1 Maŋtsɛmɛi 8
8
Awo Kpãŋmɔ Adeka lɛ kɛba Sɔlemɔtsu lɛ mli
(2 Kronika 5.2—6.2)
1 #
2 Sam 6.12; 1 Kron 15.25-29 Kɛkɛ ni Solomon bua Israel akutsei kɛ wekui onukpai lɛ kɛ Israelbii lɛ alumɛi lɛ anaa kɛkpe yɛ Yerusalɛm yɛ eŋɔɔ, koni ayawo Yehowa Kpãŋmɔ Adeka lɛ kɛjɛ Zion ni ji David maŋ lɛ mli kɛba Yehowa Sɔlemɔtsu lɛ mli. 2#Lev 23.24 Israelbii fɛɛ bua amɛhe naa kɛba Maŋtsɛ Solomon ŋɔɔ. Afee enɛ be ni ayeɔ Asesei Agbijurɔ yɛ nyɔŋ ni ji kpawo lɛ ni ji Etanim nyɔŋ lɛ nɔ. 3Be ni Israel onukpai lɛ bua amɛhe naa lɛ, Osɔfoi lɛ bawo Kpãŋmɔ Adeka lɛ. 4Osɔfoi lɛ kɛ Levibii lɛ hole Kpee Buu lɛ mli nibii krɔŋkrɔŋi lɛ fɛɛ kɛba Sɔlemɔtsu lɛ mli. 5#2 Sam 6.15 Kɛkɛ ni Maŋtsɛ Solomon kɛ Israel asafo muu lɛ fɛɛ ni ebuabua amɛhe naa lɛ ho damɔ Kpãŋmɔ Adeka lɛ hiɛ, ni amɛgbegbee toi kɛ tsinai babaoo diɛŋtsɛ ni anyɛɛɛ naa abu aloo akane amɛyibɔ tete, ni akɛshã afɔle. 6Ni Osɔfoi lɛ wo Yehowa Kpãŋmɔ Adeka lɛ kɛtee, ni amɛkɛyama egbɛhe yɛ He Krɔŋkrɔŋ Fe Fɛɛ lɛ mli yɛ kerubim lɛ afiji ashishi. 7Ni amɛfiji ni amɛgbɛ mli lɛ ha Kpãŋmɔ Adeka lɛ kɛ ehe tsei lɛ ni akɛwoɔ adeka lɛ anɔ. 8#Ɛks 25.13-18 Tsei lɛ kɛlɛ bɔ ni anaa amɛnaabui kɛji mɔ ko damɔ Kpee Buu lɛ hiɛ lɛ. Shi anaaa yɛ kpo lɛ nɔ gbɛ. Tsei nɛɛ yɛ jɛi kɛbashi ŋmɛnɛ gbi nɛɛ. 9#Deut 10.5; Heb 9.4 Nɔ ko nɔ ko bɛ Adeka lɛ mli akɛ ja tɛi tɛtɛrɛbii enyɔ lɛ ni Mose ŋɔ to mli yɛ Sinai Gɔŋ lɛ nɔ, he ni Yehowa kɛ Israelbii lɛ kpãŋ yɛ, be ni amɛjɛ Ijipt shikpɔŋ lɛ nɔ amɛbaa lɛ.
10Ni eba mli akɛ be ni osɔfoi lɛ je He Krɔŋkrɔŋ lɛ mli lɛ, atatu bayi Yehowa We lɛ mli. 11#Ɛks 40.34-35 Ebayi Yehowa We lɛ mli bɔ ni osɔfoi lɛ nyɛɛɛ shi adamɔ tete ni amɛsɔmɔ, ejaakɛ Yehowa anunyam lɛ eyi Yehowa We lɛ obɔ̃ tɔ. 12#Deut 4.11; Ɛks 20.21; Lal 18.11; 97.2 Kɛkɛ ni Solomon sɔle ekɛɛ, “Nuŋtsɔ Nyɔŋmɔ, okɛɛ akɛ, ‘Duŋ kpii mli mahi.’ 13Agbɛnɛ mimã tsu mihã bo ni ohi mli, he ni ohi kɛya naanɔ!”
