Numeri 28
28
Afɔlei ni ashãa daa gbi
(Ɛksodɔs 29.38-46)
1Yehowa kɛɛ Mose akɛ, 2#Lev 21.6 “Kɛɛmɔ Israelbii lɛ akɛ amɛhiɛ ahi minikeenii ni ji niyenii afɔle ni akɛ la shãa ni ejeɔ ŋma ewoɔ mi lɛ nɔ koni amɛkɛbahã mi kɛji afɔle hãmɔ be shɛ lɛ.
3 #
Ɛks 29.38-42
“Gbi fɛɛ gbi lɛ ahã gwantɛŋbii enyɔ ni eye afiafi asaŋ ni kpa ko bɛ amɛhe koni akɛshã afɔle ahã mi. 4Oshã gwantɛŋbi kome leebi, ni oshã ekome hu gbɛkɛnaashi. 5#Lev 2.1 Akɛ ŋmãa kilo kome ni akɛ fɔ kpakpa ni ashi mli lita kome ekpɔtɔ afata he. 6Daa gbi afɔle ni ashã ji enɛ tamɔ bɔ ni akɛ la shã be ni ayɔɔ Sinai Gɔŋ lɛ he lɛ. Enɛ ji niyenii afɔle ni jeɔ ŋma woɔ Yehowa. 7Dãa afɔle lita kome afata gwantɛŋbi kome he, koni ofɔse dãa lɛ oshwie shi yɛ He Krɔŋkrɔŋ lɛ okɛhã Yehowa. 8Gbɛkɛnaashi lɛ oshã gwantɛŋbi kome lɛ hu; ni no hu akɛ niyenii afɔle kɛ dãa afɔle afata he tamɔ leebi nɔ lɛ nɔŋŋ koni efee afɔle ni ashãa ni ejeɔ ŋma ewoɔ Yehowa.”
Hejɔɔmɔ gbi lɛ nɔ afɔle
9 #
Mat 12.5
“Daa Hejɔɔmɔ gbi lɛ okɛ gwantɛŋi enyɔ ni eye afifi ni kpa ko bɛ amɛhe kɛ amɛhe niyenii afɔle ni ji ŋmãa mamu kiloi enyɔ ni akɛ fɔ ekpɔtɔ abashã afɔle; dãa afɔle hu afata he. 10Hejɔɔmɔ gbi lɛ nɔ afɔle nɛɛ sɛɛ lɛ, ashã daa gbi afɔle lɛ hu kɛ ehe dãa afɔle lɛ.”
Nyɔŋ hee klɛŋklɛŋ gbi lɛ nɔ afɔle
11“Nyɔŋ fɛɛ nyɔŋ klɛŋklɛŋ gbi lɛ nɔ lɛ, nyɛshãa afɔle nyɛkɛhãa Yehowa. Nyɛkɛ tsina oblahii enyɔ kɛ ojwɛni kome kɛ gwantɛŋ bihii kpawo ni eye afifi ni kpa ko bɛ amɛhe ashãa. 12#Num 20.28; 15.2-15 Niyenii afɔle ni ji ŋmãa mamu ni akɛ fɔ ekpɔtɔ ni akɛfata kooloi lɛ ahe nɛ: tsinanuu kome lɛ mamu kiloi etɛ̃, ojwɛni lɛ mamu kiloi enyɔ, 13ni gwantɛŋbi kome lɛ mamu kilo kome. Shãa afɔlei nɛɛ eji niyenii afɔle ni jeɔ ŋma woɔ Yehowa. 14Yɛ dãa afɔle lɛ gbɛfaŋ lɛ tsinanuu kome he dãa ji wain litai enyɔ; ojwɛni kome he dãa ji wain lita kome kɛ fã; ni gwantɛŋbi he dãa ji wain lita kome. Afi mli nyɔŋ fɛɛ nyɔŋ klɛŋklɛŋ gbi lɛ nɔ lɛ, afɔle ni ashã lɛ he mla ji enɛ. 15No sɛɛ lɛ, akɛ too kpakpo kome ashã esha hefaikpamɔ afɔle akɛhã Yehowa; dani soro daa gbi afɔle kɛ ehe dãa afɔle ni sa akɛ ashã lɛ hu.”
