Yesaia WOLO LƐ HE SANE
WOLO LƐ HE SANE
Gbalɔ kpanaa ko ni hi shi yɛ Yerusalɛm ni atsɛɔ lɛ Yesaia lɛ gbɛi akɛwo wolo nɛɛ. Gbalɔ nɛɛ hi shi yɛ afii 800 Dani Afɔ Kristo lɛ mli. Aaanyɛ ajara wolo lɛ mli etɛ̃:
1. Yitsei 1-39. Yitsei nɛɛ kɔɔ be ni Yuda ni ji wuoyigbɛ maŋtsɛyeli lɛ she gbeyei akɛ Asiria baaba ebatua lɛ lɛ he. Ejaakɛ nɛkɛ be nɛɛ mli lɛ, Asiria ji maŋ ko ni yɔɔ hewalɛ jogbaŋŋ. Yesaia na akɛ gbeyei ni Yuda sheɔ lɛ lɛ, ejɛɛɛ hewalɛ kple ni Asiria yɔɔ lɛ kɛkɛ hewɔ, shi moŋ ejɛ enɛɛmɛi, eshai ni Yuda jaku lɛ diɛŋtsɛ efee, Nyɔŋmɔ nɔ toi ni amɛgbo lɛ, kɛ Nyɔŋmɔ nɔ ni amɛheee amɛyeee lɛ hu. Gbalɔ nɛɛ kɛ edaaŋ wiemɔi kɛ enifeemɔnii tsɔ̃ɔ maŋbii lɛ kɛ amɛmaŋ onukpai nibii anaa fitsofitso, ni ebi amɛ akɛ amɛfee nɔ ni ja, ni amɛye jalɛ sane hu. Asaŋ ebɔ amɛ kɔkɔ akɛ kɛji amɛbooo Nyɔŋmɔ toi lɛ, no lɛ amɛyi baatɔ̃, ni amɛjaku lɛ hiɛ baakpãtã. Yesaia gba hu akɛ be ko baaba ni toiŋjɔlɛ baaba jeŋjeŋ hei fɛɛ, ni mɔ ko baajɛ David shwie mli ni ebaye maŋtsɛ krɔŋŋ.
2. Yitsei 40-55. Biɛ sane lɛ kɔɔ be mli ni Yudabii babaoo yɔɔ nomŋɔɔ mli yɛ Babilon lɛ he. Gbɔmɛi nɛɛ efee bliboo, ni amɛhiɛnɔkãmɔ fɛɛ etã. Gbalɔ lɛ gba akɛ eshwɛ fioo ni Nyɔŋmɔ baakpɔ̃ ewebii lɛ koni amɛye amɛhe, asaŋ ebaakpla amɛ kɛya amɛmaŋ ni ji Yerusalɛm koni amɛyaje shihilɛ hee shishi. Sane kome ko ni ama nɔ mi yɛ yitsei nɛɛ amli ji akɛ Nyɔŋmɔ ji Nuŋtsɔ ni yeɔ jeŋ maji fɛɛ anɔ, ni gbɛjianɔ ni eto yɛ ewebii lɛ ahe ji akɛ ebaatsu amɛ jeŋ majimaji fɛɛ anɔ koni amɛyashiɛ, ni kɛtsɔ̃ Israel nɔ lɛ, ebaajɔɔ maji lɛ. Wiemɔi ni kɔɔ “Nuŋtsɔ lɛ Tsulɔ” lɛ he ni ale jogbaŋŋ yɛ Kpãŋmɔ Momo lɛ mli lɛ, titri yɛ Yesaia wolo nɛɛ mli.
3. Yitsei 56-66. Mɛi ni ejɛ nomŋɔɔ mli eba Yerusalɛm ekoŋŋ lɛ titri ahe yitsei nɛɛ amli wiemɔi lɛ kɔɔ. Ehia akɛ ahã gbɔmɛi nɛɛ ana hiɛnɔkãmɔ hee akɛ shi ni Nyɔŋmɔ ewo amɛjaku lɛ ebaaye nɔ. Akpã awo maŋbii lɛ atoiŋ veveeve akɛ amɛfee nɔ ni ja, ni amɛye jalɛ sane; asaŋ amɛye hejɔɔmɔgbi lɛ kɛ afɔleshãa kɛ sɔlemɔ he mlai lɛ anɔ. Wolo lɛ mli wiemɔ ko ni yɔɔ 61.1-2 lɛ, no ji wiemɔ ni Yesu kɛje enitsumɔ lɛ shishi, ekɛtsɔ̃ɔ nɔ tsumɔ ni eba lɛ.
Mlijaramɔi
Kɔkɔbɔi kɛ shiwoi 1.1—12.6
Maji lɛ atoigblamɔ 13.1—23.18
Bɔ ni Nyɔŋmɔ baakojo je lɛ aha 24.1—27.13
Kɔkɔbɔi kɛ shiwoi krokomɛi 28.1—35.10
Yuda Maŋtsɛ Hezekia kɛ Asiriabii 36.1—39.8
Shiwoi kɛ hiɛnɔkãmɔ he wiemɔi 40.1—55.13
Kɔkɔbɔi kɛ shiwoi 56.1—66.24
Currently Selected:
Yesaia WOLO LƐ HE SANE: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.