Solomon kɛ maŋ lɛ wie
14Israel asafo muu lɛ fɛɛ damɔ shi, kɛkɛ ni Maŋtsɛ Solomon tsɔ̃ ehiɛ ehã amɛ, ni ejɔɔ amɛ fɛɛ. 15Ekɛɛ, “Ajɔɔ Yehowa, Israel Nyɔŋmɔ lɛ, mɔ ni wo mitsɛ David shi, ni ekɛ ehewalɛ lɛ ehã eshiwoo lɛ eba mli. 16#2 Sam 7.4-11; 1 Kron 17.3-10 Nɔ ni ekɛɛ akɛ, ‘Kɛjɛ gbi nɔ ni miyajie mimaŋ Israel kɛjɛ Ijipt kɛba nɛɛ, mihalako maŋ ko maŋ ko yɛ Israel akutsei lɛ fɛɛ ateŋ ni emã tsu koni aja mi yɛ mli. Shi mikɔ bo David pɛ koni oye mimaŋ Israel nɔ.’ 17#2 Sam 7.1-3; 1 Kron 17.1-2 Mitsɛ David to eyiŋ akɛ eeema tsu ehã Yehowa, Israel Nyɔŋmɔ lɛ, yɛ jɛi. 18Shi Yehowa kɛ mitsɛ David wie akɛ, ‘Ehi akɛ oto oyiŋ akɛ obaama shĩa ohã mi, ni ofee jogbaŋŋ akɛ oto oyiŋ nakai. 19#2 Sam 7.12-13; 1 Kron 17.11-12 Shi kɛ̃lɛ jeee bo ooomã tsu lɛ; shi moŋ omusuŋ bi lɛ, lɛ ji mɔ ni eeemã tsu ehã mi koni aja mi yɛ jɛi.’
20“Ni amrɔ nɛɛ, Yehowa ehã ewiemɔ lɛ eba mli, ejaakɛ miye mitsɛ najiaŋ, ni mibata Israel maŋtsɛ sɛ̃i lɛ nɔ, taakɛ bɔ ni Yehowa wo shi lɛ. Ni mimã tsu lɛ mihã Yehowa, Israel Nyɔŋmɔ lɛ, koni aja lɛ yɛ jɛi; 21ni mito he ko hu yɛ Sɔlemɔtsu lɛ mli mihã Kpãŋmɔ Adeka lɛ, nɔ mli ni tɛi tɛtɛrɛbii enyɔ lɛ, tɛi ni aŋmã kpãŋmɔ ni Yehowa kɛ wɔtsɛmɛi lɛ kpãŋ, be ni amɛjɛ Ijipt shikpɔŋ lɛ nɔ amɛbaa, yɛ nɔ lɛ”.
