Lalai amli Lala 5
5
Nuu lɛ
1Minyɛmi yoo, miyɛmfro,
miba mitrom lɛ mli,
miibua mimire kɛ tsofaikɛŋmai anaa.
Miiye miwo agbaku kɛ emli wo lɛ.
Miinu miwain kɛ mifufɔ lɛ.
Yoo lɛ
Minanemɛi, nyɛyea ni nyɛnua,
ni nyɛ, suɔlɔi, nyɛnua ni nyɛtɔrɔa!
Lala ni ji ejwɛ
Yoo lɛ
2Be ni miwɔ lɛ, mitsui hiɛ kã.
Naa! Mishieŋtsɛ miishi shinaa lɛ.
Nuu lɛ
Minyɛmi yoo, misuɔlɔ!
Mikosɛɛ okpo, misuɔlɔ ni fe fɛɛ,
bɔ efɔ miyitsei ahe fɛɛ;
miyitsɔi akuklui lɛ
eyi obɔ̃ kɛ nyɔɔŋ bɔ.
Yoo lɛ
3Mijie mitade lɛ;
mɛni hewɔ mawo ekoŋŋ?
Mifɔ minaji ahe,
mɛni hewɔ mawo amɛhe muji ekoŋŋ?
4Misuɔlɔ lɛ kpã enine mli
ekɛmɔ klɔklɔ lɛ mli,
kɛkɛ ni mitsui tswa kɛ miishɛɛ.
5Mite shi ni mayagbele misuɔlɔ lɛ,
mire tsere yɛ miniji ahe,
mire ŋleŋle tsere
yɛ miwaobii ahe shwie
shinaa klɔklɔ lɛ nɔ.
6Shi be ni migbele misuɔlɔ lɛ,
etsɔ̃ ehe etee momo.
Mishwe akɛ manu egbee.
Mitao lɛ, shi minaaa lɛ.
Mitsɛ lɛ, shi ehereee mi nɔ hu.
7Bulɔi lɛ na mi
be ni amɛnyiɛ amɛbuɔ yɛ maŋ lɛ mli lɛ.
Amɛtswia mi nii, ni amɛpila mi.
Gbogbo nɔ bulɔi lɛ shɔ̃ mihiɛhaanɔ lɛ.
8Nyɛ Yerusalɛm biyei,
nyɛwoa mi shi veveeve akɛ
kɛji nyɛna misuɔlɔ lɛ,
nyɛkɛa lɛ akɛ,
suɔmɔ ewo mi hela.
Yei lɛ
9Bo yoo ni ohe yɔɔ fɛo
fe yei fɛɛ,
Mɛni osuɔlɔ lɛ kɛfe suɔlɔ
kroko,
hewɔ ni obiɔ akɛ wɔwo bo shi veveeve nɛɛ?
Yoo lɛ
10Misuɔlɔ lɛ he yɛ fɛo,
ni ehewolo kã.
Esoro lɛ yɛ mɛi akpei
nyɔŋma he.
11Ehiɛ tsuɔ oo,
eyitsɔi edɔrɔdrɔi;
ni ediɔ tamɔ kwãakwãalabite.
12Ehiŋmɛii tamɔ fai ahe okpoi ahiŋmɛii;
okpoi ni amɛju amɛhe kɛ fufɔ
ni amɛdamɔ fai atoi.
13Edabii tamɔ tsofakɛŋma akofii
ni miije ŋma.
Enaabu yɛ fɛo tamɔ Oflɔ fɔfɔi
ni efɔ kɛ krɔbɔo ŋleŋle.
14Eniji yɛ fɛo,
ni ewo gai ni ojarawatɛi tara mli.
Egbɔmɔtso tamɔ nɔ ko ni akɛ shuɔ wu fee,
ni akɛ safiro etara he.
15Eshuɔji tamɔ alabastro akulashiŋi,
ni mamɔ shika nibii anɔ.
Eje agbo tamɔ Lebanon gɔŋ lɛ,
ni eje oblaŋ tamɔ Lebanon tsenedrutso lɛ.
16Edaaŋ wiemɔ ŋɔɔ naakpa,
ni enɔ fɛɛ nɔ yɛ akɔnɔ.
Naa, nyɛ Yerusalɛm biyei,
bɔ ni misuɔlɔ,
mishieŋtsɛ lɛ yɔɔ nɛ.
Currently Selected:
Lalai amli Lala 5: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
