Numeri 25
25
Israelbii lɛ ashihilɛ yɛ Peor kpokpai anɔ
1Be ni Israelbii lɛ yɔɔ Shitim, Akasia tso Jɔɔ lɛŋ lɛ, amɛhii lɛ kɛ Moab yei lɛ bɔ̃i ajwamãŋbɔɔ. 2Moab yei lɛ kpeɔ Israelhii lɛ kɛyaa hei ni amɛshãa afɔlei amɛkɛhãa amɛmaŋ wɔji lɛ yɛ lɛ; ni Israelhii lɛ yayeɔ afɔleshãa niyenii lɛ eko, ni amɛjaa Moabbii lɛ awɔji lɛ hu. 3#Deut 4.3 Ni Israelbii lɛ kɛ amɛhe yabɔ jemawɔŋ Peor lɛ he. No hewɔ lɛ, Yehowa mli wo la, 4#2 Sam 21.6, 9; Deut 21.22, 23 ni ekɛɛ Mose akɛ, “Mɔ̃ɔmɔ maŋ lɛ mli onukpai lɛ fɛɛ koni agbe amɛ shwane ketekete yɛ mi, Yehowa, mihiɛ; bɔ ni afee ni Yehowa mli ni efu Israel fe nine lɛ sɛɛ afo.” 5No hewɔ lɛ, Mose kɛɛ Israel maŋ onukpai lɛ akɛ, “Nyɛteŋ mɔ fɛɛ mɔ agbe lɛ diɛŋtsɛ ekutso lɛ mli nuu fɛɛ nuu ni etsɔ̃ ehe jemawɔŋ Peor jalɔ lɛ.”
6Israelbii lɛ ateŋ nuu ko tee eyakpala Midianyoo ko ni ekɛ lɛ tee ebuu lɛ mli yɛ Mose kɛ Israelbii asafo muu lɛ fɛɛ hiɛ, be mli ni Mose kɛ Israel asafo muu lɛ yeɔ ŋkɔmɔ yɛ Yehowa Kpee Buu lɛ shinaa lɛ naa lɛ. 7Be ni Osɔfo Aaron binuu Eleazar binuu Finehas na nifeemɔ nɛɛ lɛ, ete shi yɛ asafo lɛ mli, ni eyakɔ akplɔ ehiɛ edɛ̃, 8ni etiu Israelnyo lɛ kɛtee buu lɛ mli, ni eyadu Israelnyo lɛ kɛ Midianyoo lɛ fɛɛ akplɔ bɔ ni etsɔ̃ amɛmli kɛyaje kpo. Biɛ tsɔ̃ ni gbele hela lɛ ni miikpãtã Israelbii lɛ ahiɛ lɛ sɛɛ fo. 9#1 Kor 10.8 Shi nakai be mli lɛ hela lɛ egbe mɛi akpei nyɔŋmai enyɔ kɛ ejwɛ momo.
10Kɛkɛ ni Yehowa kɛɛ Mose akɛ, 11“Mihe awuŋã ni Osɔfo Aaron binuu Eleazar binuu Finehas ye etsɔ̃ɔ Israelbii lɛ, ekɛku mimli ni efu Israelbii lɛ anaa, ni no hewɔ lɛ, mipleneee amɛ dɔŋŋ. 12No hewɔ lɛ, kɛɛmɔ Finehas akɛ, ‘Miŋɔ̃ mihejɔlɛ kpãŋmɔ lɛ mihã lɛ kɛmiiya naanɔ, 13#Lal 106.30, 31 ni mijɔɔ osɔfoyeli lɛ nɔ mihã lɛ kɛ eshwiei kɛmiiya naanɔ, ejaakɛ eye awuŋã yɛ mi, mihewɔ, ni ehã akɛ tɔ̃mɔ ni maŋ lɛ tɔ̃ lɛ efa amɛ.’ ”
14Israelnyo lɛ ni agbe lɛ kɛ Midianyoo lɛ, egbɛi ji Zimri; ni etsɛ ji Salu, Simeonbii akutso lɛ mli wekui lɛ eko mli onukpa ni. 15Ni Midianyoo lɛ ni agbe lɛ gbɛi ji Kozbi; etsɛ gbɛi ji Zur, Midianbii awekui lɛ eko mli onukpa ni. 16Yehowa fã Mose akɛ, 17“Nyɛfãa ta kɛyatuaa Midianbii lɛ koni nyɛplene amɛ, 18ejaakɛ amɛ hu amɛfee nyɛ efɔŋ kɛ lakamɔ ni amɛlaka nyɛ yɛ jemawɔŋ Peor lɛ jamɔ sane lɛ mli, agbɛnɛ amɛlaka nyɛ yɛ amɛnyɛmi yoo Midian onukpa ko biyoo Kozbi sane lɛ mli. Lɛ ji Midianyoo lɛ ni agbe lɛ yɛ gbele hela gbi lɛ nɔ yɛ Peor lɛ.”
Bible in Ga Language © Bible Society of Ghana, 2020.