Abɛi 7
7
1Mibi, ye miwiemɔi lɛ anɔ, ni okɛ mikitãi lɛ ato. 2Ye mikitãi lɛ anɔ ní oyi ana wala; ni obu mitsɔ̃ɔmɔi lɛ tamɔ ohiŋmɛi mli ajaŋmalaatɛ. 3Hã ehi owaobii anaa. Ŋmãa yɛ otsuiŋ tao lɛ nɔ. 4Tsɛ nilee akɛ, “Minyɛmi yoo,” koni otsɛ sanesɛɛkɔmɔ akɛ oshieŋnyɛ. 5Amɛ amɛaabaa oyi kɛjɛ yoo ni bɛ jeŋba dɛŋ, amɛaakpɔ̃ bo kɛjɛ yoo ni naa yɔɔ dɔkɔbii lɛ dɛŋ.
Yoo ni bɛ jeŋba lɛ
6Ejaakɛ mitsɔ̃ miwe lɛ samflɛ lɛ mli mikwɛ, 7ni mina oblanyo ko ni bɛ yitsoŋ, yɛ oblahii komɛi ni ajwɛŋmɔ esako komɛi ateŋ. 8Oblanyo lɛ nyiɛ gbɛjegbɛ ko ni tsɔ̃ɔ yoo nɛɛ shĩa lɛ koŋ lɛ nɔ; ni eyi yoo lɛ we lɛ gbɛ. 9Gbɛkɛ ni, ni hiɛ efee tuutuu, ni duŋ kpii miihe awo. 10Ni naa, yoo ko kɛ oblanyo lɛ bakpe. Yoo lɛ wo ajwamãŋ atade, ni etsui esa. 11Enaa wa, ni etoi egbo, ni etaaa shĩa. 12Bianɛbianɛ etee agbo lɛ naa; bianɛbianɛ etee jara lɛ nɔ, ni ewoɔ ka yɛ tsu koŋ fɛɛ tsu koŋ. 13Yoo nɛɛ mɔ oblanyo lɛ ni eshwɔ enaa, ni yoo lɛ mia ehiɛ ni ekɛɛ lɛ akɛ, 14#Lev 3.3, 4 “Kulɛ esa akɛ mashã afɔle, shi ŋmɛnɛ nɔŋŋ lɛ miyawo mishiwoonii lɛ. 15No hã mije kpo koni mabɔ mɔdɛŋ matao bo ni mikɛ bo akpe, ni trukaa mibana bo nɛɛ. 16Mikɛ saanɔboi ni akɛ kpãi sui srɔtoi ni akɛjɛ Ijipt loo eha misaa lɛ nɔ. 17Mikɛ mire kɛ aloe kɛ sinamon ewo misaa lɛ mli ŋma. 18Ba ni wɔkɛ suɔmɔ ajie wɔkɔnɔ kɛyashi leebi. Wɔkɛ suɔmɔ anya kɛ miishɛɛ. 19Ejaakɛ miwu bɛ, efã gbɛ kɛtee shɔŋŋ. 20Ehiɛ shika pii kɛ kotoku kɛtee. Nyɔɔŋtsere lɛ baaye emuu dani ebaaba.” 21Yoo lɛ kɛ ewiemɔ kɛ ŋɔɔmɔ lɛ kɔne oblanyo lɛ yiŋ, ni eyitsoŋ tsɔ̃. Ekɛ enaa dɔkɔbii lɛ kpala lɛ kɛtee ewe. 22Oblanyo lɛ nyiɛ yoo lɛ sɛɛ amrɔ nɔŋŋ kɛtee ewe lɛ tamɔ tsina ni ayaagbe lɛ, aloo ofrote ni tsɔne edu lɛ kpɛŋŋ 23kɛyashi beyinɔ ni gãimlibi tsuɔ emusuŋ nii amli. Etamɔ loofɔlɔ ni shaa foi kɛyaduɔ tsɔne ni eleee akɛ lɛ ewala hewɔ atsɔ̃ tsɔne lɛ.
24Oo, mibii, nyɛboa mi toi agbɛnɛ. Nyɛfea toi nyɛhãa midaaŋ wiemɔi lɛ. 25Kaahã otsui mɔ nɛkɛ yoo. Kaadu gbɛ kɛyaje egbɛ nɔ; 26ejaakɛ yoo ni tamɔ nɛkɛ lɛ ekpãtã mɛi pii ahiɛ, mɛi ni egbe lɛ ayi fa naakpa. 27#Abɛi 2.18-19 Ewe lɛ, gbohiiaje gbɛ ni, ekã kɛmiiya gbele piai amli tɔ̃ɔ.
Bible in Ga Language © Bible Society of Ghana, 2020.