Abɛi 4
4
Nilee he sɛɛnamɔ
1Bii, nyɛboa nyɛtsɛ tsɔsemɔ lɛ toi, ni nyɛfea toi ni nyɛlea sanesɛɛkɔmɔ. 2Jeŋba kpakpa he ŋaa miwoɔ nyɛ nɛɛ; nyɛkakwaa mitsɔ̃ɔmɔ lɛ. 3Be ni mi ji gbekɛnuu yɛ mitsɛ masɛi, ni minyɛ bi koome ni eshwɛɛɛ ehe ji mi lɛ, mitsɛ tsɔ̃ɔ mi nii, ni ekɛɛ mi akɛ, 4#Lev 18.5 “Hã otsui amɔ miwiemɔi amli, ye mikitãi ni miwoɔ bo lɛ anɔ, ni oyi aaana wala. 5#Abɛi 3.1 Na nilee kɛ sanesɛɛkɔmɔ. Ohiɛ akakpa midaaŋ wiemɔi lɛ anɔ, ni kaaŋmɛɛ he hu. 6Kaakwa nilee, ni eeebaa oyi; suɔmɔ lɛ, ni eeebu ohe. 7Nilee shishijee ji ona nilee, ni nɔ fɛɛ nɔ ni ona lɛ okɛtao sanesɛɛkɔmɔ sɛɛgbɛ. 8Buu nilee akɛ nɔ ko ni jara wa, ni eeewo onɔ; kɛji oloo lɛ atuu lɛ, eeewo ohiɛ nyam. 9#Abɛi 1.9 Nilee aaafi bo anunyam akekre, ni eeebu bo maŋtsɛ fai ni yɔɔ fɛo.”
10Mibi, bo toi, ni omɔ miwiemɔi lɛ amli koni owala sɛɛ atsɛ. 11#Lal 32.8; Abɛi 27.11Mitsɔ̃ɔ bo nilee gbɛ lɛ; mikɛ bo etsɔ̃ jalɛ tɛmpɔŋi anɔ. 12Kɛji onyiɛ gbɛi nɛɛ anɔ lɛ onane etɔ̃tɔ̃ŋ, ni kɛji ojo foi yɛ nɔ po, otɛŋ. 13Mɔ tsɔsemɔ mli waa, kaaŋmɛɛ he. Okɛto jogbaŋŋ, shi no ji owala. 14#Abɛi 1.10; Lal 1.1 Kaayi yiwalɔi agbɛ nɔ, ni mɛi fɔ̃ji agbɛ hu okanyiɛ nɔ. 15Wii ohe kɛje gbɛ fɔŋ nɔ, kaayi nɔ; tsi ohe kɛje nɔ kwraa, ni ofo mli kɛya. 16Ejaakɛ mɛi fɔ̃ji wɔɔɔ akɛ ja amɛfee efɔŋ dã. Wɔ po tseɔ yɛ amɛhiɛ ja amɛna mɔ ko awui amɛye dã. 17Ejaakɛ efɔŋfeelɔi aŋmãa ji yiwalɛ, ni amɛwain ji basabasafeemɔ.
18Shi jalɔi agbɛ lɛ etamɔ leebi la ni kpɛɔ, ni eyaa nɔ ekpɛɔ aahu kɛyashiɔ shwane. 19#Abɛi 13.9; 24.20 Mɛi fɔ̃ji agbɛ lɛ etamɔ duŋ kabitii; amɛtɛrɛɔ, ni amɛnaaa nibii ni amɛtɛrɛɔ lɛ.
20Mibi, ka otoi ohã miwiemɔi lɛ; ba otoi shi ohã nɔ ni mikɛɔ lɛ. 21Ohiɛ akaje nɔ. Kɛto otsui mli tɔ̃ɔ. 22#Abɛi 3.8, 13-16Ejaakɛ wala eji hã mɔ ni nine shɛɔ nɔ, ni eji tsabaa hã ehewojiaŋ fɛɛ. 23Ohiɛ akã otsui he fe nii fɛɛ; ejaakɛ no mli wala jɛɔ. 24Wiemɔ gbonyo akaje onaa; ni kaaye kutumpɔo. 25Too ohiɛ tɛ̃ɛ, ohiɛ ama he ni oyaa lɛ nɔ. 26#Heb 12.13 Le onanefãamɔ, kɛkɛ lɛ ogbɛi fɛɛ aaaja ahã bo. 27#Deut 5.29 Kaagba ejurɔ loo abɛku. Tsi ohe kɛje efɔŋ he.
Bible in Ga Language © Bible Society of Ghana, 2020.