Yesaia 38
38
Maŋtsɛ Hezekia he ye
(2 Maŋtsɛmɛi 20.1-11; 2 Kronika 32.24-26)
1Nakai be lɛ mli lɛ, hela mɔ̃ Maŋtsɛ Hezekia, ni eehe egbo. Gbalɔ Yesaia, Amoz bi lɛ, tee eyasara lɛ, ni ekɛɛ lɛ akɛ, “Bɔ ni Yehowa kɛɛ nɛ, ‘Too owe lɛ he gbɛjianɔ, ejaakɛ oyi naŋ wala; obaagbo.’ ”
2Kɛkɛ ni Hezekia tsɔ̃ ehiɛ eha gbogbo lɛ, ni esɔle ekpa Yehowa fai, 3#2 Maŋ 18.3-6 ni ekɛɛ akɛ, “Ao Yehowa, miikpa bo fai, kaimɔ bɔ ni misɔmɔ bo kɛ anɔkwa kɛ mitsuiŋ fɛɛ, ni mifee nɔ ni hi yɛ ohiɛ!” Kɛkɛ ni Hezekia fo blobloblo.
4Kɛkɛ ni Yehowa kɛɛ Yesaia akɛ, 5“Yaa koni oyakɛɛ Hezekia akɛ, ‘Bɔ ni Yehowa, otsɛ David Nyɔŋmɔ lɛ, kɛɛ nɛ: Minu ofaikpamɔ lɛ, ni mina oyaafo lɛ; maŋɔ afii nyɔŋma kɛ enumɔ mafata owala be lɛ he. 6Asaŋ mahere bo kɛ nɛkɛ maŋ nɛɛ fɛɛ yiwala kɛjɛ Asiria maŋtsɛ lɛ dɛŋ. Ni mabu maŋ nɛɛ he.’ ”
21Yesaia kɛɛ Maŋtsɛ Hezekia akɛ eŋɔ agbãmi ni awiɛ eto esane lɛ nɔ, ni ehe baawa lɛ,#38.21-22: Afã kukuji 21-22 kɛjɛ Yitso nɛɛ naagbee kɛbahɔ biɛ koni eha sane lɛ aja jogbaŋŋ. (Kwɛmɔ 2 Maŋ 20.6-9) 22Maŋtsɛ Hezekia bi Yesaia akɛ, “Mɛɛ okadi tsɔ̃ɔ akɛ manyɛ maya Yehowa we lɛ ekoŋŋ?”
7“Enɛ ji okadi ni tsɔ̃ɔ bo akɛ mibafee nii ni mikɛɛ lɛ. 8Naa, mibahã atrakpoi lɛ asusuma ni hulu ni nyɔɔ shi hãa ebakãa atswere ni Maŋtsɛ Ahaz tswa lɛ nɔ lɛ atsi kɛya sɛɛsɛɛ nanefaamɔi nyɔŋma.” Kɛkɛ ni susuma lɛ tsi kɛtee sɛɛ nanefaamɔi nyɔŋma.
9Be ni Yuda Maŋtsɛ Hezekia he eye, ni ehe ewa lɛ sɛɛ lɛ, eŋma yijiemɔ lala nɛɛ:
10Misusu akɛ miwala teŋ tuuŋtu lɛ,
mashi kɛya gbohiiaje agboi lɛ anaa,
mayaye mifii ni eshwɛ lɛ yɛ jɛi.
11 #
Lal 27.13
Misusu akɛ minaŋ Yehowa dɔŋŋ
yɛ hiɛkãalɔi ashikpɔŋ lɛ nɔ.
Minaŋ gbɔmɔ adesa ko hu dɔŋŋ yɛ jeŋ.
12 #
Hiob 7.6
Afo miwala sɛɛ tamɔ akpaa
tookwɛlɔ buu ni ashi,
tamɔ mamalolɔ kotaa ni efoɔ
mama nɔ yɛ mamaloo tsɔne nɔ.
Gbi kome jenamɔ lɛ miwala sɛɛ efo.
13 #
Hiob 10.16
Mifo mitsɛ yelikɛbuamɔ nyɔɔŋnyɔɔŋ
fɛɛ kɛyashi jetsɛremɔ.
Ojwara miwui amli tamɔ jata,
Ofo miwala sɛɛ gbi kome jenamɔ.
14Mibolɔ tamɔ nyɔŋmɔbitɛte
loo kpokukpoku;
miye ŋkɔmɔ tamɔ okpo.
Ŋwɛikwɛmɔ sɔŋŋ hã mihiŋmɛii shiu.
Ao Yehowa, efĩ mi,
daamɔ mli oha mi.
15Te makɛɛ tɛŋŋ?
Ejaakɛ ekɛ mi ewie;
ni lɛ diɛŋtsɛ efee nɔ ni ba lɛ.
Ehiii mi wɔɔ,
ejaakɛ misusuma miiye awerɛhoo.
16Ao Nuŋtsɔ, enɛɛmɛi anɔ
adesai tsɔ̃ɔ amɛhiɔ shi;
ni enɛɛmɛi fɛɛ amli
mimumɔ yɔɔ.
Ao tsa mi,
ni oha miyi ana wala.
17 #
Lal 32.1, 2; Mika 7.18, 19 Naa, mijurɔyeli hewɔ jɛ
ni mina hejaramɔ babaoo lɛ,
Ojie miwala kɛje hiɛkpãtãmɔ mli,
ejaakɛ osherɛ mihe eshai lɛ fɛɛ
oshwie osɛɛ.
18 #
Lal 6.6
Gbohiiaje ejieŋ oyi,
ni gbele hu kafoŋ bo;
gbohii eŋɔŋ amɛhiɛ amɛfɔŋ
onɔkwayeli lɛ nɔ.
19Hiɛkãalɔi hɛɛ, hiɛkãalɔi moŋ ji mɛi ni jieɔ oyi,
tamɔ bɔ ni mifeɔ ŋmɛnɛ nɛɛ.
Tsɛmɛi ni hãa bii leɔ onɔkwayeli lɛ.
20Yehowa ohere miyiwala,
ni no hewɔ lɛ, wɔkɛ saŋku aaala
milalai lɛ,
wɔwala gbii abɔ fɛɛ
yɛ Yehowa we lɛ.
Currently Selected:
Yesaia 38: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
