Yesaia 33
33
Yelikɛbuamɔ he sɔlemɔ
1Kpoo hã bo, fitelɔ, bo mɔ ni bo diɛŋtsɛ lɛ afiteko bo. Kpoo hã bo, bo mɔshishinyiɛlɔ ni mɔ ko enyiɛko oshishi. Kɛji ogbe onifitemɔ lɛ naa lɛ, bo hu abaakpãtã ohiɛ; ni kɛji ogbe mɔshishinyiɛmɔ lɛ naa lɛ, bo hu abaanyiɛ oshishi.
2Ao Yehowa, dromɔ wɔ, shi bo pɛ gbɛ wɔkwɛɔ. Daa gbi lɛ bo ofeɔ wɔhewalɛ kɛ wɔyiwalaherelɔ yɛ fimɔ be mli. 3#Lal 68.3 Kɛji oshi yɛ ŋwɛi lɛ, mɛi joɔ foi; ni kɛji owo ohe nɔ lɛ maji gbɛɔ shwãa. 4Aaaha nyɛnomŋɔɔnii tamɔ baalabii; ni abaake kɛba onɔ tamɔ otukpɛi.
5Awo Yehowa nɔ, ejaakɛ lɛ eyeɔ nii fɛɛ nɔ. Eeehã Yerusalɛm ayi obɔ̃ tɔ kɛ jalɛ saneyeli kɛ jalɛ nifeemɔ, 6ni eeehã nyɛyinɔ afee shweshweeshwe, ni eeeduro nyɛ nilee kɛ ŋaa babaoo. Ninamɔ kpele ji Yehowa gbeyeishemɔ.
7Naa, kãkãlɔi lɛ miibolɔ yɛ blohuiaŋ, ni bɔfoi ni bɔ mɔdɛŋ koni toiŋjɔlɛ aba lɛ miifo bloblo. 8Gbɛjegbɛi lɛ anɔ kã efolo, ni gbɛnyiɛlɔi eyaaa baaa. Akumɔ kpãŋmɔi amli, ni abuuu fuamɔi ni aye afua, ni abuuu gbɔmɔ adesa ahãaa fɛifɛi. 9Shikpɔŋ lɛ miiye ŋkɔmɔ, ni eeŋala. Labanon kooŋ tsei ayibii ekpala, ekoi lɛ miigbi. Sharon jɔɔ shikpɔŋ frɔ̃frɔ̃ lɛ etsɔ̃ shiaŋa, ni Bashan kɛ Karmel Gɔŋ lɛ nɔ tsei ayibai miikpala.
Yehowa miibɔ ehenyɛlɔi kɔkɔ
10Yehowa kɛɛ akɛ, “Agbɛnɛ, mibate shi! Agbɛnɛ mibawo mihe nɔ! Agbɛnɛ abaawo minɔ! 11Nyɛhiɛ tutuu musu, ni nyɛbaafɔ jwɛi; mumɔ ni jɛɔ nyɛgugɔŋ lɛ, la ni, ni no nɔŋŋ baashã nyɛ. 12#Lal 15.2-5; 24.3, 4 Maŋbii lɛ baatsɔ̃ tamɔ kaaloo ni ashã; amɛaatsɔ̃ tamɔ ŋmei ni afolɔ ashwie shi ni awoɔ mli la ni ashãa. 13Nyɛ mɛi ni nyɛyɔɔ shɔŋŋ, nyɛboa nɔ ni mifee lɛ toi, ni nyɛ mɛi ni nyɛbɛŋkɛ, nyɛkpɛlɛa mihewalɛ lɛ nɔ.”
14Eshafeelɔi ni yɔɔ Zion lɛ miishe gbeyei, ni mɛi ni sheee Nyɔŋmɔ gbeyei lɛ ahe miikpokpo. Amɛkɛɛmɔ ji, “Wɔteŋ namɔ baanyɛ la naa edamɔ kɛyashi naanɔ?” 15Mɔ ni feɔ jalɛnii, ni ewieɔ nɔ ni ja, mɔ ni nyaaa wieyeli mli nii he, ni eheee nyɔɔŋ nii, mɔ ni tsimɔɔ etoi koni ekanu láshishwiemɔ yiŋtoi ahe, ni eŋamɔɔ ehiŋmɛii koni ekana nɔfɔŋfeemɔ lɛ, 16lɛ ji mɔ ni baahi gɔji lɛ anɔ, ni tɛsai aaatsɔ̃ mɔji ahã lɛ. Ebaana nii eye, ni ebaana nu enu.
Wɔsɛɛ shihilɛ kɛ ŋɔɔmɔ lɛ
17Okɛ ohiŋmɛii baana maŋtsɛ lɛ he fɛo, kɛ shikpɔŋ ko ni kã shi shwaŋŋ kɛtee shɔŋŋ. 18Kaimɔ kɛkɛ oookai nyɛsɛɛ ko gbeyei ni oshe lɛ. Nɛgbɛ mɔ ni kane shika lɛ yɔɔ? Nɛgbɛ mɔ ni ŋmɛ too ni aye lɛ yɔɔ? Nɛgbɛ mɔ ni kane mɔji lɛ yɔɔ? 19#Deut 28.49 Onaŋ gbɔmɛi hetsɔ̃ɔlɔi lɛ dɔŋŋ, mɛi ni wieɔ wiemɔ ni wa ni anuuu shishi, ni amɛwieɔ kɛ mumɔhaa ni anuuu shishi lɛ. 20Kwɛmɔ Zion, maŋ he ni wɔyeɔ wɔgbii juji lɛ yɛ lɛ! Ohiŋmɛii aaana Yerusalɛm akɛ toiŋjɔlɛ maŋ ni yɔɔ shweshweeshwe. Eyɛ tamɔ buu ni ma shi shiŋŋ, buu ni afamɔŋ ehe shiŋmlitsei lɛ kɔkɔɔkɔ, ni ehe taŋkpei lɛ ekoeko tseŋ. 21Jɛi Yehowa aaahi yɛ enunyam mli ahã wɔ. Fai wuji kɛ bibii fɛɛ aaahi jɛi; shi moŋ lɛlɛ agbo ni awiriɔ ko kɛ meele ko nyɛŋ fai lɛ ekoeko mli etsɔ̃ kɛho. 22Ejaakɛ Yehowa ji wɔkojolɔ, Yehowa ji wɔnɔyelɔ. Yehowa ji wɔmaŋtsɛ; lɛ nɔŋŋ ebaahere wɔyiwala. 23Otaŋkpei lɛ amli egbɔjɔ, amɛnyɛɛɛ amɛhã shimaatso lɛ ama shi shiŋŋ; amɛnyɛɛɛ abalaa lɛ amɛshi. No hewɔ lɛ, nyɛshwiea amɛnɔ, nyɛhaa amɛnii; nyɛjaa nyɛhãa bɔ ni obubuafoi tete aaana amɛgbɛfaŋnɔ. 24#Zak 12.8 Maŋbii lɛ ateŋ mɔ ko ekɛŋ akɛ, “Mihe miiye.” Akɛ mɛi ni yɔɔ shikpɔŋ lɛ nɔ lɛ ahe eshai aaafa amɛ.
Currently Selected:
Yesaia 33: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
