1 Maŋtsɛmɛi 7
7
Solomon mã Maŋtsɛwe lɛ
1Solomon mã maŋtsɛwe ehã lɛ diɛŋtsɛ ehe. Ekɛ afii nyɔŋma kɛ etɛ̃ mã fɛɛ egbe naa. 2-3#Yes 22.8 Emã Asa ko ni akɛ Lebanon tsenedru tso eha mli fɛɛ. Ekɛlɛ ji ninetalɔi oha, ni elɛɛmɔ ji ninetalɔi nyɔŋmai enumɔ kɛ enyɔ; ni ekwɔlɛ ji ninetalɔi nyɔŋmai etɛ̃. Amã yɛ akulashiŋi koji ejwɛ anɔ. Koŋ kome hiɛ akulashiŋi nyɔŋma kɛ enumɔ. Ni amɛ fɛɛ amɛsɔoɔ akpalei nyɔŋmai ejwɛ kɛ enumɔ. Ni akɛ tsenedru ŋmoŋmolo esɛŋ tsu nɛɛ nɔ. 4Ni gbogboi enyɔ lɛ, amɛteŋ eko fɛɛ eko yɛ samfɛji etɛ̃tɛ̃ɛtɛ̃. Eko miikwɛ eko hiɛ. 5Shinai etɛ̃tɛ̃ɛtɛ̃ yɛ biɛ kɛ biɛ kɛyaa asa wulu lɛ hiɛgbɛ. Eko miikwɛ eko hiɛ.
6Akɛ akulashiŋi efee koi ko, ekɛlɛ ji ninetalɔi nyɔŋmai enumɔ, ni elɛɛmɔ ji ninetalɔi nyɔŋmai etɛ̃. Ni akpãtãŋ#7.6: akpãtãŋ: Koi leleoo leleoo ko ble asa lɛ hiɛ ni aha nɔ. 7Solomon maŋtsɛ sɛ̃i lɛ, emã kojomɔ asa lɛ nɔ, he ni ayeɔ sane yɛ lɛ. Akɛ tsenedru tso eka mli fɛɛ kɛjɛ ŋwɛi kɛyi shi. 8#1 Maŋ 3.1 Solomon diɛŋtsɛ shĩa ni lɛ diɛŋtsɛ ebaahi mli lɛ yɛ kpo kroko nɔ, yɛ kojomɔ asa lɛ sɛɛ. Amã lɛ tamɔ kojomɔ asa lɛ nɔŋŋ. Ni Solomon mã shĩa hu ehã eŋa ni ji Farao biyoo lɛ. Shĩa nɛɛ tamɔ enɔ̃ lɛ nɔŋŋ.
9Tsui nɛɛ fɛɛ kɛ asa wulu lɛ, akɛ tɛi ni jara wa, tɛi ni asusu ni ako, ni amɛsɛɛ kɛ amɛhiɛ fɛɛ lɛ akɛ akpalala esaa he. Akɛka mli kɛjɛ shishi kɛyashi sɔɔdoi lɛ anaa tɔ̃ɔ. Afee lɛ nakai kɛjɛ Yehowa agbo lɛ naa kɛyashi kpo wulu lɛ nɔ. 10Ni shishitoo lɛ, tɛi ni jara wa sɔŋŋ ni. Amɛdara kpelekplei diɛŋtsɛ. Tɛi lɛ ekomɛi akɛlɛmɔ ji ninetalɔi kpaanyɔ, ni ekomɛi hu ninetalɔi nyɔŋma. 11Tɛi ni jara wa ni asusu ni ako ni; tsenedru tso akɛtswa nɔ. 12#1 Maŋ 6.36 Ni kpo wulu bɔle he kɛkpe. Be ni atswaa lɛ, kɛji atswa tɛ ni ako klɛmpɛi etɛ̃ lɛ, kɛkɛ lɛ akɛ tsenedru mplaŋ klɛmpɛ kome efɔ̃ nɔ dani atswaa ekroko hu. Nakai nɔŋŋ afee Yehowa Sɔlemɔ we lɛ kpo lɛ kɛ shĩa lɛ he koi lɛ hu.
