Numeri 23
23
Balaam klɛŋklɛŋ gbalɛ
1Balaam kɛɛ Balak akɛ, “Mãamɔ afɔleshãa latɛi kpawo yɛ biɛ ohã mi; ni obahã mi tsinahii kpawo kɛ ojwɛnii hu kpawo.”
2Balak fee nɔ ni Balaam kɛɛ lɛ lɛ ni lɛ kɛ Balaam shã tsinanuu kome kɛ ojwɛni hu kome yɛ afɔleshãa latɛ fɛɛ afɔleshãa latɛ nɔ. 3Balaam kɛɛ Balak akɛ, “Yaadamɔ oshãa afɔle lɛ he, koni maya akɛ aleee nɔ mikɛ Yehowa aaakpe lo. Nɔ fɛɛ nɔ ni eeekɛɛ mi lɛ, mibaba mibakɛɛ bo.” Kɛkɛ ni eyi mli etee gɔŋ kpataa ko nɔ.
4Nyɔŋmɔ kɛ Balaam kpe, ni Balaam kɛɛ Nyɔŋmɔ akɛ, “Mimamɔ afɔleshãa latɛi kpawo, ni mishã tsinanuu kome kɛ ojwɛni hu kome yɛ afɔleshãa latɛ fɛɛ afɔleshãa latɛ nɔ.” 5Ni Yehowa kɛ wiemɔ wo Balaam naa, ni ekɛɛ lɛ akɛ, “Kuu osɛɛ kɛya Balak ŋɔɔ ni oyakɛɛ lɛ nɔ ni mikɛɛ bo lɛ.” 6Be ni Balaam ku esɛɛ kɛba Balak ŋɔɔ lɛ, Balak kɛ Moab lumɛi lɛ fɛɛ damɔ Balak shãa afɔle lɛ he.
7Kɛkɛ ni Balaam wo egbee nɔ, ni ebɔi gbaa ekɛɛ,
“Moab Maŋtsɛ Balak yaŋɔ mi kɛjɛ Siria,
yɛ bokã gɔji lɛ anɔ ekɛɛ:
‘Ba, baalomɔ Yakob;
Baalomɔ Israelbii ohã mi!’
8Shi te aaafee tɛŋŋ malomɔ
mɔ ni Nyɔŋmɔ lomɔko lɛ hu?
Te aaafe tɛŋŋ mashwe musu mahã mɔ ko
be ni Yehowa ekɛko nakai?
9Tɛsai ayiteŋ mijɛ mina amɛ;
ni gɔŋkpɔi anɔ mijɛ mikwɛ amɛ
akɛ maŋ ni amɛkome too amɛyɔɔ.
Amɛle akɛ ajɔɔ amɛ fe maji fɛɛ.
10 #
Jɛn 13.16; Num 31.8 Israel shwiei ayikulɛ tamɔ shikpɔŋ mlu,
Amɛyi fa fe bɔ ni aaanyɛ akane.
Hã magbo jalɔi agbele
koni minaagbee atamɔ Nyɔŋmɔ webii anɔ.”
11Kɛkɛ ni Balak kɛɛ Balaam akɛ, “Te okɛ mi yeɔ tɛŋŋ nɛɛ? Miyaŋɔ bo kɛba koni obalomɔ mihenyɛlɔi lɛ, shi jɔɔmɔ sɔŋŋ moŋ ojɔɔ amɛ nɛɛ!”
12Balaam here nɔ, ni ekɛɛ akɛ, “Ani esaaa akɛ makwɛ jogbaŋŋ koni mawie nɔ ni Yehowa kɛwo minaa lɛ?”
Balaam gbalɛ ni ji Enyɔ
13Agbɛnɛ Balak kɛɛ Balaam akɛ, “Ofainɛ, ba ni wɔtee he kroko, he ni ooona Israelbii lɛ yɛ. Obaana amɛfã ko kɛkɛ; onaŋ amɛ fɛɛ; koni olomɔ amɛ yɛ jɛi ohã mi.” 14Balak kɛ Balaam tee Zofim ŋa lɛ nɔ yɛ Pisga Gɔŋ lɛ yiteŋ, ni eyamãmɔ afɔleshãa latɛi kpawo yɛ jɛi, ni ekɛ tsinanuu komekome kɛ ojwɛni hu komekome shã afɔle yɛ afɔleshãa latɛ fɛɛ afɔleshãa latɛ nɔ.