Maŋtsɛ Solomon Sɔlemɔ
(2 Kronika 6.12-42)
22Solomon ho edamɔ Yehowa afɔleshãa latɛ lɛ hiɛ, yɛ Israel asafo muu lɛ fɛɛ hiɛ, ni egbɛ enijiaŋ kɛtee ŋwɛi, 23ni ekɛɛ, “Yehowa, Israel Nyɔŋmɔ! Nyɔŋmɔ ko bɛ ŋwɛi yɛ yiteŋ gbɛ loo shikpɔŋ lɛ nɔ yɛ shishigbɛ ni tamɔ bo, ni otoɔ kpãŋmɔ kɛ mɔbɔnalɛ ohãa otsuji ni boɔ bo toi kɛ amɛtsui fɛɛ lɛ. 24Oye shi ni owo mitsɛ, David, otsulɔ lɛ nɔ. Okɛ onaabu wie, ni oto he nine pɛpɛɛpɛ, ni ohã eba mli, taakɛ eyɔɔ ŋmɛnɛ nɛɛ. 25#1 Maŋ 2.4 No hewɔ lɛ, agbɛnɛ, Yehowa, Israel Nyɔŋmɔ, miikpa bo fai koni oye oshi hu ni owo mitsɛ David, otsulɔ, lɛ nɔ. Nɔ ni owie akɛ, ‘Nuu ni aaata Israel Maŋtsɛ Sɛ̃i lɛ nɔ lɛ ebɔŋ bo yɛ mihiɛ, kɛji obii lɛ aaale amɛhenɔkwɛmɔ, ni amɛba amɛjeŋ yɛ mihiɛ, taakɛ oba ojeŋ yɛ mihiɛ lɛ.’ 26No hewɔ lɛ, agbɛnɛ, Israel Nyɔŋmɔ, miikpa bo fai, hã shi ni owo mitsɛ David, otsulɔ lɛ, fɛɛ aba mli.
27 #
2 Kron 2.6; Yes 66.1; Bɔf 7.49; 17.24 “Aso bo Nyɔŋmɔ, ooobahi shikpɔŋ nɛɛ nɔ lo! Naa, ŋwɛi kɛ ŋwɛii amli ŋwɛi nyɛɛɛ bo ato, aahu ni Sɔlemɔtsu bibioo nɛɛ ni mimã nɛɛ! 28Shi kɛ̃lɛ hã otsulɔ sɔlemɔ kɛ faikpamɔ lɛ asa ohiɛ, Yehowa, miNyɔŋmɔ, koni obo bolɔmɔ ni mi, otsulɔ, mibolɔɔ kɛ sɔlemɔ ni misɔleɔ yɛ ohiɛ ŋmɛnɛ gbi nɛɛ toi. 29#Deut 12.5, 11; Ɛks 20.24; Zak 12.4 Ofainɛ, ohiŋmɛi ahi nɛkɛ tsu nɛɛ he nyɔɔŋ kɛ shwane, he ni okɛɛ yɛ he akɛ, ‘Migbɛi aaahi jɛi lɛ’, koni obo mi, otsulɔ, mifai ni mikpaa bo yɛ biɛ nɛɛ toi. 30Ni obo mi, otsulɔ, kɛ omaŋ Israel fai ni amɛaakpa bo yɛ biɛ lɛ toi, ni onu yɛ ŋwɛi ni ji oshihilɛhe lɛ, ni kɛji onu lɛ oŋɔ fa!
31“Kɛji mɔ ko fee enaanyo esha, ni ahã lɛ kitã ni ekã yɛ ofɔleshãa latɛ nɛɛ hiɛ yɛ shĩa nɛɛ lɛ, 32no lɛ bo toi yɛ ŋwɛi koni okojo otsuji lɛ; buu atɛŋ, mɔ ni yeɔ fɔ lɛ buu lɛ fɔ, ni enii abua eyiteŋ; ni mɔ ni yeɔ bem, lɛ buu lɛ bem ni eŋɔ ehe eye tswaa. 33Kɛji omaŋ Israel henyɛlɔi ye amɛnɔ yɛ esha ko ni amɛfee amɛshi bo hewɔ, ni amɛku amɛsɛɛ kɛba oŋɔɔ ekoŋŋ, ni amɛbakpa eshaifaa he fai, yɛ Sɔlemɔtsu nɛɛ mli lɛ, 34no lɛ bo toi yɛ ŋwɛi, ni oŋɔ omaŋ Israel he esha lɛ ofa amɛ, ni oŋɔ amɛ kɛba shikpɔŋ lɛ ni oŋɔ hã amɛtsɛmɛi lɛ nɔ ekoŋŋ.