Huram nitsumɔ
(2 Kronika 3.15-17)
13 #
2 Kron 2.12, 13 Maŋtsɛ Solomon tsu ni ayaŋɔ Huram kɛjɛ Tiro kɛba. 14#Jɛn 31.3, 4 Yoo okulafo ko ni jɛ Naftali akutso lɛ mli lɛ bi nuu ji lɛ; shi etsɛ lɛ Tironyo ni. Eji akɔɔble ŋaalɔ ni nilee kɛ jwɛŋmɔ kɛ ŋaa eyi lɛ obɔ̃. Akɔɔble nitsumɔ mli lɛ ehe esa po ni ehiii. Lɛ eba Maŋtsɛ Solomon ŋɔɔ, ni ebatsu enii lɛ fɛɛ ehã lɛ.
15 #
2 Maŋ 25.17
Huram fee akɔɔble akulashiŋi enyɔ emãmɔ Sɔlemɔtsu lɛ shinaa lɛ shi. Ekome kwɔlɛ ji ninetalɔi nyɔŋma kɛ kpaanyɔ; ni emlitilɛ ji ninetalɔi nyɔŋma kɛ enyɔ. 16Ni eshwie akɔɔble yiteŋ kpɔi enyɔ; ni ekɛmãmɔ akulashiŋi lɛ ayiteiaŋ. Ekome kwɔlɛ ji ninetalɔi enumɔ. 17Ni ntaŋi ni alo, kɛ fɔfɔii akekrei ni agbɔ tamɔ kɔsɔŋkɔsɔi yɛ kpɔi ni yɔɔ akulashiŋi lɛ ayiteiaŋ lɛ ahe; kpawo yɛ kpɔ kome he, ni kpawo yɛ kpɔ kome hu he. 18Ni afee kpɔbii kokrobii klɛmpɛi enyɔ awo ntaŋ lɛ he kɛkpe; ni akɛha akulashiŋi lɛ ayiteiaŋ kpɔi lɛ anɔ.
19Ni kpɔi ni mãmɔ akulashiŋi lɛ ayiteiaŋ yɛ koi lɛ shi lɛ afee amɛ tamɔ fɔfɔii. Amɛkwɔlɔmɔ ji ninetalɔi ejwɛ. 20Ni yiteiaŋ kpɔi lɛ yɛ akulashiŋi enyɔ lɛ ayiteiaŋ tamɔ akpakii, ni amɛyɛ ntaŋ lɛ sɛɛ. Kpɔbii kokrobii lɛ ayibɔ ji ohai enyɔ; ni ato amɛ srɛnɛɛ yɛ akulashiŋi lɛ ahe.
21Huram kɛ akulashiŋi enyɔ nɛɛ mãmɔ Sɔlemɔtsu lɛ koi lɛ shinaa lɛ shi. Ni ninejurɔgbɛ akulashiŋ lɛ awo lɛ Yakin; ni nɔ ni yɔɔ abɛkugbɛ lɛ awo lɛ Boaz. 22Afee akulashiŋi lɛ ayiteiaŋ tamɔ fɔfɔii ni egba. Bɔ ni agbe akulashiŋi lɛ ahe nitsumɔi lɛ anaa nɛ.
Akɔɔble Gbudugbaŋ lɛ
(2 Kronika 4.2-5)
23Huram fee akɔɔble gbudugbaŋ. Emlikwɔlɛ ji ninetalɔi nyɔŋma; ni elɛɛmɔ ji ninetalɔi enumɔ. Ekutruku mli kɛbɔle lɛ ji ninetalɔi nyɔŋmai etɛ̃. 24Akɛ akɔɔble fee akpakii kɛbɔle gbudugbaŋ lɛ toi. Ninetalɔ kome hiɛ nyɔŋma. Ato amɛ srɛnɛi enyɔ kɛbɔle kɛkpe. 25Akɔɔble gbudugbaŋ nɛɛ mã akɔɔble tsinai nyɔŋma kɛ enyɔ akotosɛɛ. Etɛ̃ miikwɛ kooyigbɛ; ni etɛ̃ miikwɛ anaigbɛ, ni etɛ̃ miikwɛ wuoyigbɛ ni etɛ̃ miikwɛ bokãgbɛ; shi amɛsɛɛgbɛ eyaje mligbɛ. 26Etilɛ tamɔ dɛ̃ lɛɛmɔ. Ni afee enaabu tamɔ kpulu naabu, tamɔ oflɔ fɔfɔi ni egbele enaa; eyeɔ nu litai aaafee akpei ejwɛ.
