Mateo 8
8
Kpitiyelɔ ko tsamɔ
(Marko 1.40-45; Luka 5.12-16)
1Shi be ni Yesu jɛ gɔŋ lɛ nɔ ekpeleke shi lɛ, asafoi pii nyiɛ esɛɛ. 2Ni naa, kpitiyelɔ ko ba ebakoto lɛ ekɛɛ, “Nuŋtsɔ, kɛji oosumɔ lɛ, ooonyɛ ohã mihe atse!” 3Ni Yesu kpã enine mli eta ehe ni ekɛɛ, “Miisumɔ, ohe atse!” Ni amrɔ lɛ ekpiti lɛ tã. 4#Mat 9.30; Mar 7.36; Luk 17.14; Lev 14.2-32 Ni Yesu kɛɛ lɛ akɛ, “Kwɛmɔ ni okakɛɛ mɔ ko; shi moŋ yaa ni okɛ ohe ayatsɔ̃ɔ osɔfo lɛ, ni ohã keenii ni Mose to lɛ, ni no aaafee odase ahã amɛ.”
Asraafoiohaatsɛ ko wenuu tsamɔ
(Luka 7.1-10)
5Shi be ni Yesu bote Kapernaum lɛ, asraafoiohaatsɛ ko ba eŋɔɔ ebakpa lɛ fai, 6ni ekɛɛ, “Nuŋtsɔ, miwenuu kã shi yɛ shĩa kɛ kuumɔhela, eena nɔ naakpa.” 7Ni Yesu kɛɛ lɛ akɛ, “Miiba ni mabatsa lɛ.” 8Ni asraafoiohaatsɛ lɛ here nɔ ekɛɛ, “Nuŋtsɔ, esaaa mi akɛ obaa mikoi lɛ shi; shi moŋ wiemɔ wiemɔ lɛ kɛkɛ, ni aaatsa miwenuu lɛ. 9Ejaakɛ mi po ni mi ji gbɔmɔ ni yɔɔ nɔyeli shishi lɛ, miyɛ asraafoi yɛ mishishi, ni mikɛɔ mɔ kome akɛ, ‘Yaa!’ Ni eyaa; kɛ mɔ kroko hu akɛ, ‘Ba!’ Ni ebaa; ni mikɛɔ mitsulɔ akɛ, ‘Feemɔ enɛ!’ Ni efeɔ.” 10#Mat 15.28 Shi be ni Yesu nu enɛ lɛ, ehiɛ fee lɛ yaa, ni ekɛɛ mɛi ni nyiɛ esɛɛ lɛ akɛ, “Anɔkwale mikɛɔ nyɛ akɛ minako hemɔkɛyeli ni da tamɔ enɛ yɛ Israel! 11#Yes 49.12; Luk 13.28, 29 Shi miikɛɛ nyɛ akɛ mɛi pii aaajɛ bokã kɛ anai aba, ni amɛkɛ Abraham kɛ Isak kɛ Yakob aaabatara okplɔ̃ he yɛ ŋwɛi maŋtsɛyeli lɛ mli. 12#Mat 22.13; 24.51; 25.30 Shi maŋtsɛyeli lɛ mli bii lɛ, aaashwie amɛ awo gbɛsɛɛ duŋ lɛ mli; jɛi yaafo kɛ nyanyɔji ashishikpemɔ aaahi.” 13#Mat 9.29; Mat 15.28 Ni Yesu kɛɛ asraafoiohaatsɛ lɛ akɛ, “Yaa, bɔ ni ohe oye lɛ, afee nakai ahã bo.” Ni atsa ewenuu lɛ yɛ nakai ŋmɛlɛtswaa lɛ nɔŋŋ nɔ.
Petro shaayoo tsamɔ
(Marko 1.29-34; Luka 4.38-39)
14 #
1 Kor 9.5
Ni be ni Yesu ba Petro we lɛ, ena eshaayoo lɛ kã shi kɛ atridii. 15Ni emɔ enineshi, ni atridii lɛ tse yɛ enɔ, ni ete shi ni esɔmɔ amɛ.
Helatsɛmɛi pii atsamɔ
(Marko 1.32-34; Luka 4.40-41)
16Shi be ni shɛ gbɛkɛnaashi lɛ, akɛ mɛi pii ni mumɔi fɔ̃ji yɔɔ amɛmli ba eŋɔɔ. Ni ekɛ ewiemɔ fãmɔ mumɔi lɛ, ni etsa mɛi ni he yeɔ fɛɛ. 17#Yes 53.4 Koni nɔ ni gbalɔ Yesaia wie lɛ aba mli akɛ, “Lɛ diɛŋtsɛ ewo wɔhejaramɔi lɛ, ni etere wɔhelai lɛ.”
