Numeri 22
22
Moab Maŋtsɛ tsu ayatsɛ Balaam abahã lɛ
1Israelbii lɛ fã nyiɛmɔ, ni amɛyato shi yɛ Moab ŋa kplenee ni kã Yordan Faa lɛ bokãgbɛ lɛ nɔ, yɛ Yeriko ŋlɛnɔ. 2Moab Maŋtsɛ Balak, Zipor bi lɛ, ena enu nɔ ni Israelbii lɛ efee Amorbii lɛ 3kɛ Israelbii lɛ ayifalɛ hu; ni no hewɔ lɛ, lɛ kɛ emaŋbii lɛ fɛɛ she gbeyei naakpa. Israelbii lɛ ahe ŋmiŋmi mɔ Moabbii lɛ. 4Moabbii lɛ kɛɛ Midian maŋ onukpai lɛ akɛ, “Ataamɛi, gbɔmɛi nɛɛ ni baa kɛ ta nɛɛ baakpãtã nibii ni yɔɔ wɔkpokpai lɛ anɔ fɛɛ ahiɛ tamɔ tsina kpeɔ ŋa nɔ jwɛi lɛ.” Kɛkɛ ni Moab Maŋtsɛ Balak 5#Num 31.8; 2 Pet 2.15-16; Yud 11 tsu bɔfoi akɛ amɛya Petor ni kã Eufrate Faa lɛ naa yɛ Amawo shikpɔŋ lɛ nɔ lɛ koni amɛyakpee Balaam, Beor bi lɛ amɛbahã lɛ. Wiemɔ ni bɔfoi lɛ kɛyahã Balaam ji, “Naa, mɛi komɛi, jaku muu, efã kɛjɛ Ijipt shikpɔŋ lɛ nɔ kɛba, ni amɛgbɛ amɛshwã shikpɔŋ lɛ nɔ fɛɛ. Ni miwieɔ nɛɛ amɛbɛŋkɛ biɛ amɛtã, mihiɛ tua amɛ. 6No hewɔ lɛ, ofainɛ, ba nɔŋŋ, shi amɛyi fa fe wɔ, koni obalomɔ amɛ ohã mi akɛ aleenɔ minine aaatsɔ̃ amɛnɔ koni mashwie amɛ kɛje shikpɔŋ lɛ nɔ lo. Mile akɛ kɛji ojɔɔ mɔ ko lɛ, jɔɔmɔ baa mɔ lɛ nɔ; ni kɛji olomɔ mɔ ko hu lɛ, loomɔ baa mɔ lɛ nɔ.”
7 #
2 Pet 2.15
Moab onukpai lɛ kɛ Midian onukpai lɛ yi mli amɛtee; ni amɛhiɛ klamɔ nyɔmɔwoo shika kɛtee. Be ni amɛyashɛ Balaam ŋɔɔ lɛ, amɛkɛ wiemɔ ni Maŋtsɛ Balak kɛtsu amɛ lɛ hã lɛ. 8Balaam kɛɛ amɛ akɛ, “Nyɛwɔa biɛ ŋmɛnɛ; wɔ lɛ mibaba mibakɛɛ nyɛ nɔ ni Yehowa aaakɛɛ mi.” No hewɔ lɛ, Moab onukpai lɛ kɛ Balaam hi shi gbi lɛ gbɛkɛ lɛ.
9Ni Nyɔŋmɔ ba Balaam ŋɔ̃ɔ, ni ebabi lɛ akɛ, “Mɛɛ hii yɔɔ oŋɔ̃ɔ nɛɛ?”
10Balaam kɛɛ Nyɔŋmɔ akɛ, “Moab Maŋtsɛ Balak, Zipor bi lɛ, tsu amɛ miŋɔ̃ɔ akɛ 11maŋ muu ko, ni jɛ Ijipt shikpɔŋ lɛ nɔ eba, ni amɛgbɛ amɛshwã amɛshikpɔŋ lɛ nɔ fɛɛ. No hewɔ lɛ, ekɛɛ mibalomɔ amɛ mihã lɛ koni enyɛ amɛ ekɛwu, ni eshwie amɛ kɛje shikpɔŋ lɛ nɔ.”
12Nyɔŋmɔ kɛɛ Balaam akɛ, “Okɛ bɔfoi lɛ akaya tsɛmɔ lɛ, ni asaŋ okalomɔ nakai mɛi lɛ hu, ejaakɛ mɛi ni mijɔɔ amɛ ni.”
