Numeri 24
24
1Shi Balaam eyɔse akɛ Yehowa suɔmɔ naa ji akɛ ejɔɔ Israelbii lɛ. No hewɔ lɛ, eyaaa tamɔ bei krokomɛi lɛ akɛ eyaatao okadii. Shi moŋ ewo ehiɛ nɔ, ni ekwɛ shiaŋa lɛ nɔ gbɛ. 2Ena Israelbii lɛ ni amɛjwere shi yɛ amɛkutsei lɛ anaa. Kɛkɛ ni Nyɔŋmɔ mumɔ lɛ bayi Balaam nɔ, 3#1 Sam 9.9 ni ewo enaa nɔ, ni egba ekɛɛ akɛ,
“Balaam, Beor bi lɛ, ninaa nɛ,
nuu ninalɔ lɛ ninaa nɛ,
4 #
Yes 50.4
mɔ ni nuɔ nɔ ni Nyɔŋmɔ kɛɔ
ni enaa ninaa ni Ofe lɛ jieɔ etsɔ̃ɔ lɛ,
mɔ ni buɔ shi, shi enaa nii lɛ.
5Kwɛ bɔ ni Israel bui lɛ yɔɔ fɛo!
Israel shihilɛhei amli yɛ akɔnɔ
6tamɔ faa he jɔi ni elɛɛ shi
oookɛɛ faa toi abɔi,
tamɔ tsei fɛɛfɛji ni Yehowa tɛo
oookɛɛ faa toi tsenedrutsei.
7Nu aaajɛ onubui amli, Israel,
ashwie shi ni oshwiei kɛaadu nii.
Omaŋtsɛ lɛ baaje agbo fe Maŋtsɛ Agag,
ni aaawo emaŋtsɛyeli nɔ.
8Nyɔŋmɔ yajie amɛ yɛ Ijipt,
ni amɛhe wa tamɔ wuo.
Amɛbaaye amɛhenyɛlɔi lɛ amaji anɔ,
ni amɛbaajwara amɛwui wɔtsɔwɔtsɔ,
ni amɛkɛ amɛgãii lɛ baatsɛ̃rɛ amɛ.
9 #
Jɛn 12.3; Jɛn 49.9 Edɛke shi;
ebu shi tamɔ jata, tamɔ jatayoo;
namɔ aaatsiɛ lɛ?
Mɔ fɛɛ mɔ ni jɔɔ bo lɛ, aaajɔɔ lɛ,
ni mɔ fɛɛ mɔ ni lomɔɔ bo lɛ, aaalomɔ lɛ.”
10Balak kɛ mlifu tswa edɛ̃, ni ekɛɛ Balaam akɛ, “Miyakpee bo kɛba koni obalomɔ mihenyɛlɔi ohã mi lɛ, jɔɔmɔ sɔŋŋ moŋ ojɔɔ amɛ shii etɛ̃ nɛɛ fɛɛ. 11No hewɔ lɛ, kuu osɛɛ ni oya omaŋ. Mito miyiŋ akɛ majuro bo; shi Yehowa etsi juromɔ ni majuro bo lɛ naa.”
12Balaam kɛɛ Balak akɛ, “Ani mikɛɛɛ obɔfoi ni otsu amɛ miŋɔɔ lɛ tete akɛ, 13‘Naa, kɛji Balak ŋɔ̃ ewe lɛ mli shika kɛ jwiɛtɛi tsu obɔ̃ tete eke mi lɛ, minyɛŋ maje Yehowa wiemɔ sɛɛ koni mato miyiŋ mafee nɔ kpakpa loo nɔ fɔŋ ko. Nɔ ni Yehowa aaakɛɛ lɛ no nɔŋŋ ji nɔ ni mawie.’ ”
Balaam naagbee gbalɛ
14Balaam tee ewiemɔ lɛ nɔ, ni ekɛɛ Balak akɛ, “Mi lɛ miiya mimaŋ, shi dani mashwie nɔ lɛ, mibatswa bo adafi yɛ nɔ ni Israel maŋ nɛɛ baafee omaŋ lɛ wɔsɛɛ ko he.”
15Kɛkɛ ni Balaam wo enaa nɔ, ni ebɔ̃i gbaa ekɛɛ, “Balaam, Beor binuu lɛ, ninaa nɛ. Nɔ ni mɔ ni agbele ehiŋmɛii lɛ kɛɛ nɛ:
16‘Mɔ ni nuɔ Nyɔŋmɔ wiemɔi lɛ,
ni eleɔ Ŋwɛinyo lɛ yiŋtoi lɛ,
ni Ofe lɛ jieɔ ninai etsɔ̃ɔ lɛ lɛ,
ni ehiɛ bu shi, shi enaa nɔ fɛɛ nɔ lɛ kɛɔ nɛ:
17 #
Mat 2.2; Luk 1.78; 2 Sam 8.2; Amos 2.2 Miina Israel, shi jeee bɔ ni eyɔɔ lɛ minaa lɛ,
shi eyɛ shɔŋŋ.
Ŋulami ko baaje yɛ Yakob,
Maŋtsɛ tso ko baate shi yɛ Israel,
ni ebaatswia Moab hiɛnaanɔbii lɛ anii,
ni ebaaye Set shwiei lɛ fɛɛ anɔ kunim.
18 #
2 Sam 8.14; Amos 9.11-12 Ebaaye Edom nɔ,
ni eeeye Seir hu nɔ,
eeeye ehenyɛlɔi lɛ hu anɔ
ni eeeŋɔ amɛshikpɔji lɛ
be mli ni Israel yeɔ kunim lɛ.
19 #
Mika 5.1, 7, 8 Israel jaku baanaanaa
amɛ fɛɛ amɛnɔ,
ni eeekpãtã mɛi ni aaashwɛ
yɛ maji lɛ amli lɛ ahiɛ.’ ”
20 #
Ɛks 17.14
Agbɛnɛ Balaam na Amalekbii lɛ yɛ ninaa lɛ mli. Kɛkɛ ni etsɔ̃ gbalɛ lɛ kɛtee amɛnɔ ni ekɛɛ akɛ,
“Amalek ji majimaji lɛ ateŋ
mɔ ni yɔɔ hewalɛ fe fɛɛ;
shi naagbee mli aahu lɛ,
ehiɛ baakpãtã kwraa.”
21 #
1 Sam 15.6; Oba 8 Balaam na Kenbii lɛ hu yɛ ninaa lɛ mli, ni egba yɛ amɛhe akɛ,
“Oshihilɛhe lɛ yɛ shweshweeshwe
tamɔ loofɔlɔ tsu ni mã tɛsaa nɔ.
22Kɛ̃lɛ Kenbii ahiɛ baakpãtã
ni etsɛŋ ni Asiria aaaŋɔ̃ bo nom.”
23Balaam tee nɔ ni egba gbalɛ nɛɛ, ni ekɛɛ akɛ,
“Ao, namɔ aaahi walaŋ,
ni ena be ni Nyɔŋmɔ aaafee nii nɛɛ?
24Akɛ ta lɛji aaajɛ Kipro aba
ni aaabaye Asiria kɛ Eber nɔ.
Shi tatsɛmɛi nɛɛ hu ahiɛ aaakpãtã kɛya naanɔ.”
25Kɛkɛ ni Balaam yi mli, ni eku esɛɛ kɛtee emaŋ, ni Balak hu ku esɛɛ kɛtee ejɛɛhe.
Bible in Ga Language © Bible Society of Ghana, 2020.