Yesaia 36
36
Asiria fã Yerusalɛm tsui
(2 Maŋtsɛmɛi 18.13-27; 2 Kronika 32.1-19)
1Yuda Maŋtsɛ Hezekia yinɔ afi ni ji nyɔŋma kɛ ejwɛ lɛ nɔ lɛ, Asiria Maŋtsɛ Sankerib fã ta, ni ebatua Yuda maji fɛɛ ni atswa gbogbo awo he, ni eŋɔ maji lɛ. 2Asiria maŋtsɛ nɛɛ wo etsulɔnukpa#36.2 Rabshekeh: Asiria bii awiemɔ, eshishi ji tsulɔnukpa kɛ tabilɔi babaoo gbɛ kɛjɛ Lakish kɛbanina Maŋtsɛ Hezekia yɛ Yerusalɛm. Tsulɔnukpa lɛ wa yɛ tɛmpɔŋ lɛ nɔ, he ni mamalolɔi lɛ yɔɔ lɛ, yɛ nujɔɔ ni yiteŋgbɛ kpaakpo lɛ mli nu lɛ nyiɛɔ mli lɛ masɛi. 3Kɛkɛ ni tsuji nɛɛ, Eliakim, Hilkia bi lɛ, mɔ ni kwɛɔ maŋtsɛ shĩa tso muu lɛ fɛɛ nɔ lɛ, kɛ Shebna, maŋtsɛ we lɛ woloŋmalɔ lɛ, kɛ Yoa, Asaf bi lɛ, mɔ ni kwɛɔ maŋtsɛ we lɛ woji ni aŋmala lɛ anɔ lɛ, je kpo kɛjɛ maŋ lɛ mli kɛtee eŋɔɔ. 4Kɛkɛ ni Asiria maŋtsɛ tsulɔnukpa lɛ kɛɛ amɛ akɛ, “Nyɛyakɛa Hezekia akɛ, bɔ ni maŋtsɛ kpeteŋkple ni ji Asiria maŋtsɛ lɛ kɛɔ nɛ, ‘Mɛni po nɔ ohiɛ kã nɛɛ?’ 5Osusuɔ akɛ naabu wiemɔ kɛkɛ ji ŋaa kɛ hewalɛ ni akɛwuɔ ta lo? Namɔ po nɔ ohiɛ kã hewɔ ni otse mihiɛ atua nɛɛ? 6#Eze 29.6-7 Ohiɛ kã Ijipt nɔ. Naa, Ijipt lɛ glã dɛhiɛmɔtso ni eku ni, ni mɔ ni kɛ ehiɛ fɔ̃ɔ enɔ lɛ, etsuɔ edɛ̃. Nakai Ijipt maŋtsɛ lɛ ji hã mɛi fɛɛ ni hiɛ kãa enɔ lɛ.”
7Asiria maŋtsɛ tsulɔnukpa lɛ tee nɔ ekɛɛ akɛ, “Shi kɛji oookɛɛ mi akɛ, ‘Yehowa, wɔNyɔŋmɔ lɛ, nɔ wɔhiɛ kã lɛ’, ani jeee lɛ ehei grɔŋŋi kɛ efɔleshãa latɛi lɛ Hezekia kumɔ be ni ekɛɛ Yudabii kɛ Yerusalɛmbii akɛ, ‘Nɛkɛ afɔleshãa latɛ koome nɛɛ he nyɛbaaja yɛ lɛ?’ 8Agbɛnɛ ba koni okɛ minuŋtsɔ, Asiria maŋtsɛ lɛ, abata abasa. Maha bo okpɔŋɔi akpei enyɔ kɛji obaana bo diɛŋtsɛ omɛi, hii tabilɔi, otara amɛnɔ. 9Te ooofee tɛŋŋ onyɛ minuŋtsɔ tsuji, asafoiatsɛmɛi bibii fe fɛɛ, lɛ ateŋ mɔ kome po hiɛ odamɔ be mli ni okɛ ohiɛ efɔ̃ Ijipt tayaa shwiilii kɛ okpɔŋɔnɔtalɔi anɔ lɛ? 10Osusuɔ akɛ ba ni miba mibatua shikpɔŋ nɛɛ koni makpãtã hiɛ lɛ, Yehowa fataaa mihe? Yehowa moŋ ni kɛɛ mi akɛ, ‘Fãa kɛya koni oyatua shikpɔŋ lɛ ni okpãtã hiɛ.’ ”
11Kɛkɛ ni Eliakim kɛ Shebna kɛ Yoa kɛɛ Asiria maŋtsɛ tsulɔnukpa lɛ akɛ, “Ofainɛ, okɛ otsuji awie yɛ Aram wiemɔ mli moŋ, ejaakɛ wɔnuɔ no hu. Okɛ wɔ akawie yɛ Hebri wiemɔ mli yɛ maŋbii ni jwere gbogbo lɛ nɔ lɛ atoiŋ.”
