Numeri 27
27
Zelofehad biyei lɛ
1 #
Yos 17.3-7
Zelofehad biyei enumɔ ni amɛgbɛii ji Mahela kɛ Noa kɛ Hogla kɛ Milka kɛ Tirza ni amɛ ji Hefer nabii kɛ Gilead nanakansowai kɛ Makir nanashishiui, ni asaŋ amɛ ji Manase nanadadaoi kɛ Yosef hu nanakɔkrɔdɔi lɛ, 2ho damɔ Mose kɛ Osɔfo Eleazar kɛ maŋ onukpai lɛ kɛ maŋ muu lɛ fɛɛ hiɛ yɛ Yehowa Kpee Buu lɛ shinaa lɛ naa, ni amɛkɛɛ amɛ akɛ, 3“Wɔtsɛ Zelofehad gbo yɛ ŋa lɛ nɔ; efataaa Kora kɛ esɛɛbii ni te shi amɛshi Yehowa lɛ ahe. Egbo yɛ lɛ diɛŋtsɛ ehe esha hewɔ ni efɔɔɔ bihii. 4#Lev 24.13 Mɛɛba ni agbeɔ wɔtsɛ gbɛi yɛ etsɛmɛi awe lɛ mli? Binuu ni enaaa lɛ hewɔŋ lo? Nyɛhãa wɔ, wɔ hu wɔgbɛfaŋnɔ yɛ wɔtsɛ nyɛmimɛi lɛ ateŋ!”
5Mose kɛ Zelofehad biyei lɛ asane lɛ yafɔ̃ Yehowa hiɛ, 6ni Yehowa kɛɛ Mose akɛ, 7#Num 36.2“Nɔ ni Zelofehad biyei lɛ biɔ lɛ eja. Hã amɛ amɛgbɛfaŋnɔ yɛ amɛtsɛ nyɛmimɛi lɛ ateŋ bɔ ni afee ni amɛ, amɛye amɛtsɛ gboshinii. 8Okɛɛ Israelbii lɛ akɛ, kɛji nuu ko gbo ni ebɛ binuu lɛ, no lɛ ebiyoo aye egboshinii. 9Kɛji ebɛ biyoo lɛ, no lɛ enyɛmimɛi hii aye egboshinii. 10Kɛji ebɛ nyɛmimɛi hii hu lɛ, etsɛ nyɛmimɛi hii aye egboshinii. 11Kɛji etsɛ bɛ nyɛmimɛi hii lɛ, no lɛ ewekunyo ni bɛŋkɛ lɛ yɛ weku mli aye egboshinii lɛ. Enɛ ji mla ni akã shi ahã Israelbii bɔ ni mi, Yehowa, mifã bo lɛ.”
Aŋɔ Yoshua koni eye Mose sɛɛ
(Deuteronomio 31.1-8)
12 #
Deut 32.48-49
Kɛkɛ ni Yehowa kɛɛ Mose akɛ, “Kwɔɔ Abarim Gɔŋ nɛɛ kɛya eyiteŋ koni okwɛ shikpɔŋ ni mikɛhãa Israelbii lɛ. 13Kɛji okwɛ shikpɔŋ lɛ ogbe naa lɛ, bo hu obaagbo tamɔ onyɛmi Aaron, 14#Deut 3.23-27; 32.48-52 ejaakɛ nyɛku migbee nɔ yɛ Zin ŋa lɛ nɔ. Be ni maŋ muu lɛ wie amɛshi mi, ni kulɛ sa akɛ nyɛhã amɛna mihewalɛ krɔŋkrɔŋ kpele lɛ, koni amɛshe mi gbeyei yɛ Meriba lɛ, nyɛfeee nakai.” (Meriba nɛɛ ji nu hiŋmɛi ni tue hã Israelbii lɛ yɛ Kadesh yɛ Zin ŋa lɛ nɔ lɛ.)
15Mose kɛɛ Yehowa akɛ, 16“Yehowa, bɔɔnii fɛɛ aNyɔŋmɔ, ofainɛ, fãa nuu hiɛnyiɛlɔ ohã maŋ lɛ, 17#1 Maŋ 22.17; Eze 34.5; Mat 9.36; Mar 6.34 mɔ ni baanyɛ amɛnɔ ekwɛ, asaŋ ni enyiɛ amɛhiɛ kɛya ta kɛba bɔ ni afee ni Yehowa asafo lɛ akatsɔ̃ tamɔ toi ni bɛ kwɛlɔ.”
18 #
Deut 3.21; 34.9 Yehowa hã Mose hetoo akɛ, “Ŋɔ̃ɔ Nun binuu Yoshua lɛ, nuu hiɛwalɔ ni Mumɔ lɛ yɔɔ emli lɛ koni okɛ oniji ashwie enɔ, 19ni okɛ lɛ adamɔ Osɔfo Eleazar kɛ asafo muu lɛ fɛɛ hiɛ, ni otu nitsumɔ lɛ owo edɛŋ yɛ amɛhiɛ akɛ mɔ ni baaye osɛɛ; 20#2 Maŋ 2.9, 15 asaŋ ni ohã lɛ hewalɛ ni oyɔɔ lɛ eko bɔ ni afee ni Israelbii asafo muu lɛ fɛɛ abo lɛ toi. 21#Ɛks 28.30 Ebo Osɔfo Eleazar toi be fɛɛ be. Eya eŋɔ̃ɔ, ni ebaafɔ̃ Urim lɛ koni ekɛbi mi nii ehã lɛ yɛ mihiɛ. Lɛ kɛ Israelbii lɛ kɛ asafo lɛ fɛɛ ayaakɛbaa mli lɛ, amɛbo Osɔfo Eleazar wiemɔ toi.” 22Mose fee nɔ ni Yehowa fã akɛ efee lɛ. Eŋɔ Yoshua ni ekɛ lɛ yadamɔ Osɔfo Eleazar kɛ maŋ muu lɛ fɛɛ hiɛ, 23#Deut 31.23 ni ekɛ eniji shwie enɔ, ni etu nitsumɔ lɛ ewo edɛŋ akɛ mɔ ni baaye esɛɛ taakɛ bɔ ni Yehowa kɛɛ lɛ lɛ.
Bible in Ga Language © Bible Society of Ghana, 2020.