Lalai amli Lala 7
7
Nuu lɛ
1Bo lumɔ biyoo,
Onajifãamɔi yɛ otokotai amli
yɛ fɛo naakpa!
Oshuɔji yɛ fɛo
tamɔ jwinei ni ŋaalɔ nukpa kɛ eniji fee.
2Olaŋmɔ tamɔ likɔlikɔ kokroo
ni wain ni ŋɔɔ etãko yɛ mli dã.
Omusu tamɔ ŋmãa ku,
ni akɛ oflɔ fɔfɔii etserɛ he.
3Ofufɔi tamɔ ofrote bii enyɔ,
loo tamɔ soŋaibii hãaji.
4Okuɛ kɛ tamɔ shuɔwu mɔɔ.
Ohiŋmɛii tamɔ Heshbon kpaakpoi
ni yɔɔ Bat-Rabbim maŋ lɛ agbo
lɛ he lɛ.
Ogugɔ yɛ fɛo tamɔ Lebanon mɔɔ
ni kwɔ ni hiɛ kwɛɔ Damasko gbɛ lɛ.
5Oyitso ni ma onɔ tamɔ Karmel Gɔŋ;
Oyitsɔi akuklui tamɔ mama afaseo.
Oyitsɔi fɛo lɛ ŋɔɔ maŋtsɛ nom.
6Mishieŋnyɛ, ohe yɛ fɛo,
ni ohe yɛ akɔnɔ akɛ nɔ ko.
7Oje oblaŋ tamɔ tɛŋ,
ni ofufɔi tamɔ ŋmedurui.
8Mikɛɛ, “Makwɔ tɛŋ lɛ,
ni mamɔmɔ eniji lɛ amli.
Ao, mina ofufɔi tamɔ
waintso yibii ŋmedurui,
ni mumɔ ni jɛɔ ogugɔ mli jeɔ
ŋma tamɔ aadɔŋ.”
Yoo lɛ
9Mina ni onaashwɔmɔ ŋɔɔmɔ
tamɔ wain kpakpa fe fɛɛ
ni tsɔ̃ɔ naabu kɛ nyanyɔŋ teŋ,
kɛyaa omusuŋ tɔ̃ɔ.
10Mi lɛ, misuɔlɔ lɛ nɔ ji mi.
Ni mi ji mɔ ni eshweɔ.
11Misuɔlɔ, ba ni wɔtee ŋa lɛ nɔ,
ni wɔyato gbɔ
yɛ akrowai lɛ amli.
12Hã wɔte shi maŋkɛ mra,
ni wɔya waintromii lɛ amli,
ni wɔyakwɛ akɛ waintso lɛ miifrɔke
ni eegba afofro,
ni maŋotsei lɛ hu
egba afofro lo?
Jɛi mikɛ misuɔmɔ baahã bo yɛ.
13Ao! Misuɔlɔ suɔmɔ yibii lɛ miije ŋma,
ni tso yibii ni jara wa srɔtoi fɛɛ yɛ wɔshinaa lɛ shi.
Mikɛ ememeji kɛ ehei fɛɛ eto ehã bo.
Currently Selected:
Lalai amli Lala 7: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
