka poʻe e hoʻopaʻa ana iā ia,
Pōmaikaʻi hoʻi ka mea e ʻapo ana iā ia.
19Ma ke akamai i hoʻokumu iho ai ʻo Iēhova i ka honua;
A ma ka ʻike i kau aku ai i ka lani.
20Ma kona ʻike hoʻi i wāwahi ʻia ai nā wahi hohonu,
A ninini mai nō nā ao i ka ua.
21E kuʻu keiki ē, mai huli ʻē aku kou mau maka;
E hoʻopaʻa i ka naʻauao a me ka ʻike.
22He ola nō ia no kou ʻuhane,
He hanohano nō ia i kou ʻāʻī.
23A laila, e hele makaʻu ʻole ʻoe ma kou ala,
A ʻo kou wāwae hoʻi, ʻaʻole ia e palaha.
24I kou moe ʻana, ʻaʻole ʻoe e makaʻu;
E moe iho nō ʻoe, a e ʻoluʻolu kou hiamoe ʻana.
25Mai weliweli ʻoe i ka mea e makaʻu ai ke hikilele mai,
ʻAʻole hoʻi i ka luku ʻana o ka poʻe hewa ke hiki mai.
26No ka mea, ʻo Iēhova nō kou mea e paulele ai,
E mālama nō ʻo ia i kou wāwae i ʻole nō e hei ʻia.
27¶ Mai ʻauʻa ʻoe i ka maikaʻi i ka mea e pono ai ia,
Ke hiki i kou lima ke hana aku.
28Mai ʻōlelo ʻoe i kou hoa noho,
“Ō hele ʻoe a hoʻi mai, ʻapōpō e hāʻawi aku au,”
Ke waiho wale ia mea iā ʻoe.
29Mai ʻimi hala ʻoe i kou hoa noho,
No ka mea, ke noho lā ʻo ia ma ou lā me ka maluhia.
30Mai hoʻopaʻapaʻa hala ʻole ʻoe me ke kanaka,
Inā ʻaʻole ʻo ia i hana hewa aku iā ʻoe.
31Mai hoʻohālike ʻoe me ke kanaka huhū,
Mai koho hoʻi ʻoe i kekahi ʻaoʻao ona.
32No ka mea, he mea hoʻopailua ka ʻaiā iā Iēhova,
ʻO ka poʻe pololei ʻo ia kona poʻe hoa kūkā.
33ʻO ka hōʻino o Iēhova aia ma ka hale o ka mea hewa,
Hoʻopōmaikaʻi ʻo ia i kahi noho ai ʻo ka poʻe pono.
34E hoʻowahāwahā mai ʻo ia i ka poʻe hoʻowahāwahā;
E hāʻawi mai ʻo ia i ka lokomaikaʻi i ka poʻe i haʻahaʻa ka naʻau.
35E ili mai ka hanohano no ka poʻe naʻauao;
ʻO ka hoʻokiʻekiʻe ʻia mai o ka poʻe hewa, he mea hilahila ia.
Currently Selected:
NĀ ʻŌLELO AKAMAI A SOLOMONA 3: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.