Akɔɔble shwiilii lɛ
27Huram kɛ akɔɔble fee shwiilii bibii nyɔŋma. Ekome kɛlɛ ji ninetalɔi ejwɛ, elɛɛmɔ ji ninetalɔi ejwɛ, ni ekwɔlɛ ji ninetalɔi etɛ̃. 28Bɔ ni afee shwiilii lɛ nɛ. Amɛyɛ naabaŋmɔnii ni afee akpɛtɛ shwiilii lɛ. 29Ni naabaŋmɔnii nɛɛ, afee jatai kɛ tsinai kɛ kerubim amãgãi yɛ nɔ. Afee fɔfɔii hu yɛ he. 30Shwiili fɛɛ shwiili yɛ akɔɔble kokolontoi ejwɛ kɛ akɔɔble kokolonto mlitsei. Ni waomɔnii mãmɔ ekoji ejwɛ lɛ nɔ. Ni waomɔnii lɛ asɔo akpɛtɛ gbudugbaŋ lɛ; afee fɔfɔi akekre sãmãi awo fɛɛ he. 31Ni kuɛ ni mã naabumɔ nɔ lɛ teŋ lɛ kwɔlɛ ji ninetalɔ kome. Ni eyiteŋgbɛ lɛ atɛ̃ mli tamɔ sɛ̃i. Ni emlikwɔlɛ ji ninetalɔ kome kɛ fã, ni aye sãmãi yɛ he kɛkpe. 32Kokolontoi ejwɛ yɛ naabaŋmɔnii lɛ shishi. Amɛkwɔlɔmɔ ji ninetalɔ kome kɛ fã. 33Ni kokolontoi lɛ afee amɛ tamɔ shwiili naji. Naji lɛ anaabaŋmɔ nii lɛ kɛ naji lɛ amlitsei lɛ kɛ naji lɛ amliblɛmɔtsei lɛ fɛɛ lɛ, akɔɔble akɛfee. 34Ni shwiili fɛɛ shwiili yɛ waomɔnii yɛ ekoji ejwɛ lɛ he. Ni asɔo akpɛtɛ shwiili lɛ yɛ shishigbɛ. 35Ni shwiili lɛ yiteŋ lɛ afee naabaŋmɔ nii ni elɛɛmɔ ji ninetalɔ fã. Ni nɔbumɔ nɔ lɛ kɛ waomɔnii lɛ asɔo akpɛtɛ. 36Ni waomɔnɔ lɛ hiɛ kɛ naabaŋmɔ nɔ lɛ he lɛ, kerubim kɛ jatai kɛ tɛŋ sãmãi yɛ nɔ, bɔ ni aaaho nɔ. Ni akɛ fɔfɔi akekre ebɔle amɛ kɛkpe. 37Nɛkɛ ji bɔ ni afee shwiilii nyɔŋma lɛ: amɛ fɛɛ pɛpɛɛpɛ, amɛsu kɛ amɛdaramɔ fɛɛ pɛpɛɛpɛ.
