Yesaia 37
37
Hezekia bi Yesaia dɛŋ ŋaawoo
(2 Maŋtsɛmɛi 19.1-7)
1 #
Jɛn 37.29
Be ni Maŋtsɛ Hezekia nu sane lɛ, egbala ehe atadei, ni ekɔ kpekpe ebu, ni eyiŋ kɛtee Yehowa we lɛ. 2Kɛkɛ ni etsu Eliakim, mɔ ni kwɛɔ maŋtsɛ we lɛ, kɛ Shebna, woloŋmalɔ lɛ, kɛ osɔfonukpai ni amɛbumɔ kpekpe kɛtee Gbalɔ Yesaia ŋɔɔ. 3Amɛyakɛɛ lɛ akɛ, bɔ ni Hezekia kɛɛ nɛ, “Haomɔ kɛ ahorabɔɔ kɛ hiɛshishwiemɔ gbi ji ŋmɛnɛ gbi nɛɛ. Wɔtsɔ̃ tamɔ yoo ni fɔmɔ eshɛ elagbaŋ, shi ebɛ hewalɛ ni ekɛbaafɔ. 4Ekolɛ Yehowa, oNyɔŋmɔ lɛ, enu tsulɔnukpa lɛ, mɔ ni enuŋtsɔ Asiria maŋtsɛ lɛ tsu lɛ koni ebaye Nyɔŋmɔ hiɛkãalɔ lɛ he fɛo lɛ, wiemɔi lɛ. Aba mli akɛ Yehowa, oNyɔŋmɔ lɛ, enu ahorabɔɔ wiemɔi lɛ, ni ebaagbala mɔ ni wie lɛ toi. No hewɔ lɛ, sɔlemɔ okpa Nyɔŋmɔ fai yɛ wɔmaŋbii ni eshwɛ lɛ ahewɔ.”
5Be ni Maŋtsɛ Hezekia tsuji lɛ ba Yesaia ŋɔɔ lɛ, 6Yesaia kɛɛ amɛ akɛ, “Nyɛyakɛa nyɛnuŋtsɔ lɛ akɛ, ‘Bɔ ni Yehowa kɛɔ nɛ, Kaashe gbeyei yɛ wiemɔi ni onu ni Asiria maŋtsɛ lɛ tsuji lɛ kɛbabɔ mi ahora lɛ hewɔ. 7Naa, mi diɛŋtsɛ mikɛ mumɔ ko baawo emli ni aaahã enu sane ko, ni no aaahã eku esɛɛ kɛya lɛ diɛŋtsɛ eshikpɔŋ lɛ nɔ; ni mibahã enyɔ yɛ klante naa yɛ lɛ diɛŋtsɛ nɔŋŋ eshikpɔŋ lɛ nɔ.’ ”
Asiria bafã Hezekia tsui ekoŋŋ
(2 Maŋtsɛmɛi 19.8-19)
8Asiria maŋtsɛ tsulɔnukpa lɛ ku esɛɛ etee, ejaakɛ enu akɛ emaŋtsɛ lɛ eshi Lakish. Eyanina Asiria maŋtsɛ lɛ ni ekɛ Libna miiwu. 9Asiria maŋtsɛ lɛ nu akɛ Ijipt maŋtsɛ kɛ Kush Maŋtsɛ Tirhaka efã kɛmiiba koni amɛkɛ lɛ abawu. Be ni enu sane nɛɛ lɛ, Asiria maŋtsɛ lɛ tsu bɔfoi kɛ wolo kɛtee Hezekia ŋɔɔ kɛ wiemɔ akɛ, 10“Nyɛyakɛa Hezekia, Yuda maŋtsɛ lɛ, akɛ, ‘Kaahã oNyɔŋmɔ lɛ ni ohiɛ kã enɔ lɛ miilaka bo akɛ Asiria maŋtsɛ lɛ yeŋ Yerusalɛm nɔ kunim.’ 11Bɛ onu nɔ ni Asiria maŋtsɛmɛi lɛ efee shikpɔji lɛ fɛɛ, bɔ ni amɛkpãtãa hiɛ butuu lɛ? Ani osusuɔ akɛ abahere oyiwala? 12Majimaji lɛ ni mitsɛmɛi lɛ kpãtã amɛhiɛ lɛ, ani amɛnyɔŋmɔi lɛ ehere amɛyiwala? Ekomɛi ji Gozan kɛ Haran kɛ Rezef kɛ Betlehembii lɛ ni kulɛ amɛhi Telasar lɛ? 13Nɛgbɛ Hamat maŋtsɛ lɛ kɛ Arpad maŋtsɛ lɛ kɛ Sefarwaim maŋtsɛ lɛ kɛ Hena maŋtsɛ lɛ kɛ Iva maŋtsɛ lɛ yɔɔ?”