12Shi tsulɔnukpa lɛ to he ekɛɛ akɛ, “Aso nyɛ kɛ nyɛnuŋtsɔ lɛ kɛkɛ ŋɔɔ minuŋtsɔ tsu mi kɛ wiemɔi nɛɛ? Dabida! Miba maŋbii nɛɛ ni tara gbogbo lɛ nɔ lɛ hu kɛ wiemɔ. Ejaakɛ amɛ hu amɛbaaye amɛ diɛŋtsɛ amɛwamɔ ni amɛbaanu amɛshãmɔ tamɔ nyɛ nɔŋŋ.”
13Kɛkɛ ni tsulɔnukpa lɛ ho edamɔ shi, ni ewo egbee nɔ waa, ni ekɛɛ yɛ Hebri wiemɔ mli akɛ, “Nyɛboa maŋtsɛ kpeteŋkple ni ji Asiria maŋtsɛ lɛ toi! 14Bɔ ni maŋtsɛ lɛ kɛɛ nɛ, ‘Nyɛkahãa Hezekia miilakaa nyɛ, ejaakɛ enyɛŋ nyɛyiwala ehere.’ 15Nyɛkahãa Hezekia miihã nyɛkɛ nyɛhiɛ miifɔ Yehowa nɔ, ni nyɛkɛɛ akɛ, ‘Bɔ fɛɛ bɔ ni fee lɛ Yehowa baahere wɔyiwala; atuŋ maŋ nɛɛ awoŋ Asiria maŋtsɛ lɛ dɛŋ kɔkɔɔkɔ.’ 16#1 Maŋ 5.5; Mika 4.4 Nyɛkaboa Hezekia toi. Ejaakɛ bɔ ni Asiria Maŋtsɛ kɛɔ nɛ, ‘Nyɛjea kpo nyɛbaa koni nyɛ kɛ mi abakpãtãa, koni mɔ fɛɛ mɔ aye ewaintso kɛ egbamitso yibii, ni nyɛteŋ mɔ fɛɛ mɔ anu enubu mli nu, 17kɛyaashi beyinɔ ni maba mabaloo nyɛ kɛya shikpɔŋ ni tamɔ nyɛ diɛŋtsɛ nyɛshikpɔŋ lɛ nɔ, shikpɔŋ ko ni abelei kɛ wain yɔɔ nɔ, aboloo kɛ waintromi ashikpɔŋ. 18#Yes 10.10; 37.12 Nyɛkahãa Hezekia miilakaa nyɛ akɛ Yehowa baahere nyɛyiwala.’ Ani jeŋmaji lɛ anyɔŋmɔi lɛ eko ehere eshikpɔŋ yiwala kɛje Asiria maŋtsɛ lɛ dɛŋ pɛŋ? 19Nɛgbɛ Hamat kɛ Arpad nyɔŋmɔi lɛ yɔɔ? Nɛgbɛ Sefarwaim nyɔŋmɔi lɛ yɔɔ? Ani amɛhere Samaria yiwala kɛjɛ midɛŋ? 20Te nyɔŋmɔi nɛɛ ateŋ nɔ ni ehere amɛshikpɔŋ yiwala kɛje midɛŋ pɛŋ, hewɔ ni Yehowa lɛ, lɛ lɛ eeehere Yerusalɛm yiwala kɛjɛ midɛŋ lɛ?”
21Shi Yerusalɛmbii lɛ etswaaa amɛsɛŋ, ni amɛfooo edaaŋ, ejaakɛ shi ni Maŋtsɛ Hezekia ewo amɛ ji, “Nyɛkahãa lɛ hetoo ko kwraa.” 22Kɛkɛ ni Eliakim, Hilkia bi lɛ ni kwɛɔ maŋtsɛ we lɛ nɔ lɛ, kɛ Shebna, woloŋmalɔ lɛ, kɛ Yoa, Asaf bi lɛ, blema woji ni aŋmala anɔkwɛlɔ lɛ, ba Hezekia ŋɔɔ kɛ amɛhe atadei ni egbala, ni amɛbagba lɛ Asiria maŋtsɛ tsulɔnukpa lɛ wiemɔi lɛ.
Currently Selected:
Yesaia 36: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
