Abɛi 6
6
1 #
Abɛi 11.15; 17.18; 20.16 Mibi, kɛji owo onaanyo ko shi yɛ sane ko mli, aloo okɛ mɔ ko ta abasa yɛ onaanyo ko hewɔ, 2ni atsɔ̃ olilɛi nɔ adu bo, aloo atsɔ̃ odaaŋ wiemɔ nɔ amɔ bo lɛ, 3mibi, feemɔ enɛ ni okɛjie ohe; ejaakɛ onaanyo lɛ nine egbe bo. Yaa oya mramra ni oyakpa onaanyo lɛ fai. 4Kaahã ohiŋmɛii miina wɔ miiwɔ. Kaahã wɔ miiba ohiɛsɛɛ kwraa. 5Jiemɔ ohe kɛjɛ edɛŋ tamɔ soŋai jieɔ ehe yɛ gbɔbilɔ dɛŋ, aloo tamɔ loofɔlɔ jieɔ ehe yɛ loofɔlɔdulɔ dɛŋ lɛ. 6#Abɛi 10.4; Abɛi 20.4 Hejɔ̃lɔ, yaa tsatsu ŋɔɔ, jwɛŋmɔ enifeemɔi ahe ni ole nii. 7Lɛ po ni ebɛ maŋtsɛ loo nɔkwɛlɔ loo nɔyelɔ ko kwraa lɛ, 8etaoɔ eniyenii etoɔ yɛ latsaa be mli, ni ebuaa eŋmãa naa yɛ nikpamɔ be mli. 9Hejɔ̃lɔ, mɛɛbe oookã shi owɔ kɛyashi? Mɛɛbe nɔŋŋ ooote shi kɛaajɛ owɔ mli? 10#Abɛi 24.33, 34 Hejɔ̃lɔ kɛɔ akɛ, “Mawɔ fioo; majie mihiɛsɛɛ fioo; makota miniji majɔɔ mihe fioo.” 11Be ni ooohɛle shi lɛ, ohia ebatua bo tamɔ ojotswalɔ; ni fimɔ aaatua bo tamɔ tabilɔ ni hiɛ tsɛŋ.
12 #
Abɛi 10.31, 32 Yakagbɔmɔ, nɔfɔŋfeelɔ yɔɔ nɛɛ, enyiɛɔ eyeɔ kutumpɔo. 13Ebɛɔ mɔ hiŋmɛi, ekɛ enaji tete wieɔ, ni ekɛ ewaobii toɔ okadi. 14Etoɔ nibii fɔ̃ji yɛ etsui mli, eshwieɔ eyiŋ ŋaa fɔŋ daa, bei sɔŋŋ ewoɔ. 15No hewɔ lɛ, ehiɛ aaakpãtã trukaa, ni aaakumɔ lɛ trukaa ashwie shi bɔ ni ebɛ tsabaa.
16Yehowa miihi nibii kpawo: 17hewoo; amale lilɛi kɛ niji ni shwieɔ lá ni efeko efɔŋ ko shi. 18Tsui ni shwieɔ yiŋ fɔŋ, naji ni he yɔɔ oya kɛ efɔŋfeemɔ. 19Mɔ ni yeɔ amale odase, ni efoɔ sane ni bɛ mli etãa; mɔ ni woɔ nanemɛi ateŋ bei.
Gbãlãfitemɔ he kɔkɔbɔɔ
20 #
Abɛi 1.8
Mibi, ye otsɛ kitãi lɛ anɔ, ni nii ni onyɛ tsɔ̃ɔ bo lɛ kaakwa ekoeko. 21#Abɛi 3.3 Ŋɔɔ kitãi lɛ amli wiemɔi lɛ oto otsui mli daa nɛɛ; ŋɔɔ ofi okuɛ. 22#Lal 119.172 Kɛji onyiɛ lɛ eeetsɔ̃ɔ bo gbɛ; kɛji okã shi owɔ lɛ, eeebu ohe, ni kɛji ohiɛ tsɛ̃ lɛ, ekɛ bo aaagba sane. 23Ejaakɛ kitã lɛ, kane ni, ni mla lɛ, la ni, ni tsɔsemɔkãmɔ lɛ, wala gbɛ ni. 24Tsɔ̃ɔmɔ nɛɛ aaabaa oyi kɛje yoo fɔŋ dɛŋ, eeekpɔ̃ bo kɛje yoo ni bɛ jeŋba lilɛi dɔkɔbii lɛ dɛŋ. 25Kaadi ehe fɛo sɛɛ yɛ otsui mli, ni kaahã ekɛ ehiɛsɛɛ miimɔ bo. 26Abaanyɛ akɛ aboloo akwaabɔ abɔ yoo ajwamãŋ apaa, shi yoo gbãlãfitelɔ aaahã nuu wala tete abɔ lɛ.
27Aso mɔ ko aaaje la ashwie emiinaa, ni etadei eshãŋ? 28Aloo mɔ ko aaanyiɛ ŋai kɛ la nɔ, ni enaji eshaŋ? 29#Abɛi 5.10-14 Nakai eji hã nuu ni nyiɛɔ mɔ kroko ŋa sɛɛ; mɔ ko mɔ ko bɛ ni aaata ehe ni eeeye ehe kɔkɔɔkɔ. 30Kɛji hɔmɔ naa kɛkɛ ni julɔ yaju lɛ, agbeee ehe guɔ. 31Shi kɛji amɔ lɛ lɛ, ani ahaŋ eto najiaŋ toi kpawo lo? Ekɛ ewe nii fɛɛ tswɛm hãa. 32#1 Kor 6.18 Shi nuu ni fiteɔ gbãlã lɛ ebɛ yitsoŋ; mɔ ni feɔ nakai lɛ, lɛ diɛŋtsɛ ehe efiteɔ. 33Pilamɔ kɛ heguɔgbee eeena, ni ehiɛshishwiemɔ lɛ, anyɛŋ atsumɔ kɔkɔɔkɔ. 34Ejaakɛ awuŋayeli hãa nuu mlifu naa waa, ni kɛji eetɔ owele lɛ, ekɔ̃ɔɔ efiliii. 35Eheŋ kpãtãmɔ nii ko, ni nyɔɔŋnii pii po ebaakwa.
Bible in Ga Language © Bible Society of Ghana, 2020.