Mã akpiti aboloo gbijurɔ lɛ nɔ afɔle
(Ɛksodɔs 23.5-14)
16 #
Ɛks 12.1-13; Deut 16.1-2 “Afi lɛŋ klɛŋklɛŋ nyɔŋ lɛ nɔ gbi ni ji nyɔŋma kɛ ejwɛ lɛ ji Yehowa Hehoo Gbijurɔ lɛ. 17#Ɛks 12.14-20; 23.15; Ɛks 34.18; Deut 16.3-8 Nyɔŋ nɛɛ nɔŋŋ nɔ gbi ni ji nyɔŋma kɛ enumɔ lɛ gbijurɔ ni. Aye aboloo ni akɛ mã akpiti shã kɛjɛ gbi nɛɛ nɔ kɛyashi gbii kpawo. 18Gbijurɔ nɛɛ klɛŋklɛŋ gbi lɛ nɔ lɛ, maŋ lɛ akpe kpee krɔŋkrɔŋ ni aja Yehowa; nyɛkatsua nitsumɔ ko nitsumɔ ko ni wa yɛ nɔ. 19Nyɛkɛ tsina oblahii enyɔ kɛ ojwɛni kome kɛ gwantɛŋ bihii kpawo ni eye afifi ni kpa ko bɛ amɛhe ashã afɔle nyɛkɛhãa Yehowa. 20Niyenii afɔlei ni ji ŋmãa mamu ni akɛ fɔ ekpɔtɔ ni akɛfata kooloi lɛ ahe nɛ: tsinanuu lɛ mamu kiloi etɛ̃, ni ojwɛni kome lɛ mamu kiloi enyɔ, 21ni gwantɛŋbi kome lɛ mamu kilo kome. 22Akɛ too kpakpo kome hu ashã esha hefaikpamɔ afɔle koni akɛkpãtã ahã maŋ lɛ. 23Enɛɛmɛi asɛɛ lɛ ashã daa gbi leebi afɔle lɛ hu. 24Nyɛfea nakai daa gbi kɛyashi gbii kpawo; niyenii afɔle ni, ni ejeɔ ŋma ewoɔ Yehowa. Soro no, ni soro daa gbi afɔle ni ashãa lɛ hu. 25Ni gbi ni ji kpawo lɛ nɔ lɛ nyɛkpea kpee krɔŋkrɔŋ ni nyɛjaa Yehowa; nyɛkatsua nitsumɔ ko nitsumɔ ko ni wa yɛ nɔ.”
Ŋmɔshi nikpamɔ gbijurɔ lɛ nɔ afɔle
(Levitiko 23.15-22)
26 #
Ɛks 23.16; Ɛks 34.22; Deut 16.9-12 “Klɛŋklɛŋ ŋmɔshi nikpamɔ gbijurɔyeli lɛ klɛŋklɛŋ gbi lɛ nɔ, be ni nyɛkɛ ŋmaaŋmɔŋ ni nyɛku baa ni nyɛkɛbaashã afɔle nyɛkɛhã Yehowa lɛ, nyɛkpea kpee krɔŋkrɔŋ ni nyɛjaa. Gbi lɛ akatsu nitsumɔ ko nitsumɔ ko ni wa; 27shi nyɛkɛ tsina oblahii enyɔ kɛ ojwɛni kome kɛ gwantɛŋ bihii kpawo ni eye afifi ni kpa ko bɛ amɛhe ashã shãa afɔle ni jeɔ ŋma woɔ Yehowa. 28Kooloi lɛ ahe niyenii afɔle hu ni ji ŋmãa mamu ni akɛ fɔ ekpɔtɔ ji enɛ: tsinanuu kome he niyenii afee mamu kiloi etɛ̃; ni ojwɛni kome he niyenii afee mamu kiloi enyɔ, 29ni gwantɛŋbi kome he niyenii afee mamu kilo kome. 30Akɛ too kpakpo kome hu ashã esha hefaikpamɔ afɔle koni akɛkpãtã ahã maŋ lɛ. 31Enɛɛmɛi asɛɛ lɛ ashã daa gbi afɔle ni kã shi lɛ kɛ ehe niyenii afɔle lɛ kɛ dãa afɔle lɛ hu pɛpɛɛpɛ. Nyɛkwɛa koni kpa ko kpa ko akahi afɔlei lɛ ahe.”
Bible in Ga Language © Bible Society of Ghana, 2020.