Mateo 9
9
Kuumɔ helatsɛ ko tsamɔ
(Marko 2.1-12; Luka 5.17-26)
1 #
Mat 4.13
Yesu bote lɛlɛ mli, ni efo ŋshɔ lɛ, ni eba lɛ diɛŋtsɛ emaŋ lɛ mli. 2Ni naa, akɛ mɔ ko ni yeɔ kuumɔ hela ni kã saa nɔ ba eŋɔɔ. Ni be ni Yesu na amɛhemɔkɛyeli lɛ, ekɛɛ mɔ ni yeɔ kuumɔ hela lɛ akɛ, “Bi, hã otsui anyɔ omli, akɛ ohe eshai lɛ efa bo!” 3#Mar 2.7 Ni mlatsɔɔlɔi lɛ ateŋ mɛi komɛi kɛɛ yɛ amɛmli akɛ, “Musu mɔ nɛ bɔɔ nɛɛ.” 4#Mat 12.25; Yoh 2.25 Ni be ni Yesu na amɛjwɛŋmɔi lɛ, ekɛɛ, “Mɛɛ hewɔ ni nyɛjwɛŋɔ nii fɔ̃ji yɛ nyɛtsuii amli nɛɛ? 5Te emli nɔ ni kɛɛmɔ jaraaa hu, akɛ aaakɛɛ akɛ, ‘Aŋɔ ohe eshai lɛ afa bo,’ aloo ‘Tee shi ni onyiɛ’ lɛ? 6Shi be ni afee ni nyɛna akɛ Gbɔmɔ Bi lɛ yɛ hegbɛ yɛ shikpɔŋ lɛ nɔ akɛ ekɛ eshai faa lɛ,” — kɛkɛ lɛ ekɛɛ mɔ ni yeɔ kuumɔ hela lɛ akɛ, “Tee shi, wo osaa lɛ ni oya shĩa!” 7Ni ete shi etee shĩa. 8Shi be ni asafo lɛ na lɛ, amɛnaa kpɛ amɛhe, ni amɛwo Nyɔŋmɔ hiɛ nyam akɛ ekɛ nɛkɛ hegbɛ ehã gbɔmɛi.
Mateo tsɛmɔ
(Marko 2.13-17; Luka 5.27-32)
9Ni be ni Yesu je jɛi eyaa lɛ ena nuu ko ni atsɛɔ lɛ Mateo ta toohemɔhe lɛ, ni ekɛɛ lɛ akɛ, “Nyiɛmɔ misɛɛ!” Ni ete shi enyiɛ esɛɛ.
10Ni eba mli akɛ, be ni eta niyenii ashi yɛ shĩa lɛ, toohelɔi kɛ eshafeelɔi babaoo ba, ni amɛkɛ Yesu kɛ ekaselɔi lɛ batara okplɔ̃ lɛ he. 11#Luk 15.2 Ni be ni Farisifoi lɛ na lɛ, amɛbi ekaselɔi lɛ akɛ, “Mɛɛ hewɔ nyɛtsɔ̃ɔlɔ lɛ kɛ toohelɔi kɛ eshafeelɔi yeɔ nii nɛɛ?” 12Shi be ni Yesu nu lɛ, ekɛɛ amɛ akɛ, “Mɛi ni yɔɔ hewalɛ lɛ, tsofatsɛ he ehiaaa amɛ, shi moŋ mɛi ni he yeɔ lɛ. 13#Hos 6.6; 1 Sam 15.22; 18.11; Mat 12.7 Shi nyɛyaa ni nyɛyakasea nɔ ni ji enɛ shishi. ‘Mɔbɔnalɛ mitaoɔ, ni jeee afɔle!’ Ejaakɛ mibaaa jalɔi atsɛmɔ, shi eshafeelɔi moŋ.”
Ŋmaahilɛ he sane
(Marko 2.18-22; Luka 5.33-39)
14 #
Luk 18.12
Kɛkɛ ni Yohane kaselɔi lɛ ba eŋɔɔ ni amɛkɛɛ, “Mɛɛ hewɔ wɔ kɛ Farisifoi lɛ fɔɔ ŋmaahilɛ, shi okaselɔi lɛ ehiii ŋmaa lɛ?” 15#Yoh 3.29 Ni Yesu kɛɛ amɛ akɛ, “Ani yookpeemɔ he bialɔi lɛ aaanyɛ aye ŋkɔmɔ gbii abɔ ni ayɛmforowu lɛ kɛ amɛ yɔɔ lɛ? Shi gbii aaaba momo ni aaaŋɔ ayɛmforowu lɛ kɛaaje amɛteŋ kɛaatee, ni no dani amɛaahi ŋmaa.
16 #
Yoh 1.17
“Shi mɔ ko kɛ mamanaa hee taaa atade momo; ejaakɛ nɔ ni akɛta lɛ yeɔ atade lɛ, ni folɔ lɛ lɛɔ moŋ fe tsutsu lɛ. 17Asaŋ akɛ wain hee wooo wolo tɔi memeji amli; no lɛ, wolo tɔi lɛ aaaflɛ, ni wain lɛ aaashwie shi, ni wolo tɔi lɛ aaafite; shi wain hee lɛ, wolo tɔi hei amli moŋ akɛwoɔ, ni enyɔ lɛ fɛɛ feɔ shweshweeshwe.”
