NĀ ʻŌLELO AKAMAI A SOLOMONA 2
2
MOKUNA II.
1¶ E kuʻu keiki, inā e lawe ʻoe i kaʻu mau ʻōlelo,
A e waiho pū me ʻoe i koʻu kānāwai;
2E hāliu mai kou pepeiao i ka naʻauao,
A e huli kou naʻau i ka ʻike;
3Inā paha e hea aku ʻoe i ka ʻike,
A e ō aku kou leo i ka naʻauao;
4Inā e ʻimi aku ʻoe iā ia me he kālā lā,
A e huli hoʻi iā ia me he waiwai huna lā;
5A laila, e ʻike ʻoe i ka makaʻu iā Iēhova,
A e loaʻa iā ʻoe ka ʻike i ke Akua.
6No ka mea, na Iēhova e hāʻawi mai i ka naʻauao;
Mai kona waha mai ka ʻike a me ka noʻiau.
7Hoʻāno ʻē ʻo ia i ke ola no ka poʻe pono;
He pākū ia no ka poʻe hele pololei;
8E mālama i nā ala o ka mea hoʻopono,
E kiaʻi hoʻi i ka ʻaoʻao o kona poʻe haipule.
9A laila, e ʻike ʻoe i ka pono a me ka hoʻopono,
A me ka pololei a me nā ʻaoʻao maikaʻi a pau.
10No ka mea, e komo ka naʻauao i loko o kou naʻau,
E ʻono hoʻi ka ʻike i kou ʻuhane.
11Na ke akamai ʻoe e mālama aku,
ʻO ka noʻiau hoʻi ke kiaʻi iā ʻoe,
12E hoʻopakele iā ʻoe mai ka ʻaoʻao hewa aku,
Mai ke kanaka hoʻi i wahaheʻe ka ʻōlelo;
13Haʻalele lākou i ka ʻaoʻao pololei,
I hele ai hoʻi ma nā ala o ka pouli.
14ʻOliʻoli lākou ke hana hewa,
Hauʻoli hoʻi lākou i ka ʻino o ka mea ʻaiā.
15ʻO lākou ke hoʻokekeʻe i ko lākou hele ʻana,
Kekeʻe wale hoʻi ma ko lākou ʻaoʻao;
16I hoʻopakele ʻia ʻoe i ka wahine ʻē,
I ka wahine malihini i hoʻomalimali ka ʻōlelo.
17ʻO ia kai haʻalele i ke alakaʻi o kona wā ʻōpiopio,
A hoʻopoina hoʻi i ka berita o kona Akua.
18No ka mea, e hina ana kona hale i lalo i ka make,
A ʻo kona mau ala hoʻi ma kahi o ka poʻe make.
19ʻO ka poʻe a pau e komo aku i ona lā, ʻaʻole e hoʻi hou mai,
ʻAʻole hoʻi e hiki aku lākou i ke ala o ke ola.
20I hele ʻoe ma ke ala o ka poʻe pono,
I mālama hoʻi ʻoe i ka ʻaoʻao o ka poʻe pololei.
21No ka mea, e noho paʻa ka poʻe maikaʻi ma ka ʻāina,
A e mau nō ma laila ka poʻe pololei.
22Akā, e ʻoki ʻia ana ka poʻe hewa mai loko aku o ka ʻāina,
A e uhuki ʻia hoʻi ka poʻe lawehala ma laila aku.
Currently Selected:
NĀ ʻŌLELO AKAMAI A SOLOMONA 2: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.