38 #
Ɛks 30.17, 21 Huram fee akɔɔble botokui nyɔŋma. Shwiili fɛɛ shwiili nɔ ekome. Botoku kome mli lɛɛmɔ ji ninetalɔi ejwɛ. Ni eyeɔ nu litai ohai kpaanyɔ. 39Ekɛ shwiilii enumɔ mãmɔ Sɔlemɔ we lɛ wuoyigbɛ; ni ekɛ enumɔ hu mamɔ ekooyigbɛ. Ekɛ gbudugbaŋ wulu lɛ ma Sɔlemɔ we lɛ wuoyi bokãgbɛ. 40Huram fee gbɛi kɛ jwɛiloomɔnii kɛ lalakãi. Huram gbe nitsumɔ ni etsu ehã Maŋtsɛ Solomon yɛ Yehowa we lɛ fɛɛ naa.
Nibii ni afee yɛ shĩa lɛ mli
(2 Kronika 4.11—5.1)
41Nibii ni Huram fee lɛ nɛ: Akulashiŋi enyɔ kɛ kpɔi kokrobii enyɔ ni mãmɔ akulashiŋi enyɔ lɛ ayiteiaŋ. Efee ntaŋi ni akɛha kpɔi kokrobii enyɔ ni mãmɔ akulashiŋi ayiteiaŋ lɛ ahe. 42Ni efee ntaŋi enyɔ lɛ ahe kpɔbii kokrobii ohai ejwɛ: kpɔbii kokrobii srɛnɛi enyɔ yɛ ntaŋ kome he. Afee enɛɛmɛi akɛha kpɔbii kokrobii ni mãmɔ akulashiŋi lɛ ayiteiaŋ lɛ ahe. 43Huram fee shwiilii nyɔŋma kɛ botokui nyɔŋma ni mãmɔ shwiilii lɛ anɔ. 44Efee gbudugbaŋ agbo kome kɛ tsina amãgãi nyɔŋma kɛ enyɔ ni emã nɔ. 45Huram fee gbɛ́i kɛ jwɛiloomɔnii kɛ lalakãi. Nɛkɛ nibii nɛɛ fɛɛ lɛ akɔɔble ni atsuu he kaŋkaŋ akɛfee ahã Maŋtsɛ Solomon koni akɛsaa Yehowa shĩa lɛ mli. 46Maŋtsɛ Solomon hã afee enɛɛmɛi fɛɛ yɛ Yordan ŋa lɛ nɔ, yɛ shiku shikpɔŋ ni yɔɔ Sukot kɛ Zaretan teŋ lɛ mli.
47Nibii lɛ ayifalɛ sɔŋŋ hewɔ lɛ, Solomon eŋmɛɛɛ koni ena eyikulɛ. Akɔɔble lɛ hu aleee naa. 48#Ɛks 25.23-30; 30.1-3 Solomon fã, ni afee shika nibii hu awo Yehowa we lɛ. Nibii nɛɛ ji: Shika afɔleshãa latɛ kɛ shika okplɔ̃ ni akɛ hiɛmaa aboloo lɛ mãa nɔ lɛ. 49#Ɛks 25.31-40 Akɛ shika ŋmiiŋmi fee kanetsei ni mãmɔ He Krɔŋkrɔŋ lɛ hiɛ lɛ, enumɔ yɛ wuoyigbɛ, ni enumɔ yɛ kooyigbɛ. Akɛ shika fee fɔfɔii lɛ kɛ kanei lɛ kɛ abɛɛlei lɛ hu. 50Akɛ shika ŋmiiŋmi fee kãi kɛ lalakãi kɛ likɔlikɔi kɛ lajee ŋɛsui; He Krɔŋkrɔŋ Fe Fɛɛ lɛ kɛ Sɔlemɔtsu lɛ naa shinai lɛ asɛɛ sai lɛ hu shika akɛfee.
51 #
2 Sam 8.11; 1 Kron 18.11 Be ni Maŋtsɛ Solomon gbe Sɔlemɔtsu lɛ he nitsumɔ lɛ naa lɛ, eŋɔ̃ nibii fɛɛ ni etsɛ David ejɔɔ nɔ eke, ni ji jwiɛtɛi kɛ shika lɛ kɛba ekɛbato Yehowa we lɛ nitoohe lɛ mli.
Currently Selected:
1 Maŋtsɛmɛi 7: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
