1 Maŋtsɛmɛi 10
10
Maŋnyɛ Sheba yasara Maŋtsɛ Solomon
(2 Kronika 9.1-12)
1Be ni Sheba maŋnyɛ lɛ nu bɔ ni Maŋtsɛ Solomon gbɛi ehehee yɛ Yehowa gbɛi lɛ hewɔ lɛ, efã gbɛ kɛtee Yerusalɛm, koni eyaka lɛ kɛ saji ni mli wa naakpa. 2Maŋnyɛ Sheba kɛ asafo yuu diɛŋtsɛ ba Yerusalɛm lɛ. Ekɛ yoomai ni tere tsofaikɛŋmai kɛ shika babaoo diɛŋtsɛ kɛ tɛi ni jara wa ba. Be ni ebashɛ Maŋtsɛ Solomon hiɛ lɛ, ebibii Maŋtsɛ lɛ saji babaoo ni ba eyitsoŋ. 3Maŋtsɛ lɛ hã lɛ saji lɛ fɛɛ hetoo, ni eshwɛɛɛ nibimɔ ko ni enyɛɛɛ lɛ hetoo ehã. 4Be ni Sheba maŋnyɛ lɛ na Maŋtsɛ Solomon nilee kɛ shĩa ni ema lɛ 5kɛ ekpɔlɔ̃ nɔ niyenii kɛ elumɛi ashitaramɔ kɛ bɔ ni etsuji ni wo atadei fɛɛfɛji sɔmɔɔ yɛ niyeniiashi, kɛ shãa afɔlei ni eshãa yɛ Yehowa we lɛ, ehe jɔ̃ ehe naakpa. 6Kɛkɛ ni Sheba maŋnyɛ lɛ kɛɛ Maŋtsɛ Solomon akɛ, “Ohe saji kɛ onilee ni minu he yɛ mishikpɔŋ lɛ nɔ lɛ fɛɛ lɛ anɔkwale ni. 7Kulɛ miheee miyeee kɛyashi miba, ni mibana kɛ mi diɛŋtsɛ mihiŋmɛii nɛɛ. Ni naa, jeee emli fã tete agba mi lɛ; onilee kɛ oshweremɔ lɛ fa aahu fe yijiemɔ ni minu lɛ tete. 8#Luk 10.23 Ajɔɔ oŋamɛi kɛ otsuji nɛɛ ni sɔmɔɔ bo ni amɛboɔ onilee wiemɔi lɛ atoi daa lɛ. 9#1 Maŋ 5.7 Yijiemɔ ahã Yehowa, oNyɔŋmɔ lɛ, mɔ ni ena ohe tsuijurɔ, ni ekɛ bo eta Israel maŋtsɛ sɛ̃i lɛ nɔ lɛ. Yehowa sumɔɔ Israel kɛmiiya naanɔ. No hewɔ ni ewo bo maŋtsɛ lɛ koni okojo ni oye jalɛ sane.” 10#Mat 12.42; Luk 11.31 Agbɛnɛ Sheba Maŋnyɛ lɛ hã Maŋtsɛ Solomon shika ŋmiiŋmi ni tsiimɔ ji talentai oha kɛ nyɔŋmai enyɔ, kɛ tsofaikɛŋma pii diɛŋtsɛ kɛ tɛi ni jara wa. Kɛjɛ nomɛi asɛɛ lɛ akɛ tsofaikɛŋma lɛ eko bako dɔŋŋ ni fa babaoo tamɔ nɔ ni Sheba Maŋnyɛ lɛ kɛbahã Maŋtsɛ Solomon lɛ.
11 #
1 Maŋ 9.27, 28 Asaŋ Hiram lɛji babaoo lɛ hu ni kɛ shika jɛɔ Ofir baa lɛ kɛ tsei babaoo diɛŋtsɛ kɛ tɛi ni jara wa jɛ Ofir ba. 12Maŋtsɛ Solomon kɛ tsei lɛ folɔ afabaŋi ewo Yehowa we lɛ kɛ maŋtsɛ we lɛ he. Eŋɔ eko ekɛfee saŋkui kɛ bɛji ehã lalatsɛmɛi lɛ. Akɛ almugtsei nɛɛ eko bako Israel shikpɔŋ lɛ nɔ dɔŋŋ ni hi, ni anako eko dɔŋŋ hu tamɔ nɔ ni akɛba lɛ kɛbashi ŋmɛnɛ.
13Maŋtsɛ Solomon hã Sheba Maŋnyɛ lɛ nii ni etaoɔ kɛ nii ni ebi lɛ fɛɛ, dani esoro nii ni Maŋtsɛ Solomon hã Maŋnyɛ Sheba yɛ tsuijurɔ naa. Kɛkɛ ni Maŋnyɛ Sheba kɛ etsuji lɛ ku amɛsɛɛ kɛtee lɛ diɛŋtsɛ eshikpɔŋ lɛ nɔ.
Nii ni Maŋtsɛ Solomon yɔɔ
(2 Kronika 9.13-28)
14Agbɛnɛ afi kome mli lɛ shika ni akɛbahã Maŋtsɛ Solomon lɛ tsiimɔ ji talentai ohai ekpaa kɛ nyɔŋmai ekpaa kɛ ekpaa. 15Esoro shika hu ni jɛɔ jarayelɔi lɛ kɛ guɔyelɔi lɛ kɛ Arabia maŋtsɛmɛi lɛ kɛ amraloi ni yɔɔ shikpɔŋ lɛ nɔ lɛ adɛŋ akɛ too ni amɛwoɔ lɛ.