Mɛi ni taoɔ Yesu sɛɛ anyiɛ
(Luka 9.57-62)
18 #
Mar 4.35; Luk 8.22 Shi be ni Yesu na mɛi pii yɛ ehewɔ lɛ, efã akɛ afo ŋshɔ lɛ kɛya esɛɛgbɛ. 19Ni mlatsɔɔlɔ ko ba eŋɔɔ ebakɛɛ lɛ akɛ, “Tsɔɔlɔ, manyiɛ osɛɛ kɛya he fɛɛ he ni oyaa.” 20#2 Kor 8.9 Ni Yesu kɛɛ lɛ akɛ, “Osɔi yɛ bui, ni ŋwɛi loofɔji yɛ tsui; shi Gbɔmɔ Bi lɛ bɛ he ni ekɛ eyitso ŋmɛɔ.” 21#1 Maŋ 19.20 Ekaselɔi lɛ ateŋ mɔ kroko hu kɛɛ lɛ akɛ, “Nuŋtsɔ; ŋmɛɛ mi gbɛ ni mayafu mitsɛ dã.” 22Shi Yesu kɛɛ lɛ akɛ, “Nyiɛmɔ misɛɛ, ni ohã gbohii afu amɛ diɛŋtsɛ amɛgbohii.”
Yesu fã ahum yi ni efɔ̃ɔ tswaa
(Marko 4.35-41; Luka 8.22-25)
23Ni ebote lɛlɛ ko mli ni ekaselɔi lɛ nyiɛ esɛɛ. 24Ni naa; ŋshɔ lɛ fee hamahama aahu ni ŋshɔkei miikumɔ miiwo lɛlɛ lɛ mli; shi Yesu, ewɔ.
25Ni ekaselɔi lɛ ba eŋɔɔ ni amɛbatsiɛ̃ lɛ amɛkɛɛ, “Nuŋtsɔ, heremɔ wɔyiwala, wɔhiɛ miikpãtã!” 26#Mat 14.31; 16.8 Ni ekɛɛ amɛ akɛ, “Mɛɛba nyɛsheɔ gbeyei nɛkɛ, nyɛ ni nyɛhemɔkɛyeli faaa?” Kɛkɛ ni ete shi ni efã kɔɔyɔɔ lɛ kɛ ŋshɔ lɛ yi, ni eŋmɛ dɛmm. 27Shi gbɔmɛi lɛ ahiɛ fee amɛ yaa amɛkɛɛ, “Mɛɛ gbɔmɔ srɔto nɛ, ni kɔɔyɔɔ kɛ ŋshɔ tete boɔ lɛ toi nɛɛ?”
Yesu tsa hii enyɔ ni mumɔi fɔ̃ji yɔɔ amɛmli
(Marko 5.1-20; Luka 8.26-39)
28Be ni eyashɛ sɛɛ lɛ gbɛ yɛ Gadarabii ashikpɔŋ lɛ nɔ lɛ mɛi enyɔ ni mumɔi fɔ̃ji yɔɔ amɛmli ni amɛjɛ gbohii afũuhe lɛ kɛ lɛ bakpe; amɛhiɛ ewo la tsɔ̃ bɔ ni mɔ ko nyɛɛɛ nakai gbɛ lɛ nɔ atsɔ̃. 29#Luk 4.41; 2 Pet 2.4 Ni naa, amɛbolɔ amɛkɛɛ, “Mɛɛ sane wɔkɛ bo yɔɔ, bo Yesu Nyɔŋmɔ Bi lɛ? Ani oba biɛ ni obawo wɔ hejaramɔ dani be lɛ ashɛ?” 30Ni kplotoi akuu kpele ko miiye nii yɛ shɔŋŋ. 31Ni mumɔi fɔ̃ji lɛ kpa lɛ fai amɛkɛɛ, “Kɛji ofã wɔ lɛ hã wɔyabote kplotoi akuu lɛ mli.” 32Ni ekɛɛ amɛ akɛ, “Nyɛyaa!” Ni amɛje kpo amɛyabote kplotoi akuu lɛ mli; ni naa, kuu muu lɛ fɛɛ wo foi kɛjɛ gɔŋ lɛ nɔ kɛyashwie ŋshɔ lɛ mli, ni amɛgboi yɛ nu lɛ mli. 33Ni mɛi ni kwɛɔ amɛ lɛ jo foi, amɛtee maŋ lɛ mli ni amɛyagba saji lɛ fɛɛ, kɛ mɛi ni mumɔi fɔ̃ji yɔɔ amɛmli lɛ anɔ lɛ hu. 34Ni naa, maŋ muu lɛ fɛɛ je kpo ni amɛkɛ Yesu ayakpe; ni be ni amɛna lɛ lɛ, amɛkpa lɛ fai akɛ eje amɛkpokpai lɛ anɔ eya.
Bible in Ga Language © Bible Society of Ghana, 2020.