Abɛi 5
5
Gbãlãfitemɔ he kɔkɔbɔɔ
1Mibi, bo minilee lɛ toi, ni oka otoi ohã miniiashishinumɔ; 2koni ole sanesɛɛkɔmɔ, ni odaaŋ wiemɔi aaajie onilee kpo. 3#Abɛi 2.16-19 Ejaakɛ yoo ni bɛ jeŋba lɛ, enaa ŋɔɔ tamɔ wo, ni edaaŋ shamɔɔ fe eŋmɔmi. 4Ni naagbee mli lɛ ejoɔ tamɔ taatso; enaaba tamɔ klante kɛ enaa nta. 5Enyiɛ gbele gbɛ, ni ebaakpala bo kɛya gbohiiaje. 6Enyiɛɛɛ wala gbɛ, hewɔ lɛ eduɔ gbɛ ni eleee. 7No hewɔ lɛ, agbɛnɛ, mibi, bo mi toi, ni kaashi miwiemɔi lɛ asɛɛ. 8Tsi ohe kɛje nɛkɛ yoo he kwraa. Kaabɛŋkɛ ewe lɛ shinaa lɛ naa tete. 9Kɛjeee nakai lɛ obulɛ baalaaje, ni yiwalɔi aaafo owala sɛɛ; 10asaŋ nii ni okɛ ohewalɛ tsu lɛ gbɔi baaye amɛtɔrɔ; ni nibii ni ogbo deŋme yɛ amɛhe lɛ aaaya mɔkpɔŋ ko we. 11Ni onaagbee mli lɛ, be ni ohewolo kɛ ogbɔmɔtso hiɛ ekpãtã lɛ obaakɛ̃mɔ. 12No be mli oookɛɛ akɛ, “Mɛɛ hewɔ kwraa minyɛ tsɔsemɔ, ni mikpoo kamɔ̃ kɛjɛ mitsui mli tɔ̃ɔ nɛɛ? 13Mibooo mitsɔ̃ɔlɔi atoi, ni mikaaa mitoi mihãaa mɛi ni tsɔ̃ɔ mi nii lɛ. 14Shwɛ shrao ni mihiɛ akpãtã kwraa yɛ asafo lɛ mli.”
15Ye oŋa anɔkwa, ni oŋɔ suɔmɔ ohã lɛ ekoome pɛ tamɔ bɔ ni mɔ nuɔ lɛ diɛŋtsɛ egbɛ mli nu lɛ. 16Ejaakɛ bii ni okɛ yei krokomɛi aaafɔ lɛ, onaŋ amɛhe sɛɛ. 17Obii lɛ adara yɛ bo diɛŋtsɛ owe, koni amɛye amɛbua bo diɛŋtsɛ, shi jeee mɛi kpɔ̃ji. 18No hewɔ lɛ, na oŋa he miishɛɛ koni omii ashɛ oblahiiaŋ yoo ni oyakpee lɛ he. 19Ehe fɛo tamɔ ofrote, ni ehe yɛ akɔnɔ tamɔ yɔɔ; ehe akɔnɔ lɛ ashɛje omii be fɛɛ be; hã ni esuɔmɔ aŋɔ bo nom. 20Shi mibi, mɛɛba yoo ni bɛ jeŋba he feɔ bo akɔnɔ, ni oloɔ yoo mɔkpɔŋ atuu? 21Ejaakɛ Yehowa lɛ, enaa nɔ fɛɛ nɔ ni afeɔ, ni eekwɛ oyaa kɛ obaa fɛɛ. 22Mɔ fɔŋ lɛ enifɔji anii lɛ nɔŋŋ duɔ lɛ tamɔ tsɔne, ni eshai ni efeɔ lɛ nɔŋŋ fimɔɔ lɛ tamɔ kpãa. 23#Jaj 9.9 Egboɔ ejaakɛ ebɛ tsɔsemɔ, ni ekwashiafeemɔ babaoo hewɔ lɛ ehiɛ kpãtãa.
Bible in Ga Language © Bible Society of Ghana, 2020.