35 #
1 Maŋ 17.1
“Kɛji omaŋ Israelbii fee esha, ni no hewɔ otsi nunɛmɔ naa, ni omaŋbii lɛ basɔle yɛ biɛ, ni amɛbo amɛtsɛ bo, ni amɛshwa amɛhe yɛ piŋmɔ ni opiŋ amɛ hewɔ lɛ, 36no lɛ bo toi koni oŋɔ otsuji kɛ omaŋ lɛ he esha lɛ ofa amɛ, ni otsɔ̃ɔ amɛ nɔ kpakpa feemɔ, ní ohã nu anɛ ashwie shikpɔŋ lɛ ni oŋɔ hã omaŋ lɛ nɔ.
37“Kɛji hɔmɔ ba shikpɔŋ lɛ nɔ, kɛji gbele hela ba shikpɔŋ lɛ nɔ, kɛji aharabata kɔɔyɔɔ ni mli edɔ la ŋala nii ni adu yɛ shikpɔŋ lɛ nɔ, ni amɛsɔle lɛ, bo toi. Kɛji baalabii baye nii lɛ jio, no hu bo amɛ toi. Kɛji omaŋbii ahenyɛlɔi basa amɛyi wo amɛmaji amli yɛ amɛshikpɔŋ nɔ, loo gbele hela ko ba lɛ, 38no lɛ bo amɛsɔlemɔ toi. Sɔlemɔ fɛɛ sɔlemɔ ni aaasɔle, fai fɛɛ fai ni aaakpa bo yɛ shĩa nɛɛ, mɔ kome mɔ kome ni jio, mɛi kutuu ni jio, aloo omaŋ Israel fɛɛ ni fee esha jio, kɛ mɛi ni le nɔ fɛɛ nɔ ni kã amɛtsui nɔ, ni amɛbagbɛ amɛnijiaŋ amɛtsɔ̃ɔ nɛkɛ shĩa nɛɛ lɛ, 39#Lal 7.9; 139.1, 2 no lɛ bo amɛ toi yɛ ŋwɛi ni ji oshihilɛhe lɛ koni oŋɔ fa. Ni oye obua mɔ fɛɛ mɔ yɛ enifeemɔnii anaa, ejaakɛ bo okome too pɛ ole gbɔmɛi adesai atsuiiaŋ. Okɛ mɔ fɛɛ mɔ aye bɔ pɛ ni sa lɛ, 40bɔ ni afee ni amɛshe bo gbeyei, gbii abɔ fɛɛ ni amɛyɔɔ shikpɔŋ lɛ ni oŋɔ hã wɔtsɛmɛi lɛ nɔ lɛ.
41 #
Num 15.14-16
“Ni gbɔ tete ni jɛɛɛ omaŋ Israelbii ateŋ, shi moŋ ogbɛi lɛ hewɔ lɛ eeejɛ maŋsɛɛ shɔŋŋ eba, 42ejaakɛ maŋsɛɛbii aaanu ogbɛi kpeteŋkple lɛ kɛ nii wuji ni ofee he, ni eeebashã afɔle yɛ nɛkɛ shĩa nɛɛŋ lɛ, 43no lɛ bo lɛ toi yɛ ŋwɛi ni ji oshihilɛhe lɛ, ni ofee nɔ fɛɛ nɔ ni gbɔ lɛ boɔ tsɛɔ bo yɛ he lɛ ohã lɛ. Enɛ baahã shikpɔŋ lɛ nɔ majimaji fɛɛ ale ogbɛi lɛ koni amɛja bo tamɔ omaŋ Israelbii feɔ lɛ. Ni amɛsaa amɛaana amɛle akɛ ogbɛi aŋɔ wo nɛkɛ Sɔlemɔtsu ni mimã kɛhã ojamɔ nɛɛ. 44Kɛji ohã omaŋ lɛ fã ta koni amɛkɛ amɛhenyɛlɔi ayawu, ni amɛsɔle amɛkpa bo fai yɛ he fɛɛ he ni amɛyɔɔ, shi amɛhiɛ miikwɛ maŋ nɛɛ ni bo diɛŋtsɛ ohala kɛ Sɔlemɔtsu nɛɛ ni mimã mihã bo nɛɛ lɛ, 45no lɛ bo amɛsɔlemɔ kɛ amɛfaikpamɔ lɛ toi yɛ oŋwɛi ni ohã amɛye kunim.
