1 Maŋtsɛmɛi 9
9
Nyɔŋmɔ jie ehe kpo etsɔ̃ɔ Solomon ekoŋŋ
(2 Kronika 7.11-22)
1Be ni Solomon egbe Yehowa we lɛ kɛ maŋtsɛ shĩa lɛ mãa kɛ nibii fɛɛ ni Solomon taoɔ ni esumɔɔ akɛ efee lɛ fɛɛ naa lɛ, 2#1 Maŋ 3.5 Yehowa bajie ehe kpo etsɔ̃ɔ Solomon, nɔ ni ji shii enyɔ nɔ, tamɔ bɔ ni ejie ehe kpo etsɔ̃ɔ lɛ yɛ Gibeon lɛ. 3#1 Maŋ 8.29 Yehowa kɛɛ lɛ akɛ, “Minu osɔlemɔ kɛ ofai ni okpa yɛ mihiɛ lɛ. Mitsuu Sɔlemɔ we ni omã nɛɛ he, koni aja mi yɛ jɛi kɛya naanɔ. Mihiŋmɛi kɛ mitsui aaahi he daa. 4Shi bo lɛ, kɛji oooba ojeŋ jogbaŋŋ tamɔ bɔ ni otsɛ David fee yɛ tsuijurɔ kɛ jalɛ mli, ni oooye mlai kɛ mikpɔi kɛ mikitãi ni miwo bo lɛ anɔ pɛpɛɛpɛ lɛ, 5#2 Sam 7.12; 1 Maŋ 2.4 no lɛ maye shi ni miwo otsɛ David lɛ nɔ akɛ, ‘Bo oshwiei amli aaajɛ aye Israel nɔ maŋtsɛ daa’ lɛ. 6Shi kɛji bo loo oshwiei kpale kɛje misɛɛ, ni nyɛyeee mikitãi kɛ mikpɔi ni mikɛshwie nyɛhiɛ lɛ anɔ, shi nyɛaaya nyɛyasɔmɔ nyɔŋmɔi krokomɛi, ni nyɛja amɛ lɛ, 7#Deut 4.26; 8.19-20; Mat 23.38 no lɛ makpãtã Israel hiɛ kɛje shikpɔŋ ni miŋɔ hã amɛ lɛ nɔ. Makwa nɛkɛ Sɔlemɔ we nɛɛ ni mifee lɛ krɔŋkrɔŋ mihã mihe akɛ jɛi aaaja mi yɛ lɛ. Mɛi aaaye Israel he fɛo, ni eeetsɔ̃ nyaŋemɔnɔ yɛ maji krokomɛi ateŋ. 8#2 Maŋ 25.9; 2 Kron 36.19 Nɛkɛ Sɔlemɔ we nɛɛ baabutu kwraa, bɔ ni kɛji mɔ ko baho ni ena lɛ, ehe baajɔ̃ ehe, ni eeebo, ‘tsiaa!’ Mɛi aaabi akɛ, ‘Te eba tɛŋŋ ni Yehowa fee shikpɔŋ nɛɛ kɛ Sɔlemɔ we nɛɛ nɛkɛ?’ 9Ni aaahere nɔ akɛ, ‘Ejaakɛ amɛkwa Yehowa amɛNyɔŋmɔ lɛ, mɔ ni jie amɛtsɛmɛi lɛ kɛjɛ Ijipt shikpɔŋ lɛ nɔ lɛ, ni amɛnya nyɔŋmɔi krokomɛi ahe, ni amɛja amɛ, ni amɛsɔmɔ amɛ. Enɛ hewɔ Yehowa hã nɛkɛ efɔŋ nɛɛ fɛɛ eba amɛnɔ lɛ.’ ”
Solomon kɛ Hiram Kpãŋmɔ
(2 Kronika 8.1-2)
10Solomon ye afii nyɔŋmai enyɔ ekɛmamɔ Yehowa we lɛ kɛ maŋtsɛ we lɛ. 11Akɛni Tiro maŋtsɛ Hiram lɛ bahã Solomon tsenedru tsei kɛ sɛsɛo kɛ shika, bɔ fɛɛ bɔ ni etaoɔ, hewɔ lɛ Maŋtsɛ Solomon hu hã Hiram maji wuji nyɔŋmai enyɔ yɛ Galilea shikpɔŋ lɛ nɔ. 12Shi be ni Hiram jɛ Tiro ebakwɛ maji ni Solomon kɛhã lɛ lɛ, eyasumɔɔɔ maji lɛ. 13Hewɔ lɛ ekɛɛ Maŋtsɛ Solomon akɛ, “Minyɛmi, mɛɛ maji okɛhã mi nɛɛ?” No hewɔ lɛ, Hiram tsɛ maji lɛ “Kabul”#9.13 Kabul: eshishi ji, nɔ ko ni he bɛ sɛɛnamɔ. kɛbashi ŋmɛnɛ. 14Shi Hiram emaje Maŋtsɛ Solomon shika ŋmiiŋmi ni tsiimɔ ji talentai oha kɛ nyɔŋmai enyɔ.