13No hewɔ lɛ, enɔ jetsɛremɔ leebi lɛ, Balaam tee Balak bɔfoi lɛ aŋɔ̃ɔ, ni eyakɛɛ amɛ akɛ, “Nyɛkua nyɛsɛɛ nyɛyaa nyɛmaŋ. Yehowa ekpɛlɛ̃ɛɛ nɔ ehãaa mi akɛ mikɛ nyɛ aya.” 14Kɛkɛ ni Moab onukpai lɛ ku amɛsɛɛ amɛba Balak ŋɔ̃ɔ, ni amɛbakɛɛ lɛ akɛ, “Balaam ekpɛlɛ̃ɛɛ akɛ eba otsɛmɔ lɛ.”
15Maŋtsɛ Balak saa tsu bɔfoi ni ahiɛ tsii, asaŋ ni amɛyi fa fe tsutsubii lɛ; 16ni amɛtee Balaam ŋɔ̃ɔ, ni amɛyakɛɛ lɛ akɛ, “Bɔ ni Moab Maŋtsɛ Balak, Zipor bi lɛ, kɛɛ nɛ, ‘Ofainɛ, ni okahã nɔ ko nɔ ko miitsi bo tsɛmɔ lɛ baa gbɛ! 17Ejaakɛ mibawo ohiɛ nyam babaoo diɛŋtsɛ, asaŋ nɔ fɛɛ nɔ ni obaakɛɛ mi lɛ, mibafee; no hewɔ lɛ, bɔɔ mɔdɛŋ ni oba koni obalomɔ mɛi ni ebaje nɛɛ ohã mi kɛkɛ.’ ”
18 #
1 Maŋ 13.8
Kɛkɛ ni Balaam here nɔ, ni ekɛɛ Balak bɔfoi lɛ akɛ, “Kɛji Balak ŋɔ̃ ewe lɛ mli shika kɛ jwiɛtɛi tsu obɔ̃ kɛ kpo obɔ̃ tete eke mi po, minyɛŋ maje Yehowa, miNyɔŋmɔ, lɛ wiemɔ sɛɛ ni mafee nɔ ko ni fe aloo nɔ ko ni shɛɛɛ bɔ ni lɛ Yehowa ekɛɛ mi lɛ. 19Shi kɛ̃lɛ, nyɛ hu, nyɛwɔa biɛ ŋmɛnɛ gbɛkɛ nɛɛ tamɔ mɛi krokomɛi lɛ koni mabo nɔ ni Yehowa aaakɛɛ mi ekoŋŋ toi.”
20Nyɔɔŋ lɛ Nyɔŋmɔ kɛɛ Balaam akɛ, “Kɛji tsɛmɔ kɛkɛ hii nɛɛ ba bo tsɛmɔ lɛ, saamɔ ohe koni okɛ amɛ aya; shi moŋ nɔ pɛ ni makɛɛ bo lɛ no ofee.” 21No hewɔ lɛ, enɔ jetsɛremɔ lɛ, Balaam wo eteji nɔ nii, ni ekɛ Moab onukpai lɛ yi mli ni amɛtee.
Balaam kɛ eteji lɛ
22Shi Nyɔŋmɔ mli wo la akɛ Balaam miiya tsɛmɔ lɛ. No hewɔ lɛ, be ni Balaam ta eteji lɛ nɔ kɛyaa ni eblahii enyɔ lɛ kɛ lɛ nyiɛ lɛ, Yehowa bɔfo lɛ badamɔ gbɛ lɛ nɔ koni esa enaa. 23#Jɛn 3.24; Yos 5.13 Be ni teji lɛ na Yehowa bɔfo lɛ damɔ gbɛ lɛ nɔ ni egbala eklante ehiɛ edɛŋ lɛ, ewi gbɛ lɛ, ni eyanyiɛ ŋa lɛ mli. Balaam yi teji lɛ koni ekɛdɔ eyi kɛba gbɛ lɛ nɔ. 24Kɛkɛ ni Yehowa bɔfo lɛ tee ni eyadamɔ gbɛ leleoo ko ni kã waintromi ateŋ lɛ nɔ; gbogbo yɛ gbɛ lɛ biɛ kɛ biɛ. 25Be ni teji lɛ na Yehowa bɔfo lɛ ekɛ ehe yakpɛtɛ gbogbo lɛ, ni emia Balaam nane ekpɛtɛ gbogbo lɛ. Kɛkɛ ni Balaam yi teji lɛ ekoŋŋ. 26Yehowa bɔfo lɛ saa etsi kɛtee ehiɛ, ni eyasa Balaam naa yɛ nififiaŋ he ko, he ni gbɛ bɛ ni akɛtsɔ̃ɔ he kɛyaa ninejurɔgbɛ loo abɛkugbɛ. 27Agbɛnɛ be ni teji lɛ na Yehowa bɔfo lɛ, eho ebu shi. Balaam mli wo la ni ebɔ̃i teji lɛ yii. 28#2 Pet 2.16 Kɛkɛ ni Yehowa hã teji lɛ wie, ni ebi Balaam akɛ, “Mɛni mifee bo hewɔ ni oyi mi shii etɛ̃ sɔŋŋ nɛɛ?”