46“Kɛji amɛfee esha amɛshi bo, ejaakɛ mɔ ko mɔ ko bɛ ni efeee esha, ni omli fu amɛ, ni ohã amɛhenyɛlɔi ye amɛnɔ, ni amɛŋɔ amɛ nom kɛtee henyɛlɔi lɛ ashikpɔŋ nɔ, shɔŋŋ ni jio, kpaakpa ni jio, 47ni amɛshwa amɛhe yɛ shikpɔŋ he ni amɛyɔɔ lɛ nɔ lɛ, ni amɛjaje amɛtɔ̃mɔi amɛtsɔ̃ɔ bo, ni amɛkpa bo fai lɛ, Nuŋtsɔ Nyɔŋmɔ, bo amɛsɔlemɔ lɛ toi. 48Kɛji amɛshwa amɛhe anɔkwale mli yɛ nakai nomŋɔɔ shikpɔŋ lɛ nɔ, ni amɛsɔle be ni amɛmiikwɛ shikpɔŋ ni akɛhã amɛblematsɛmɛi lɛ kɛ maŋ nɛɛ ni bo diɛŋtsɛ ohala kɛ Sɔlemɔtsu nɛɛ ni mimã mihã bo nɛɛ lɛ, 49no lɛ bo amɛsɔlemɔ kɛ amɛfaikpamɔ lɛ toi yɛ oŋwɛi ni ji oshihilɛhe lɛ, ni oye obua amɛ. 50Ni ŋɔɔ ofa omaŋ ni efee esha lɛ eshi bo kɛ efɔŋ lɛ fɛɛ ni amɛfee lɛ. Hã amɛnomŋɔlɔi lɛ amusuŋ atsɔ̃ amɛ yɛ amɛhe ni amɛna amɛ mɔbɔ. 51Ejaakɛ omaŋ kɛ onii ni ojie amɛ kɛjɛ Ijipt shikpɔŋ lɛ nɔ, kɛjɛ dade flɔnɔɔ mli, ji amɛ. 52Wo ohiɛ nɔ okwɛ otsuji kɛ omaŋ Israelbii, ni obo amɛ toi be fɛɛ be ni amɛaabolɔ amɛtsɛ bo lɛ. 53Ejaakɛ bo diɛŋtsɛ. Nuŋtsɔ Nyɔŋmɔ, oŋɔ amɛ ohã ohe, ni okɛ amɛ fee omaŋ yɛ majimaji lɛ fɛɛ ateŋ, taakɛ owo shi kɛtsɔ̃ Mose nɔ, be ni ojie wɔtsɛmɛi lɛ kɛjɛ Ijipt lɛ.”
