Lalai amli Lala 8
8
1Ao, mina ni kulɛ
minyɛmi nuu ni ye minyɛ fufɔ ji bo.
Kulɛ kɛ mina bo yɛ agbo naa
ni mishwɔ onaa lɛ,
mɔ ko shwaŋ mi po.
2Kulɛ manyiɛ ohiɛ kɛya minyɛ we lɛ,
manyiɛ ohiɛ kɛya minyɛ awo ni fɔ mi sɛɛtsuŋ.
Ni mahã bo wain ni jeɔ ŋma onu;
ni tamɔ migranata dãa.
3Mina ni kulɛ miyitso tsɔle enine abɛku
ni ekɛ eninejurɔ efua mi atuu.
4Nyɛ Yerusalɛm biyei,
nyɛwoa mi shi veveeve akɛ,
nyɛhosoŋ misuɔlɔ lɛ,
ni nyɛkatsiɛ̃a ehiɛ hu,
kɛyaashi be ni lɛ diɛŋtsɛ esumɔɔ.
Lala ni ji ekpaa
Yei lɛ
5Namɔ ji yoo nɛɛ
ni jɛ ŋa lɛ nɔ baa
ni ekɛ esuɔlɔ ela kɛ baa nɛɛ?
Mi mitsiɛ̃ ohiɛ yɛ akututso lɛ shishi,
jɛi ji he ni onyɛ kɔ̃mɔ bo yɛ,
jɛi onyɛ ni fɔ bo lɛ kɔ̃mɔ bo yɛ.
Yoo lɛ
6Sɔomɔ minaa owo otsui mli
tamɔ adikiɔ nine he lɛ.
Okɛ yoo ko yoo ko akala,
ja mi pɛ.
Ejaakɛ suɔmɔ he wa tamɔ gbele;
ni awuŋayeli hu yi wa tamɔ gbele.
Ehereɔ tamɔ la,
ni etsoɔ grigri.
7Nu babaoo po nyɛɛɛ suɔmɔ agbe,
ni nu afua tete nyɛɛɛ lɛ ashiu.
Kɛji mɔ ko ŋɔ eshĩaŋ nɔ fɛɛ nɔ ehã
ekɛmiihe suɔmɔ lɛ,
ŋmɔ abaaŋmɔ lɛ.
Yoo lɛ nyɛmimɛihii lɛ
8Wɔyɛ nyɛmi yoo fioo ko
ni ejeko fufɔ.
Mɛni wɔɔfee wɔhã wɔnyɛmi yoo nɛɛ,
gbi ni aaaba akɛ abaatsɛ ehebaa lɛ?
9Eji gbogbo ji lɛ kulɛ
wɔɔma jwiɛtɛi mɔɔ ni kwɔ
wɔma enɔ.
Eji shinaa ji lɛ kulɛ
wɔkɛ tsenedrutsei ŋmoŋmolo aaaha ehe.
Yoo lɛ
10Mi lɛ, gbogbo ji mi,
ni mifufɔi mamɔ shi tamɔ mɔji.
Ni yɛ misuɔlɔ lɛ hiɛ lɛ,
mitsui nyɔɔ mimli,
ni minaa hejɔlɛ.
Nuu lɛ
11Solomon yɛ waintrom ko ni atsɛɔ jɛi Baal-Hammon.
Ekɛ waintrom lɛ hã mɛi ni amɛhu mli.
Amɛteŋ mɔ fɛɛ mɔ woɔ jwiɛtɛi kukuji akpe
akɛ adɔde.
12Miwaintrom, ni ji mi diɛŋtsɛ minɔ lɛ,
mikoome minɔ ni.
Bo Solomon, ooona akpe lɛ,
ni mɛi ni ji apaafoi lɛ aaana ohai enyɔ.
13Ao, bo mɔ ni oyɔɔ abɔi lɛ amli,
minanemɛi lɛ miibo ogbee toi.
Hã mi hu manu ogbee lɛ.
Yoo lɛ
14Ohe afee oya, misuɔlɔ,
ofoi awa tamɔ soŋai,
tamɔ ofrote oblanyo
yɛ tsofakɛŋma gɔji lɛ anɔ.
Currently Selected:
Lalai amli Lala 8: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