Nibii krokomɛi ni Solomon fee
(2 Kronika 8.3-18)
15Bɔ ni Maŋtsɛ Solomon nyɛ maŋbii lɛ anɔ kɛmã Yehowa we lɛ kɛ maŋtsɛ we lɛ, nakai nɔŋŋ ekɛ nɔnyɛɛ saa shikpɔŋ ni kã Yerusalɛm bokãgbɛ lɛ hiɛ, ni etswa jɛi gbogbo lɛ kɛ Hazor kɛ Megido kɛ Gezer maji wuji lɛ hu. 16#Yos 16.10; 1 Maŋ 5.1 Ijipt maŋtsɛ fã ta eyatua Gezer, ni eŋɔ maŋ lɛ, ni eshã maŋ lɛ, ni egbe Kanaanbii ni yɔɔ maŋ lɛ mli lɛ, ni eŋɔ maŋ lɛ ehã ebiyoo ni ji Solomon ŋa lɛ akɛ gbãlãyaa nikee. 17No hewɔ lɛ, Solomon saa maŋ lɛ emã. No sɛɛ lɛ, ekɛ nɔnyɛɛ mã Gezer kɛ Bet-Horon ni yɔɔ Jɔɔŋgbɛ lɛ, 18kɛ Baalat kɛ Tamar ni yɔɔ Yuda ŋa lɛ nɔ lɛ. 19#1 Maŋ 10.26 Maŋtsɛ Solomon saa emãmɔ maji ni akɛ enibii toɔ amɛmli lɛ fɛɛ: maji ni atoɔ etayaa shwiilii kɛ maji ni ekpɔŋɔnɔtalɔi yɔɔ amɛmli, kɛ nibii krokomɛi fɛɛ ni eshwe akɛ emamɔ yɛ Yerusalɛm kɛ Lebanon kɛ hei ni eyeɔ nɔ lɛ fɛɛ lɛ.
20Amorbii kɛ Hitbii kɛ Perizbii kɛ Hivbii kɛ Yebusbii lɛ ateiaŋ mɛi fɛɛ ni shwɛ ni jeee Israelbii ji amɛ lɛ, 21amɛ amɛshwiei ni shwɛ yɛ shikpɔŋ lɛ nɔ ni Israelbii lɛ kpãtãaa amɛhiɛ lɛ ji mɛi ni Solomon nyɛ amɛnɔ kɛtsu nii, ni nakai nyɔji amɛ ji kɛbashi ŋmɛnɛ. 22#Yos 16.10 Shi Israelbii lɛ Solomon eŋɔɔɔ amɛteŋ mɔ ko mɔ ko efeee enyɔŋ, ejaakɛ amɛ amɛ ji esraafoi kɛ elumɛi kɛ esafoiatsɛmɛi kɛ eshwiiliiatsɛmɛi kɛ ekpɔŋɔianɔtralɔi.
23Nitsulɔi lɛ anɔ onukpai ni kwɛɔ Solomon nitsulɔi lɛ anɔ lɛ ayibɔ ji mɛi ohai enumɔ kɛ nyɔŋmai enumɔ.
24Shi Ijipt maŋtsɛbi yoo lɛ shi David maŋ lɛ mli kɛtee eshĩa ni Solomon emã ehã lɛ lɛ mli. Kɛkɛ ni Solomon saa shikpɔŋ#9.24 saa shikpɔŋ: Heb. Milo ni kã Yerusalɛm bokãgbɛ lɛ hiɛ.
25 #
Ɛks 23.17; 34.23; Deut 16.16 Afi kome mli lɛ, Solomon shãa afɔlei srɔtoi etɛ̃: eshãa shãa afɔlei kɛ shidaa afɔlei yɛ afɔleshãa latɛ ni emã ehã Yehowa lɛ nɔ; ni eshãa tsofakɛŋma yɛ nɔ ni ma Yehowa hiɛ lɛ nɔ. Belɛ egbe Sɔlemɔ we lɛ mãa lɛ naa.
26Maŋtsɛ Solomon kpɛ lɛji babaoo yɛ Ezion-Geber ni bɛŋkɛ Elat yɛ Ŋshɔ Tsuru lɛ naa yɛ Edom shikpɔŋ lɛ nɔ lɛ. 27#1 Maŋ 10.11 Maŋtsɛ Hiram famɔ emlakui ni he esa kɛ ŋshɔ hiɛ nitsumɔ, ni amɛkɛ Maŋtsɛ Solomon tsuji lɛ yatsu nii yɛ lɛji lɛ amli. 28#Jɛn 10.29 Amɛtee Ofir shikpɔŋ lɛ nɔ, ni amɛyaŋɔ shika ni tsiimɔ ji talentai ohai ejwɛ kɛ nyɔŋmai enyɔ ni amɛkɛbahã Maŋtsɛ Solomon.
Currently Selected:
1 Maŋtsɛmɛi 9: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