Onukpa lɛ biyoo lɛ kɛ yoo ni ta Yesu atade he lɛ
(Marko 5.21-43; Luka 8.40-56)
18Be ni ekɛ amɛ wieɔ wiemɔi nɛɛ lɛ, onukpa ko ba bakoto lɛ ekɛɛ, “Mibiyoo eje mli amrɔ nɛɛ, shi ba ni okɛ onine abaŋmɛ enɔ, ni ehiɛ aaatsɛ̃.” 19Ni Yesu te shi ni ekɛ ekaselɔi lɛ nyiɛ esɛɛ.
20Ni naa, yoo ko ni eye láfɔsemɔ hela afii nyɔŋma kɛ enyɔ lɛ baje esɛɛgbɛ eta etade naamuu lɛ he. 21#Mat 14.36 Ejaakɛ ekɛɛ yɛ eyiŋ akɛ, “Kɛji mina mita etade lɛ he kɛkɛ lɛ, mihe aaawa mi.” 22Shi Yesu tsɔ̃ ehe, ni be ni ena lɛ lɛ ekɛɛ, “Biyoo, hã otsui anyɔ omli, ohemɔkɛyeli lɛ ehere oyiwala!” Ni yoo lɛ he wa lɛ nakai ŋmɛlɛtswaa lɛ nɔ nɔŋŋ.
23Ni be ni Yesu ba onukpa lɛ we lɛ ni ena blɛkpalɔi kɛ mɛi pii ni feɔ hoo lɛ, 24#Yoh 11.4, 11, 25 ekɛɛ amɛ akɛ, “Nyɛyaa sɛɛ, ejaakɛ oblayoo lɛ gboko, shi wɔ kɛkɛ ewɔɔ.” Ni amɛŋmɔ lɛ. 25Shi be ni ashwie mɛi lɛ, etee tsu lɛ mli, ni emɔ oblayoo lɛ nineshi, ni ete shi. 26Ni nɛkɛ sane nɛɛ jije yɛ jɛi shikpɔŋ muu lɛ fɛɛ nɔ.
Shwilafoi enyɔ lɛ atsamɔ
27Ni be ni Yesu je jɛi ehoɔ lɛ, shwilafoi enyɔ nyiɛ esɛɛ ni amɛmiibolɔ akɛ, “Naa wɔ mɔbɔ, David Bi!” 28Ni be ni ebote shĩa lɛ, shwilafoi lɛ ba eŋɔɔ; ni Yesu bi amɛ akɛ, “Nyɛheɔ nyɛyeɔ akɛ manyɛ enɛ mafee lo?” Amɛkɛɛ lɛ akɛ, “Hɛɛ, Nuŋtsɔ!” 29#Mat 8.13 Kɛkɛ ni etara amɛhiŋmɛii lɛ ahe ni ekɛɛ, “Bɔ ni nyɛheɔ nyɛyeɔ lɛ, afee nakai ahã nyɛ.” 30#Mat 8.4 Ni amɛhiŋmɛii lɛ gbele. Ni Yesu bɔ amɛ kɔkɔ akɛ, “Nyɛkwɛa ni mɔ ko akalea!” 31Shi amɛ lɛ, be ni amɛje jɛi lɛ, amɛyagbɛ ehe sane lɛ amɛshwã yɛ jɛi shikpɔŋ lɛ nɔ fɛɛ.
Mumui ko tsamɔ
32Shi be ni Yesu kɛ ekaselɔi lɛ jeɔ kpo lɛ, akɛ mumui ko ni mumɔ fɔŋ yɔɔ emli ba eŋɔɔ. 33Ni be ni efã mumɔ fɔŋ lɛ, mumui lɛ wie. Ni asafoi lɛ anaa kpɛ amɛhe amɛkɛɛ, “Anako nɛkɛ nɔ ko pɛŋ yɛ Israel!” 34#Mar 3.22; 12.24; Luk 11.25 Shi Farisifoi lɛ kɛɛ, “Mumɔi fɔ̃ji alumɔ lɛ nɔ etsɔ̃ɔ efãa mumɔi fɔ̃ji lɛ!”
Yesu musuŋ tsɔ̃ lɛ
35 #
Mat 4.23; Mar 1.39; Luk 4.44 Ni Yesu kpa maji lɛ kɛ akrowai lɛ fɛɛ nɔ, ni etsɔ̃ɔ nii yɛ amɛkpeehei lɛ, ni eshiɛ maŋtsɛyeli lɛ he sane kpakpa lɛ, ni etsa hela fɛɛ hela kɛ hejaramɔ fɛɛ hejaramɔ. 36#Mat 14.14; 1 Maŋ 22.17; 2 Kron 18.16; Mar 6.34; Eze 34.5; Num 27.17 Shi be ni ena mɛi babaoo lɛ, emusuŋ tsɔ̃ lɛ yɛ amɛhewɔ, ejaakɛ etɔ amɛ ni amɛfee yuuyaa tamɔ toi ni bɛ kwɛlɔ. 37#Luk 10.2 Kɛkɛ ni ekɛɛ ekaselɔi lɛ akɛ, “Nikpamɔ lɛ fa, shi nitsulɔi lɛ faaa. 38No hewɔ lɛ, nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!”
Bible in Ga Language © Bible Society of Ghana, 2020.