Yesaia 35
35
Krɔŋkrɔŋfeemɔ gbɛ
1Shiaŋa lɛ kɛ shikpɔŋ gbiŋ lɛ aaanya,
shiaŋa lɛ mii aaashɛ ehe
ni eeegba afofro tamɔ fɔfɔi.
2Shiaŋa lɛ aaagba afofro babaoo,
ni emli aaafli lɛ,
ni eeenya kɛ lala.
Aaaŋɔ Lebanon anunyam lɛ ahã lɛ,
kɛ Karmel kɛ Sharon wulamɔ lɛ hu.
Mɔ fɛɛ mɔ aaana Yehowa anunyam lɛ,
kɛ wɔNyɔŋmɔ lɛ agbojee lɛ.
3 #
Heb 12.12
Nyɛwajea mɛi ni anijiaŋ eje wui lɛ,
kɛ mɛi ni anakutseiaŋ egbɔjɔ lɛ.
4 #
Lal 94.1
Nyɛkɛa mɛi ni tsui fãa lɛ akɛ,
“Nyɛfea ekãa, nyɛkashea gbeyei!
Naa nyɛNyɔŋmɔ lɛ baaba
koni ebatɔ nyɛhe owele.
Ebaaba koni ebahere nyɛyiwala.”
5Kɛkɛ lɛ aaagbele shwilafoi ahiŋmɛii,
ni aaagbele toimulɔi hu atoii;
6 #
Mat 11.5
obubuafoi aaatumɔ tamɔ ofrote,
ni mumuii baala kɛ nyamɔ;
ejaakɛ nu aaatue, ni eeeho
tamɔ faa yɛ shiaŋa lɛ mli.
7Shiaŋa ni enɔ edɔ lɛ aaatsɔ̃ kpaakpo,
ni shikpɔŋ ni nu bɛ nɔ lɛ
baayi obɔ̃ kɛ nuhiŋmɛii.
Ŋaŋgbei ashibumɔhei lɛ
baatsɔmɔ hei ni nu tara,
ni glã kɛ ntoo aaakwɛ̃ yɛ jɛi.
8Gbɛjegbɛ aaakã jɛi,
ni aaatsɛ gbɛ lɛ, “Gbɛ Krɔŋkrɔŋ.”
Mɔ ko ni he tseee enyiɛŋ nɔ,
ni kwashiai tete eduŋ gbɛ yɛ nɔ.
9Jata ko jata ko ehiŋ jɛi;
kooloo kakawua ko kwraa
tsɔŋ jɛi kɛhoŋ,
akɛ ja mɛi ni Yehowa ehere amɛyiwala lɛ kɛkɛ.
10 #
Lal 126.6; Kpoj 21.4 Mɛi ni Yehowa ehere amɛ lɛ,
aaaku amɛsɛɛ kɛaaba ekoŋŋ,
ni amɛaaba Zion kɛ nyamɔ lala.
Amɛmii aaashɛ kɛya naanɔ;
amɛaayi kɛ miishɛɛ kɛ nyamɔ,
amɛyeŋ ŋkɔmɔ, ni amɛdɔmɔŋ
ŋtsɔi dɔŋŋ.
Currently Selected:
Yesaia 35: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