29Balaam here teji lɛ nɔ ekɛɛ akɛ, “Ejaakɛ oofee mi buulu. Eji mihiɛ klante kulɛ benɛ migbe bo momo.”
30Teji lɛ kɛɛ Balaam akɛ, “Ani jeee mi ji oteji ni otaa minɔ daa nɛɛ kɛbashi ŋmɛnɛ gbi nɛɛ? Ani mifee bo nɛkɛ nɔ ko dã lo?”
Balaam jie naa akɛ, “Dabida!”
31Kɛkɛ ni Yehowa gbele Balaam hiŋmɛii, ni ena Yehowa bɔfo lɛ damɔ gbɛ lɛ nɔ kɛ eklante ni egbala ehiɛ edɛŋ. Balaam mã eyi shi, ni ekɛ ehiɛ bu shi. 32Yehowa bɔfo lɛ kɛɛ Balaam akɛ, “Mɛɛ hewɔ ni oyi oteji lɛ shii etɛ̃ sɔŋŋ nɛɛ? Naa, miba koni mibasa onaa, ejaakɛ nyiɛmɔ nɔ ni onyiɛ nɛɛ ejaaa yɛ mihiɛ. 33Teji lɛ na mi, ni ewi ehe kɛje mihiɛ shii etɛ̃ sɔŋŋ. Ewiii ehe kɛjeee mihiɛ kulɛ, benɛ migbe bo momo, ni mihere teji lɛ kɛkɛ yiwala.” 34Balaam hã Yehowa bɔfo lɛ hetoo akɛ, “Mifee esha; ejaakɛ mileee kwraa akɛ oba oosa minaa yɛ gbɛ lɛ nɔ. No hewɔ lɛ, kɛji minyiɛmɔ nɛɛ esaaa ohiɛ lɛ, maku misɛɛ mɔ.”
35Shi Yehowa bɔfo lɛ kɛɛ Balaam akɛ, “Okɛ hii lɛ aya kɛkɛ; shi moŋ wiemɔ ni mikɛ bo aaawie lɛ, no nɔŋŋ pɛ owie.” Kɛkɛ ni Balaam kɛ Maŋtsɛ Balak bɔfoi lɛ tsa nyiɛmɔ lɛ nɔ, ni amɛtee.
Maŋtsɛ Balak here Balaam atuu
36Be ni Balak nu akɛ Balaam miiba etsɛmɔ lɛ, eyi mli kɛtee lɛ kpeemɔ yɛ Ar, ni ji Moabbii amaŋ ko ni kã Arnon Faa lɛ naa lɛ mli. Arnon Faa nɛɛ ji Moabbii ahusu. 37Balak kɛɛ Balaam akɛ, “Ani jeee tsu mitsu kpɛkpɛ̃ɛkpɛ akɛ abatsɛ bo kɛba? Mɛɛba obaaa klɛŋklɛŋ tsɛmɔ lɛ? Ani osusuɔ akɛ minyɛŋ bo majuro bɔ ni sa lo?”
38Balaam kɛɛ Balak akɛ, “Naa mi; miba. Shi moŋ, mɛɛ hewalɛ miyɔɔ? Wiemɔ ni Nyɔŋmɔ kɛbaawo minaa lɛ, no nɔŋŋ mawie.” 39Kɛkɛ ni Balaam kɛ Balak shwie nɔ kɛba maŋ ni gbɛi ji Huzot lɛ mli; 40ni Balak kɛ tsinai kɛ toi shã afɔle yɛ jɛi, ni ehã ayahã Balaam kɛ onukpai ni kɛ lɛ nyiɛ lɛ afɔleshãa loo lɛ eko. 41Enɔ jetsɛremɔ leebi lɛ, Balak tsɛ Balaam fata ehe, ni amɛkwɔ Baal Gɔŋ lɛ kɛtee eyiteŋ; ni Balaam jɛ jɛi ni ena Israelbii asafo muu lɛ ayifalɛ.
Bible in Ga Language © Bible Society of Ghana, 2020.