14Hezekia he wolo lɛ yɛ bɔfoi lɛ adɛŋ, ni ekane, kɛkɛ ni eyiŋ kɛtee Yehowa we lɛ, ni eyagbele wolo lɛ mli efɔ̃ Yehowa hiɛ, 15ni esɔle ekɛɛ, 16#Ɛks 25.22 “Ao Yehowa, Taiatsɛ, Israel Nyɔŋmɔ ni omaŋtsɛ sɛi lɛ ma kerubim anɔ, bo ji Nyɔŋmɔ hã maŋtsɛyelii fɛɛ, bo okoome pɛ obɔ ŋwɛi kɛ shikpɔŋ. 17Ao Yehowa, ba otoi shi ni obo toi. Ao Yehowa, gbɛɛ ohiŋmɛiŋ ni okwɛ nɔ ni yaa nɔ lɛ. Bo wiemɔi fɛɛ ni Sankerib kɛtsu kɛba koni akɛbabɔ bo, Nyɔŋmɔ hiɛkãalɔ lɛ, ahora lɛ toi. 18Ao Yehowa, eyɛ mli lɛɛlɛŋ akɛ Asiria maŋtsɛ lɛ ekpãtã majimaji lɛ fɛɛ kɛ amɛshikpɔji lɛ ahiɛ, 19ni amɛhole maji lɛ anyɔŋmɔi lɛ amɛshɛrɛ amɛshwie la mli ni ashãshãai, ejaakɛ nomɛi lɛ jeee nyɔŋmɔi kwraa ni, shi moŋ gbɔmɛi aniji anaa nitsumɔnii ni, tso kɛ tɛ ni, ni no hewɔ afite amɛ lɛ. 20No hewɔ lɛ, agbɛnɛ, Ao wɔNyɔŋmɔ, heremɔ wɔ yɛ Asiria maŋtsɛ lɛ dɛŋ koni shikpɔŋ lɛ nɔ maŋtsɛyelii fɛɛ kɛna ale akɛ bo okoome ji Yehowa.”
Yesaia kɛ wiemɔ tsu yaha Maŋtsɛ Hezekia
(2 Maŋtsɛmɛi 19.20-37)
21Kɛkɛ ni Yesaia, Amoz bi lɛ, kɛ wiemɔ tsu ayahã Maŋtsɛ Hezekia akɛ, “Bɔ ni Yehowa, Israel Nyɔŋmɔ lɛ, kɛɛ nɛ, akɛni okpa mi fai yɛ Asiria Maŋtsɛ Sankerib he hewɔ lɛ, 22nɔ ni Yehowa kɛɔ yɛ Sankerib he nɛ, Zion biyoo oblayoo foro, Yerusalɛm ebuuu bo, Sankerib, ehãaa nɔ ko nɔ ko. 23Namɔ ahora obɔ, ni asaŋ ojɛ lɛ lɛ? Namɔ obolɔ owo, ni ogbɛ ohiŋmɛiŋ owo lɛ lɛ? Mi, Israel Mɔ Krɔŋkrɔŋ lɛ ni. 24Otsɔ̃ otsuji anɔ, ni obabɔ Nuŋtsɔ lɛ ahora, ni okɛɛ akɛ, ‘Mikwɔ kɛtee gɔji lɛ ayiteiaŋ, kɛtee Lebanon sɛɛ tɔ̃ɔ. Mifolɔ emli tsenedrui ni kwɔlɔ lɛ kɛ emli sɛsɛoi kpakpai ni hi fe fɛɛ lɛ. Mibote ekoo ni mli ti lɛ diɛŋtsɛ mli. 25Mitsatsaa bui, ni minu amɛmli nu, ni mikɛ minaneshi hã Ijipt shikpɔŋ nɔ fai fɛɛ tswɛm ŋala.’
