Yesaia 34
34
Nyɔŋmɔ baagbala ehenyɛlɔi atoi
1Ao nyɛ majimaji, nyɛtsia nyɛbɛŋkɛa koni nyɛbaboa toi. Nyɛ shikpɔŋ lɛ nɔ bii, nyɛboa toi. Hã jeŋ muu lɛ kɛ emli nibii fɛɛ, je lɛ kɛ nii fɛɛ ni kwɛ̃ɔ yɛ mli afee toi. 2Ejaakɛ Yehowa mli efu majimaji lɛ fɛɛ; egri ewo amɛtai lɛ, ni ejɔɔ amɛ nɔ, ni eŋɔ amɛ eha koni akpãtã amɛhiɛ. 3Abaashɛrɛ amɛgbohii lɛ ashwie, ni gbohii lɛ aaaje fu, ni amɛlá aaakpa gɔji lɛ anɔ kpɔtɔɔ. 4#Mat 24.29; Mar 13.25; Luk 21.26; Kpoj 6.13, 14 Hulu kɛ nyɔɔŋtsere kɛ ŋulamii aaasere, ni aaakota ŋwɛi tamɔ wolo. Amɛtabilɔi lɛ fɛɛ aaatswiatswia shi tamɔ baa kpalaa yɛ waintso nɔ loo agbãmitso nɔ lɛ.
5 #
Yer 49.7-22; Yes 63.1-6; Eze 25.12-14; 35.1-15; Amos 1.11-12; Oba 1.1-14; Mal 2.5 Yehowa esaa klante lɛ eto yɛ ŋwɛi. Naa, klante lɛ baayi Edom nɔ, maŋ ni ajɔɔ enɔ aha hiɛkpãtãmɔ lɛ. 6Yehowa klante lɛ amɛlá kɛ fɔ ewu he kpɔtɔɔ; tamɔ too gwantɛŋi kɛ too kpakpoi alá kɛ agbɛnɛ ojwɛnii asabai ahe fɔ ni akɛshã afɔle. Ejaakɛ Yehowa miishã afɔle yɛ Bozra, ni ebaakpãtã wala hiɛ waa diɛŋtsɛ yɛ Edom. 7Gbɔmɛi baanyɔnyɔi tamɔ wuoi kɛ tsina hii kɛ tsina ajebui. Lá baakpa amɛshikpɔŋ lɛ nɔ kpɔtɔɔ, ni amɛshikpɔŋ su baafee ŋɛlɛŋŋ kɛ fɔ. 8Ejaakɛ Yehowa oweletɔɔ be lɛ ni, be ni ebaaye Zion sane lɛ ehã lɛ koni eto lɛ najiaŋ pɛpɛɛpɛ lɛ.
9 #
Jɛn 19.24
Edom fai lɛ baadi tuŋŋ tamɔ kootaa, ni eshikpɔŋ lɛ su aaatsɔ̃ tamɔ swɔɔ. Eshikpɔŋ tso muu aaatsɔ̃ tamɔ kootaa ni miitso. 10#Kpoj 14.11; 19.3 Ebaatso nyɔɔŋnyɔɔŋ kɛ shwaneshwane fɛɛ, ni ebaaje lasu kɛya naanɔ. Shikpɔŋ lɛ aaatsɔ̃ amaŋfɔ̃ yinɔi fɛɛ; mɔ ko mɔ ko tsɔŋ jɛi kɛhoŋ dɔŋŋ kɛaatee naanɔ. 11Jɛi aaatsɔ̃ kpokukpokui kɛ kɔtɔkɔi agboshinii; ni patui kɛ kwãakwãalabitei aaahi jɛi. Yehowa baaha eshikpɔŋ lɛ agbo koni etsɔ̃ olɛŋlɛ, ni nɔ kpakpa ko ehiŋ nɔ. 12Aaawo jɛi akɛ, “Maŋnɔyeli bɛ”, ni akɛ emli lumɛi fɛɛ efeŋ fɛifɛi. 13Ŋmei kɛ sansrɔ kɛ aŋlɛŋlɛ fɛɛ aaakwɛ̃kwɛ̃ɛ yɛ amɛmɔji lɛ kɛ amɛmaji ni atswa gbogbo awo amɛhe lɛ amli. Jɛi aaatsɔ̃ ŋaŋgbei ashihilɛhe kɛ dugumai hu ahilɛhe. 14Ŋaŋ kooloi kɛ klãji aaabakpe yɛ jɛi, ni sasabonsami hu aaatsɛtsɛɛ amɛhe yɛ jɛi. Jɛi nɔŋŋ sisai aaaya koni amɛyatao hejɔɔmɔhe. 15Patu aaafee etsu yɛ jɛi, eeeŋmɛ yɛ jɛi ni eeebu nɔ; eeefɛlɛ, ni eeebu ebii lɛ anɔ yɛ hɔ̃ɔŋ mli. Akromai aaayabua amɛhe naa yɛ jɛi ekomekome.
16Nyɛtaoa yɛ Yehowa wolo lɛ mli koni nyɛkanea. Kooloi nɛɛ ateŋ ekome folo nɛkɛ eshwɛŋ ni eyaŋ jɛi, ni eko eko hefatalɔ ebɔŋ lɛ. Ejaakɛ eje Yehowa naa, ni efã, ni Emumɔ lɛ ji nɔ ni baabua amɛnaa. 17Lɛ diɛŋtsɛ nɔŋŋ efɔ̃ shikpɔŋ lɛ nɔ oshiki eha amɛ. Shikpɔŋ lɛ baatsɔ̃ amɛgbɛfaŋnɔ kɛaatee naanɔ, ni amɛaahi nɔ yinɔi fɛɛ.
Currently Selected:
Yesaia 34: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