16 #
1 Maŋ 14.26
Maŋtsɛ Solomon fee tsɛŋi wuji ohai enyɔ, ni ehã akɛ shika ŋmiiŋmi ni atswia ni tsiimɔ ji shekeli ohai ekpaa ha tsɛŋ kome he. 17Efee tsɛŋi bibii ohai etɛ̃, ni akɛ shika ni atswia ni eko fɛɛ eko tsiimɔ ji kiloi enyɔ ha tsɛŋi lɛ eko fɛɛ eko he. Ni maŋtsɛ lɛ hã aŋɔ fɛɛ ayato Lebanon#10.17 Lebanon Koo: 1 Maŋtsɛmɛi 7.2-3 Koo Asa lɛ nɔ.
18Maŋtsɛ lɛ kɛ shuɔ wu fee maŋtsɛ sɛ̃i kpeteŋkple ko, ni ekɛ shika ŋmiiŋmi ha he. 19Akwɔɔ atrakpoi ekpaa kɛshɛɔ maŋtsɛ sɛ̃i lɛ hiɛ. Maŋtsɛ sɛ̃i lɛ kpasamɔhe lɛ yiteŋ lɛ, afee lɛ kutruku; ni sɛ̃i lɛ shitamɔhe lɛ, he ko yɛ sɛ̃i lɛ biɛ kɛ ebiɛ ni akɛ niji shwieɔ nɔ; ni jatai enyɔ damɔ he ni akɛ niji shwieɔ lɛ masɛi. 20Ni jatai nyɔŋma kɛ enyɔ damɔ atrakpoi ekpaa lɛ anɔ yɛ biɛ kɛ biɛ. Maŋtsɛ sɛ̃i ko kwraa bɛ maŋtsɛyelihe ko ni tamɔ no.
21Maŋtsɛ Solomon kpuji fɛɛ ni ekɛnuɔ nii lɛ, shika sɔŋŋ akɛfee; ni nibii fɛɛ ni yɔɔ Lebanon Koo Asa lɛ nɔ lɛ, shika ŋmiiŋmi ni; jwiɛtɛi bɛ mli ejaakɛ abuuu no fɛifɛi yɛ Solomon bei amli. 22Ejaakɛ maŋtsɛ lɛ yɛ Tarshish lɛji babaoo yɛ ŋshɔ hiɛ fata Hiram lɛji lɛ ahe. Ni daa afii etɛ̃ lɛ, elɛji lɛ baa shi kome amɛkɛ shika kɛ jwiɛtɛi kɛ shuɔ wu kɛ ofoi kɛ aduji kɛ mɛleoi#10.22 mɛleo: loofɔlɔ ko gbɛi baa.
23No hewɔ lɛ, Maŋtsɛ Solomon tsɔ̃ kpanaa yɛ ninamɔ kɛ nilee mli fe maŋtsɛmɛi fɛɛ yɛ shikpɔŋ lɛ nɔ; 24ni jeŋ fɛɛ tao akɛ amɛbana lɛ koni amɛbo enilee ni Nyɔŋmɔ kɛhã lɛ lɛ toi. 25Mɔ fɛɛ mɔ ni ba lɛ hiɛ keenii ko kɛba; jwiɛtɛi nibii kɛ shika nibii, atadei wuyawuyaa kɛ tawuu nii kɛ tsofakɛŋmai kɛ okpɔŋɔi kɛ tejiokpɔŋɔi. Daa afi akɛ nibii nɛɛ baa.
26 #
1 Maŋ 4.26
Maŋtsɛ Solomon bua tayaa shwiilii kɛ okpɔŋɔnɔtalɔi anaa, ni ena tayaa shwiilii akpe kɛ ohai ejwɛ kɛ okpɔŋɔnɔtalɔi akpeinyɔŋma kɛ enyɔ. Eŋɔ amɛteiaŋ mɛi komɛi eto shwiilii amaji lɛ amli, ni eŋɔ mɛi komɛi eto ehe yɛ Yerusalɛm. 27Maŋtsɛ Solomon hã jwiɛtɛi bu aahu bɔ ni jwiɛtɛi tsɔ̃ tamɔ tɛ yɛ Yerusalɛm; nakai nɔŋŋ tsenedru tsei hu fa babaoo tamɔ sikamore tsei yɛ Shefela jɔɔ lɛ he. 28#Deut 17.16 Maŋtsɛ lɛ hãa ashɛɔ okpɔŋɔi kɛjɛɔ Ijipt#10.28 Musri: Heb. Ijipt. kɛ Kilikia;#10.28 Musri kɛ Kilikia: Blema maji komɛi yɛ Turkey ni alɛɔ okpɔŋɔi yɛ jɛi. maŋtsɛ lɛ jarayelɔi lɛ yaheɔ lɛ ofoo. 29Jarayelɔi lɛ yaheɔ tayaa shwiilii ni ekome jara ji jwiɛtɛi shekeli ohai ekpaa; ni aheɔ okpɔŋɔ kome hu jwiɛtɛi shekeli oha kɛ nyɔŋmai enumɔ kɛjɛɔ Ijipt.
No hewɔ lɛ, maŋtsɛ lɛ jarayelɔi nɛɛ anine nɔ nɔŋŋ tsɔ̃ɔ ni Hitbii amaŋtsɛmɛi kɛ Siriabii amaŋtsɛmɛi lɛ naa tayaa shwiilii kɛ okpɔŋɔi lɛ ekomɛi amɛheɔ.
Currently Selected:
1 Maŋtsɛmɛi 10: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