Naagbee sɔlemɔ
54Ni eba mli akɛ be ni Maŋtsɛ Solomon egbe sɔlemɔ kɛ fai ni ekpa Nuŋtsɔ Nyɔŋmɔ lɛ fɛɛ naa lɛ, ete shi kɛjɛ afɔleshãa latɛ lɛ hiɛ, he ni ekũla ni egbɛ enijiaŋ kɛtee ŋwɛi yɛ lɛ. 55#2 Sam 6.18 Eho edamɔ shi, ni eba Nyɔŋmɔ dɛŋ jɔɔmɔ kɛ gbee ni wa ehã Israel asafo muu lɛ fɛɛ ekɛɛ, 56#Num 12.10; Yos 21.44-45 “Ajie Yehowa, mɔ ni ehã emaŋ Israel toiŋjɔlɛ taakɛ bɔ ni ewo shi lɛ pɛpɛɛpɛ. Eshiwoi kpakpai fɛɛ ni etsɔ̃ etsulɔ Mose nɔ ewo lɛ, emli wiemɔ lɛ ekome folo nɛkɛ efeko yaka. 57Yehowa, wɔNyɔŋmɔ lɛ, kɛ wɔ ahi shi, taakɛ bɔ ni ekɛ wɔblematsɛmɛi lɛ hi shi lɛ. Ekashi wɔ, ni esaa ekakwa wɔ hu. 58Ehã ni wɔbo lɛ toi kɛ wɔtsui fɛɛ, koni wɔhi shi bɔ ni etaoɔ. Wɔye ekitãi kɛ emlai ni ewo wɔtsɛmɛi lɛ fɛɛ anɔ. 59Ni Yehowa, wɔNyɔŋmɔ lɛ, hiɛ ahi misɔlemɔ kɛ faikpamɔi nɛɛ anɔ, shwane kɛ nyɔɔŋ, koni eye ebua mi, etsulɔ, kɛ emaŋ Israel be fɛɛ be ni nɔ ko aaahia wɔ lɛ. 60Enɛ baahã shikpɔŋ lɛ nɔ majimaji fɛɛ ana ale akɛ Yehowa pɛ ji Nyɔŋmɔ, nyɔŋmɔ ko nyɔŋmɔ ko bɛ he ko dɔŋŋ. 61Nyɛ Yehowa webii, nyɛyea Nuŋtsɔ Nyɔŋmɔ lɛ anɔkwa, nyɛyea ekpɔi kɛ ekitãi lɛ anɔ tamɔ bɔ ni nyɛfeɔ ŋmɛnɛ nɛɛ.”
Sɔlemɔtsu lɛ nɔjɔɔmɔ
(2 Kronika 7.4-10)
62-63Kɛkɛ ni Maŋtsɛ Solomon kɛ Israel maŋ muu lɛ fɛɛ shã afɔle amɛhã Yehowa: tsinai akpei nyɔŋmai enyɔ kɛ enyɔ kɛ toi akpei oha kɛ nyɔŋmai enyɔ, ni amɛkɛgbele Sɔlemɔtsu lɛ naa. 64Nakai gbi lɛ nɔ nɔŋŋ lɛ maŋtsɛ jɔɔ kpo lɛ ni yɔɔ Sɔlemɔtsu lɛ hiɛ lɛ nɔ efee lɛ krɔŋkrɔŋ, ejaakɛ jɛi eshã shãa afɔlei kɛ niyenii afɔlei kɛ kooloo muu afɔlei lɛ fɛɛ afɔi lɛ yɛ. Efee nakai ejaakɛ akɔɔble afɔleshãa latɛ ni mã Yehowa hiɛ lɛ edaaa, bɔ ni shãa afɔlei lɛ kɛ niyenii afɔlei lɛ kɛ shidaa afɔlei lɛ ahe fɔi lɛ aaaho nɔ. 65Solomon kɛ Israel maŋ muu fɛɛ ye Asesei Agbijurɔ lɛ gbii kpawo. Asafo yuu diɛŋtsɛ ba kɛjɛ Hamat niiaŋ yɛ kooyigbɛ kɛ Ijipt niiaŋ yɛ wuoyigbɛ fɛɛ. 66Gbi ni ji kpaanyɔ lɛ nɔ lɛ, Solomon wo asafo yuu lɛ fɛɛ gbɛ amɛtee. Amɛ jie eyi, ni amɛtee shĩa kɛ miishɛɛ kɛ tsuijurɔ yɛ ejuji fɛɛ ni Yehowa efee etsulɔ David kɛ emaŋ Israel lɛ hewɔ.
Currently Selected:
1 Maŋtsɛmɛi 8: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