15Kɛkɛ ni Balaam kɛɛ Balak akɛ, “Baadamɔ biɛ yɛ oshãa afɔle lɛ he, koni matsi kɛya hiɛ fioo koni mikɛ Yehowa ayakpe.”
16Yehowa kɛ Balaam kpe, ni ekɛ wiemɔ wo enaa, ni ekɛɛ lɛ akɛ, “Kuu osɛɛ kɛya Balak ŋɔɔ ni oyakɛɛ lɛ nɔ ni mikɛɛ bo lɛ.” 17Ni Balaam ku esɛɛ kɛba, ni ebanina Balak kɛ Moab onukpai lɛ fɛɛ damɔ Balak shãa afɔle lɛ he. Kɛkɛ ni Balak bi Balaam akɛ, “Mɛni Yehowa kɛɛ?” 18Balaam wo egbee nɔ, ni ebɔ̃i gbaa, ni ekɛɛ,
“Tee shi, Balak, ni obo mi toi;
Zipor binuu, feemɔ toi ohã mi.
19 #
1 Sam 15.29
Nyɔŋmɔ jeee gbɔmɔ adesa ni eeemale,
aloo gbɔmɔ ni eeeshwa ehe yɛ nɔ ni efee hewɔ.
Mɛni ekɛɛ dã ni efeee;
aloo ewo ehe shi ni eyeee nɔ?
20Naa, jɔɔmɔ efã mi akɛ mijɔɔ;
Ena ejɔɔ amɛ momo, ni minyɛŋ hiɛ matsake
21Minaaa akɛ osharã ko basharã Israel,
aloo Israel he baajara lɛ.
Yehowa amɛNyɔŋmɔ lɛ kɛ amɛ yɛ;
lɛ amɛbɔɔ oshe amɛhãa akɛ amɛmaŋtsɛ.
22Nyɔŋmɔ jie amɛ kɛje Ijipt;
amɛNyɔŋmɔ lɛ he wa oookɛɛ wuo.
23Ŋkunyaa ko nyɛŋ Israel,
ni klamɔ ko hu mɔŋ lɛ.
Odase ni abaaye yɛ Israel he ji akɛ,
‘Nyɔŋmɔ ninenaa nitsumɔ nɛ.’
24Naa, Israel teɔ shi tamɔ jata yoo;
ni ewoɔ ehe nɔ tamɔ jata nuu.
Ebuuu shi, ja egbe ni eye,
ni enu mɛi ni egbegbee alá etã dã.”
25Kɛkɛ ni Balak kɛɛ Balaam akɛ, “Kaalomɔ amɛ, ni kaajɔɔ amɛ hu.”
26Shi Balaam here Balak nɔ, ni ekɛɛ lɛ akɛ, “Ani mikɛɛɛ bo akɛ nɔ fɛɛ nɔ ni Yehowa aaakɛɛ lɛ no mibafee lo?”
Balaam gbalɛ ni ji Etɛ̃ lɛ
27Balak kɛɛ Balaam akɛ, “Agbɛnɛ hã wɔya he kroko. Eko lɛ Nyɔŋmɔ aaana he tsui, ni eeeŋmɛ bo gbɛ akɛ olomɔ Israelbii lɛ yɛ jɛi ohã mi.” 28Ni Balak kɛ Balaam shwie nɔ kɛtee Poer Gɔŋ ni kwɛɔ shiaŋa kplenee lɛ nɔ lɛ yiteŋ. 29Balaam kɛɛ Balak akɛ, “Mãamɔ afɔleshãa latɛi kpawo yɛ biɛ ohã mi; ni obahã mi tsinahii kpawo kɛ ojwɛnii hu kpawo yɛ biɛ.” 30Balak fee nɔ ni Balaam kɛɛ lɛ lɛ; ni Balak kɛ tsinanuu kɛ ojwɛni shã afɔle yɛ afɔleshãa latɛ fɛɛ afɔleshãa latɛ nɔ.
Bible in Ga Language © Bible Society of Ghana, 2020.