26“Ani onuko kwraa akɛ mi, mito nibii nakai kɛjɛ blema beebe lo? Ni nibii ni mito kɛjɛ blema lɛ mihã eba mli agbɛnɛ nɛɛ akɛ okpãtã maji ni atswa gbogbo awo amɛhe ahiɛ koni amɛtsɔmɔ nii ni akumɔ abua shi kuikui. 27Amɛmli bii ahewalɛ eyashɛɛɛ nɔ ko nɔ ko; amɛtsui fã, ni amɛyoyro, ni amɛtsɔmɔ tamɔ ŋa nɔ jwɛi loo bai fɔbii ni etsɛ̃ yɛ tsu yiteŋ ni amɛdaraaa, shi amɛŋalaa oya lɛ.
28“Mile oshitee kɛ oshitamɔ, kɛ oyaa kɛ obaa mli fɛɛ, kɛ ogrimɔ ni ogri owo mi lɛ. 29#Deut 32.27 Akɛni ogri owo mi, ni minu shwãa ni oshwã lɛ hewɔ lɛ, mikɛ kpoŋ baatsɛ̃rɛ ogugɔ mli, ni mikɛ mimanyoflɛ baawo odaaŋ, ni mibakpale bo kɛku osɛɛ kɛya; mikɛ bo baatsɔ̃ gbɛ ni otsɔ̃ nɔ kɛba lɛ nɔŋŋ nɔ.”
30Kɛkɛ ni Yesaia kɛɛ Maŋtsɛ Hezekia akɛ, “Nɔ ni baaba lɛ he okadi mitoɔ bo nɛɛ: afi nɛɛ mli lɛ nyɛbaaye ŋmãa ni lɛ diɛŋtsɛ ekwɛ̃; wɔsɛɛ afi hu nakai ŋmãa nɔŋŋ nyɛaaye. Shi afi ni ji etɛ̃ lɛ mli lɛ, nyɛdua nii ni nyɛkpaa, ni nyɛfea waintromii hu, ni nyɛyea amɛmli yibii. 31Yudabii ni eshwɛ, ni ji mɛi ni eje gbele mli lɛ, baashwere tamɔ tsei ni etsɛ̃rɛ fãi kɛtee shikpɔŋ ni amɛwo yibii. 32Ejaakɛ eeeshwɛ mɛi kɛ̃ yɛ Yerusalɛm kɛ Zion Gɔŋ lɛ nɔ ni aaaje gbele mli. Yehowa, Taiatsɛ lɛ, hiɛdɔɔ lɛ baatsu enɛ.”
33“No hewɔ lɛ, nɔ ni Yehowa kɛɛ yɛ Asiria maŋtsɛ lɛ he nɛ, ‘Ebaŋ maŋ nɛɛ mli, ni etsɛ̃ŋ gãi kome nɛkɛ tete ewoŋ mli, ni ekɛ etsɛŋ ko baŋ jɛi, ni asaŋ etswaŋ kpoku ko ewoŋ he. 34He ni etsɔ̃ kɛba lɛ, jɛi nɔŋŋ eeetsɔ̃ kɛaaku esɛɛ kɛaatee; ni eboteŋ maŋ nɛɛ mli.’ Yehowa kɛɛ. 35Ejaakɛ mibabu maŋ nɛɛ he koni mahere eyiwala yɛ mi diɛŋtsɛ mihewɔ kɛ mitsulɔ David hu hewɔ.”
36Yehowa bɔfo ko tee Asiria tabilɔi lɛ ashitoohe lɛ mli, ni eyagbe mɛi akpei oha kɛ nyɔŋmai kpaanyɔ kɛ enumɔ. Be ni ate shi leebi maŋkpa lɛ, naa gbɔmɛi lɛ jwere shi ni amɛgboi. 37Kɛkɛ ni Asiria Maŋtsɛ Sankerib gbala ehe shi, ni eku esɛɛ etee shĩa, ni eyahi Nineve. 38Ni gbi ko pɛ ni etee ejaa yɛ enyɔŋmɔ ni egbɛi ji Nisrok we lɛ, lɛ nɔŋŋ ebihii, Adramelek kɛ Sharezer, kɛ klante gbe lɛ. Kɛkɛ ni ebihii nɛɛ jo foi kɛtee Ararat shikpɔŋ lɛ nɔ. Kɛkɛ ni bihii lɛ eko ni egbɛi ji Esa-Hardon lɛ baye Sankerib sɛɛ akɛ maŋtsɛ.
Currently Selected:
Yesaia 37: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
